Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Нималанаяслӧн олӧмысь

7

Гижысьястӧ, кодъяс мунӧмаӧсь нин миян дорысь, мыйлакӧ гижӧдъясын казьтыштам медсясӧ сӧмын тшупӧда пасъяс дырйиыс. Ёгор Рочевлӧн эськӧ некутшӧм гӧгрӧс пас оз на тыдав, но тайӧ визув синъяса, шмонлив мортыс унаысь юрӧ волӧ. Ичӧтик мыгӧра мужичӧйӧс кӧ казяла ывлаысь, бара на Егор Васильевичкӧд ӧткодялышта. Сійӧ ӧд тушанас эз ыджыд и вӧв.

Ичӧт пон пӧ тай век кутю. Сідзжӧ и Ёгор Рочев дыр кад асьсӧ томӧн лыддис. Ар ветымынӧ нин вӧлі матысмӧ, а кодкӧ сы дінӧ дядьӧн ывлаын шыӧдчӧма, да мортыс быгалӧм чужӧмӧн «Войвыв кодзулӧ» пырис.

- Шыӧдчысьыс ӧд меысь на пӧрысьджык, - ропкӧдчис Егор Васильевич.

Ачыс сійӧ вӧлі укшаль кодь. Эз тэрмась некытчӧ. Котӧртӧм тай сылысь эг аддзыв-а. Сэтшӧм жӧ вӧлі удж вылас. Быттьӧ дышпырысь ставсӧ вӧчис. Но гижис кӧ мыйкӧ, то эз лёка. Тэрмасьтӧгыд ӧд кӧть оз ӧдйӧ сод, но бура артмӧ.

Сійӧ пырджык ас пытшкас моз оліс. Та вӧсна и йӧзсӧ юр вежӧрас кутны эз вермы. Ме сійӧс во вит нин вӧлі тӧда, а быд паныдасигӧн выльысь юасяс, коді сэтшӧмыс да кытысь.

Коркӧ «Югыд туй» газетӧ уджавны сійӧ пыралӧма. Тӧлысь-мӧд нин мырсьӧма, но мыйлакӧ абу радейтӧма жырйын пукавны. Тундраын быдмӧм мортыдлы дзескыд сэні, тыдалӧ. Со и ветлӧдлӧма коридорӧдыс, кор мукӧдыс пызан сайын зунясьӧмаӧсь. «Югыд туйын» сэк медыджыднас вӧлі Александр Васильевич Сажин. Сылы и босьтчӧмаӧсь няргыны мукӧд уджалысьыс. Ми пӧ гижам-ноксям, а Рочев коридорті тапикасьӧ.

- Егор Васильевич, уджалан кадӧ миян войтырыс пырджык ӧд пызан сайынӧсь. А тэ пӧ коридорын медсясӧ, - топӧдӧма Рочевӧс Сажиныд.

Мӧдыс синсӧ читкыралӧмӧн вель дыр сюся видзӧдӧма начальник вылас да юалӧма:

- Кытыськӧ ме тэнӧ аддзылі нин, но со ог вермы уськӧдны тӧд вылӧ, кӧні паныдасьлім?..

Таысь эськӧ абу на тодмышкалӧмаӧсь да. Бӧрынджык ковмӧма «Югыд туйсьыд» мунны.

Гожӧм заводитчигӧн ыстӧмаӧсь Рочевӧс Изьва районӧ. Тэ пӧ войвылын чужин-быдмин, сэтчӧс йӧзыслысь олӧм-вылӧмсӧ тӧдан да сямман бур гижӧд вӧчны...

Егор Васильевич вежон кымын абу мыччысьлӧма редакцияад. Локтӧм бӧрас уджъёртъясыс вель дыр виччысьӧмаӧсь сысянь гижӧд. Сэсся абу вермӧмаӧсь вишкыны да топӧдӧмаӧсь Рочевӧс. Вай пӧ нин!.. Та дыра ветлігад пӧ миян журналистъяс додь тыр статья-очерк вайлӧны. Лун-мӧд мысти Егор Васильевич вайӧма гижӧдтӧ. Лист вылӧ пасйыштӧма: «Мӧдлапӧлын баксісны мӧсъяс. Тыдалӧ,  Изьваӧ гожӧм воӧма». Со и ставыс. Та бӧрын, тӧдӧмысь, мортыдлы шуӧмаӧсь мунны. Бур, мый «Войвыв кодзулын» уджалысьӧс корсьӧмаӧсь, да бара инасис. Эз ковмы томдырсяыс моз стрӧитчанінын рӧбитны.

Тундра сылы нэм чӧжыс вӧлі сьӧлӧм да лов шонтысьӧн. Весиг маличаӧн кар кузя тапикасьлӧма гежӧдика. Бӧръя кадсӧ сійӧ оліс Моровоса дачаас да ӧти тӧвся лунӧ вӧлі сёрмӧма автобус вылад. Кӧдзыдысла малича пасьталӧма, веськӧдчӧма подӧн карлань. Некод абу сувтӧма-босьтӧма, кӧть эськӧ подаыд кисӧ кыпӧдлӧма жӧ. Медбӧрын сюрӧма повтӧм мортыс, пуксьӧдӧма орччӧн. Юалӧма: кытысь татшӧм тешкодь паськӧмаыс? Ме пӧ тундраысь. Лэба пӧ вӧлі самолётӧн да уси. Ӧні пӧ аэропортӧ тэрмася, мед мӧдлаӧ сӧвны да водзӧ лэбны...

Тундраад ветлыны Егор Васильевич зэв радейтліс. Ӧтчыд бара веськалӧма чужанінас. Пуксьӧдӧмаӧсь даддьӧ ӧтнассӧ. Тэрыба мунігад и пӧрӧма-усьӧма лымйӧ. Сыкӧд тшӧтш - водка дозъяс, найӧс даддяс жӧ пуктылӧмаӧсь. Куйла пӧ и муртала, мый водзӧ лоӧ. Мела пӧ, дерт, оз бергӧдчыны, а со водкаысла бытьӧн локтасны. Казяласны, мый абу да. И збыль, водзын мунысьясыд недыр мысти бергӧдчӧмаӧсь. Зэв пӧ сюся гӧгӧр видзӧдӧмӧн первой сулеяяссӧ чукӧртісны, малалісны, жугалӧмаӧсь абу, сэсся пӧ сӧмын сэк ме дорӧ шыӧдчисны, эг-ӧ доймы усигас...

Лыддьысьысьяскӧд аддзысьлігӧн тшӧкыда казьтывліс армияас служитӧмсӧ. Пушкаяс пӧ видзим. Тӧвнас пӧ лым толаас часӧвӧйлы тулуп сюйлісны: урчитӧм кад мысти тулупсьыс ӧтиӧс перъясны да сы пыдди выль мортӧс сэтчӧ дзумгасны. Сулала пӧ тӧвся войӧ тулуп  пытшкад, орччӧн пушкалӧн сьыліыс дзирдалӧ. Служитан пом нин пӧ матысмӧ, а ньӧтчыд на эз мойвилы пушкасьыс лыйны. Петӧма тулуп письыд, матыстчӧма пушка дорӧ. Кытчӧ и лыйнысӧ? Видзӧда пӧ, да енэжас дзик гӧгрӧс тӧлысь сюсьялӧ. Сэтчӧ пӧ и лыя! Камӧбтӧма-лыйӧма. Котӧрӧн локтӧмаӧсь весьӧпӧрӧм командиръяс да пакӧсьт вӧчӧмсьыд дзумгӧмаӧсь Рочевӧс гаубвахтаӧ. Быдса дас вит лун пӧ сэні видзисны. Мездмӧма коркӧ пемыд дырйи нин. Петӧма дзескыдінсьыд, енэжӧ видзӧдлӧма, а сэні тӧлысьыд джынъя нин. Кык вежон ӧд кольӧма. Менам пӧ нимкодьӧй, вашъявтӧг висьтасис кывзысьяслы Ёгор Рочев, веськавсьӧма ӧд тӧлысяд да!.. Ставныс сералӧны, а Егор Васильевич нюмъявтӧг зэв сьӧлӧмсяньыс мӧд тешкодьтор йылысь нин босьтчӧ вӧлі мойдны...

Алексей Попов.

 

Добавить комментарий


наверх