Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Эскы мем, пиӧй

4

Джуджыд насыпь дорын олӧны ая-пиа. Тайӧ насыпьсӧ коркӧ лӧсьӧдлӧмаӧсь грездса важ пӧльяс, но вочасӧн сійӧ жебмис. А сытӧг овны оз позь - мудӧд дорйӧ асныра визув юысь. Батьыс быд лун кайліс грезд сайын тыдалысь мыльк йылӧ. Сёр рытӧ воліс бӧр да быд пӧрйӧ аскӧдыс вайліс телега му.

- Тэч мусӧ мешӧкъясӧ, пиук, - мудзпырысь шуліс сійӧ, - да ну насыпь вылӧ.

Зонка кӧть и кывзіс батьсӧ, сьӧлӧмас овмӧдчис веждӧг: дӧнзис нин ноксьыны сьӧд уджнас, мудзис кыскавны му тыра нопъяссӧ. Бугжыльӧн видзӧдіс айыс вылӧ: «Мыйла сійӧ мырдӧн уджӧдӧ менӧ? Мукӧдлӧн быдсикас ворсаныс эм, а менам сӧмын ӧти мог...»

Зонка завидьпырысь видзӧдіс ёртъяс вылас: «Шог ни мог, ворсӧны-гажӧдчӧны, а ме ола сьӧдас, му кыскала».

А батьыс сӧмын нюмъяліс. Топӧдліс писӧ аслас ён сывйӧ да шуліс:

- Эскы мем, пиукӧ. Ми вӧчам сійӧс, мый колӧ...

Зонкалы дӧбельки дышӧдіс кывзыны батьсӧ, а мӧдыс пыр сӧмын ассьыс долис:

- Уджав, эн броткы да лэптав мешӧкъяссӧ вылӧджык!

Регыд лыбис сэтшӧм джуджыд мудӧд, мый кажитчис - таысь джуджыдджыкыс свет вылас нинӧм абу.

- Уджав зільджыка, пиук, - ӧтчыд шуис батьыс. - Миян кадыс этша.

Сійӧ шогпырысь видзӧдліс пемдысь енэжӧ. Зонка аддзис жӧ повзьӧдчана сьӧд кымӧръяссӧ и сӧмын кӧсйис мыйкӧ юавны айыслысь, вирдовтіс чардби, сяркнитіс гым да чаш-поткӧдіс енэжсӧ шӧрипельӧ. Ведраысь моз пондіс кисьтны кыз зэр. Зэр пырыс зонка ӧдва аддзис батьсӧ, коді мый вермис горзіс:

- Тэч мешӧкъяссӧ, пиук!..

Зонка яра босьтчис уджӧ, и тайӧ здукас кыліс повзьӧдчана шум.

Юыс гызис-гызис, а сэсся ворсӧдчӧмӧнмоз путкыльтіс важ мудӧдсӧ, коді нэмъяс чӧж ви-дзис налысь грездсӧ, сэсся скӧрысь уськӧдчис олан керкаяс вылӧ. Гудыр ва ӧти здукӧн ойдӧдіс матігӧгӧрсӧ, но ая-пиаӧн дасьтӧм выль мудӧд эз лэдз дурмӧм юсӧ, сетіс ая-пиалы стӧч сымда кад, мыйта коліс.

- Ӧдйӧджык, пиук! Лок ме бӧрся!.. - горӧдіс батьыс да уськӧдчис котӧртны.

Ая-пиа котӧрӧн кайисны мыльк йылӧ, и зонка аддзис сэтысь выльӧн тшупӧм керка.

- Эска, тані ми лоам шудаджыкӧсь, - кокниа нин лолыштіс айыс.

Сӧмын сэки гӧгӧрвоис зонка, кӧні лун-лун вошласис батьыс. Вӧлисти пакталіс лӧгыс да вежӧглуныс, а найӧ бӧръя лунъясӧ збыльысь овмӧдчылісны сылӧн рам сьӧлӧмӧ. Ӧні на пыдди чужис батьыс дорӧ пӧсь аттьӧалана кыв.

Тадзи и Енмыс миянлы сетӧ зумыд сайӧд, медым дорйыны неминуча дырйи, индӧ петан туй. Сӧмын колӧ пыр тӧдны та йылысь.

Дасьтіс Юрий Яковлев.

 

Добавить комментарий


наверх