Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Петан туй

Семечкин личкис кнопкаӧ, но звӧнок эз уджав. Семечкин дӧзмӧмпырысь чужйис ӧдзӧсас, и сійӧ дзуркнитӧмӧн воссис.

- Кӧзяин! - чуймӧмӧн горӧдіс Сёма Семечкин да воськовтіс ёртыслӧн патераӧ. - Рустам! Шарипов ёрт, кӧні тэ?!

Воча некоді эз шыась.

Семечкин вештіс ӧдзӧсын ӧшалысь занавес, вось-ковтіс пыді жырйӧ и видзчысьтӧмысла пыр жӧ акнитіс: «Рустам Шарипов... джагӧдчис!..»

Мича костюма, дзирдавтӧдз мавтӧм туплиа патераса кӧзяин педзис кок увсьыс вешйыны окотитысь джек вылын да ассьыс куш юрсӧ мый вынсьыс зілис сюйны дженьыдик гезйысь вӧчӧм петляӧ.

- Рустам, тэ нӧ мый вӧчан? - пычиктіс Сёма.

- Кыдзи мый? - сьӧкыда лолалігтыр шӧпкӧдіс Рустам. - Он кӧ аддзы, ӧчкитӧ пысавлы.  Ӧшӧдча!

- А мый понда?

- Он тӧд, мый юавны? Дерт жӧ, овны дышӧдіс.

- А мый понда?

- Тэ мый сэні попугай моз пондін? Ӧти-кӧ, менӧ... Выль во водзвылын... удж вылысь сократитісны! Кӧні зіли кызь вит во. Со-кра-ти-тіс-ны! Мӧд-кӧ, пенсияӧдз быдса куим во на коли, коймӧд-кӧ, квайтӧд разряда токар некӧні оз ков!

- А уджтӧмалӧмысь пособие?

Рустам пондіс серавны, да сэтшӧм гылыда, мый муртса эз усь джек вывсьыс. И тайӧ здукас Сёма пузис:

- Чайтан, ме вир йӧй, да? А вир йӧйыс тані - тэ. Тэ со весиг ӧшӧдчынытӧ он сяммы!

- Татара быдтор сяммӧны! - кабырсӧ зэлӧдіс шӧр арлыда Рустам.

- Да он мӧй вежӧрт: гезйыд тэнад вывті дженьыд и люстра кутысь крукыс тэ кодьсӧ оз вермы кутны, мынас.

- Гез серти кӧ, оз ков нем абусӧ шуны - менам мурталӧма. И юрӧй тӧрас, и кокъяс джоджӧдз оз воны. А круксӧ видлі нин. Будь спок!

Сёма Семечкин водзӧ эз тӧд, мый шуны, да чургӧдіс льӧбсӧ.

- Ме сы дорӧ морт дорӧ моз, югыд юра сулеяӧн, а сійӧ - ӧшӧдчӧ, - Сёма ыджыда ышловзис да лӧсьӧдчис мунны.

- Югыд юра сулеяӧн? - вежсьӧм гӧлӧсӧн юаліс Рустам.

Сёма бергӧдчывтӧг гогнитіс юрнас.

- Гашкӧ нӧ, кулӧм водзын?..

- Тьпу!

- Но эн скӧрав, виччысьлы, Сём. Мун кухняас, а ме здук мысти воа.

- Важӧн нин тадзи коліс,- броткыштіс Семечкин да пырис кухняӧ. Сӧмын лэптіс стӧканъяс да восьтіс холодильник, гир-гар уси джек да кыліс, кыдзи Рустам пондіс киргыны.

Сёма чепӧсйис сы дорӧ. Шудтӧм морт кулӧмӧ дзугсьӧм чери моз кватлаліс сынӧдсӧ да ӧти кинас зілис личӧдны петлясӧ, а мӧднас индіс кытчӧкӧ увлань. Семечкин гӧгӧрвоис, лэптіс пӧрӧм джексӧ да отсаліс Рустамлы мездысьны джаггӧрӧдысь.

- Век жӧ вӧчин ассьыд?!

- Э-эг, - недыр мысти сяммис вочавидзны Рустам, - мӧдарӧ на, вежи лёк думӧс. Та бӧрын прӧста видлыны кӧсйи: и гезйыс вӧлӧма стӧч, и крукыс кутіс.

- Но мый понда видлынысӧ колӧ вӧлі, а? Ме тэныд и сідзи эски.

- А ме... аслым. И со кутшӧм думӧдз вои: татшӧм кӧ нин ме вежӧра, и абу на пӧрысь, петан туй ог мӧй аддзы? А, Семён?

- Да аддзан, дерт! Ӧтлаын и думыштлам. Югыд юраыдкӧд...

Олег ПРЯНЕЧНИКОВ.

 

Добавить комментарий


наверх