Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Бара на гажӧдчим

Бара на гажӧдчим

Y 8 1

Октябрь 30 лунӧ Ю.Спиридонов нима искусствояс гимназияын юргис том йӧзлӧн выль коми сьыланкывъя республикаса IV фестиваль. Ыджыд сцена вылын чукӧртчисны миян синмӧн судзтӧм республикаысь медся енбиа артистъяс. Том сьылысь войтыр козьналісны юркарын олысьяслы да гӧсьтъяслы мича кывъяса да мелі шылада выль сьыланкывъяс.

Концерт дасьтысьяс да артистъяс ёна зілисны, медым шензьӧдны видзӧдысьясӧс. Рок, поп, этно-фолк да битбокс элемента коми сьыланкывъяс, юрвежӧр бергӧдана, шемӧсмӧдана йӧктан шоу висьтавны позьтӧма мӧрччисны видзӧдысьяслӧн сьӧлӧмӧ. Став сьылысьыслӧн ӧзйис синмыс, тэрыба тіпкис пӧсь сьӧлӧмыс: пелька да кужӧмӧн петкӧдчис сцена вывсянь быд артист.

«Койташын» сямсӧ петкӧдлісны юркарысь «Томлун» ансамбль, Одыбысь «Юность» котыр, Кулӧмдін районысь «Кыкӧн» дуэт. Шемӧсмӧдана дивӧ кодь сьыланкывъяс вӧліны Удораысь Софья Кукиналӧн, Юлия Благоевалӧн, Алексей Жилинлӧн, Анастасия Марковалӧн, Изьва районса сьылысь гозъя Таисия да Даниил Чаплыгинъяслӧн, Визинысь Юлия Осиповалӧн, В.Чисталёв нима культура колледжысь «Эзысь войт» ансамбльлӧн, Сыктывкарысь Александра Ногиевалӧн, зарни юрсиа, мелі нюма да мича гӧлӧса Евгения Удаловалӧн. Выль сьыланкывъяс вайисны Интаса «Севериада» котырысь рок-музыкантъяс. Найӧ шензьӧдісны ставнымӧс аслыспӧлӧс шыладӧн, кыпӧдісны залын пукалысь видзӧдысьясӧс помтӧм вын-эбӧсӧн. Некымынысь сцена вылӧ петаліс да гажӧдіс йӧзӧс Удораысь сьылысь-йӧктысь-гудӧкасьысь артист Александр Чирков. Тайӧ енбиа том морт, коді ёна радейтӧ ассьыс уджсӧ да сиӧ став олӧмсӧ творчестволы. «Койташса» гӧсьтъясӧс сьылӧмнас гажӧдіс и концертсӧ нуӧдысь Анастасия Михайлова. Настялӧн гора, юргысь гӧлӧсыс вермӧ сывдыны медся кӧдзыд сьӧлӧм, кыпӧдны мортлысь ловру да ловзьӧдны ставсӧ ас гӧгӧрсьыс.

Y 8 2

Артистъяс и асьныс тшӧтш гижӧны кывбур-шылад, ворсӧны быдсикас инструмент вылын, йӧктӧны. Ёна жӧ и озыр миян республиканым енбиа йӧзӧн!

Фестиваль вылын ставӧн сёрнитісны да сьылісны сӧмын комиӧн. Тайӧ висьталӧ сы йылысь, мый коми кыв ловъя, сійӧ сӧвмӧ том войтырлӧн творчествоын. Томулов радейтӧны да пыдди пуктӧны чужан кывсӧ, оз ӧтдортчыны сыысь, а сьыланкыв отсӧгӧн зільӧны петкӧдлыны сылысь мичлунсӧ да озырлунсӧ.

Выль коми сьыланкывъя «Койташ» фестиваль помасис сьылысьяслы козин-диплом сеталӧмӧн. Найӧс чолӧмалісны юркарса коми культура шӧринӧн веськӧдлысь Ольга Аверина да национальной политика министерствоын уджалысь Людмила Камбалова.

Аттьӧалам Сыктывкарса коми культура шӧринын да Коми Республикаса национальнӧй политика министерствоын уджалысьясӧс, кодъяс дасьтісны татшӧм ыджыд да кыпыд гаж! Став сьылысьлы сиам крепыд дзоньвидзалун да водзӧ сӧвмӧм!

Виктория МИХАЙЛОВА

 

Добавить комментарий


наверх