Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Ёна и нимлунасисны!

Ёна и нимлунасисны!

Y 4 1

Кольӧм вежонӧ Сыктывкар бердысь Гӧрд Затонса культура керкаын кыпыда нимлунасис «Бэйбики» челядьлӧн котыр. Пасйисны ичӧтик тшупӧда пас - куим арӧс тырӧм.

Челядьлы «Бэйбики» йӧктан котырӧ веськалан, мунан кӧ Гӧрд Затонса «Волна» культура керкаӧ. Паныдалас тіянӧс мелі нюма Надежда Александровна Старцева. Ныв-зонмӧс сэтчӧ босьтӧны нёль арӧссянь сизимӧдз. Сэсся нин челядьулов вуджӧны гырысьджыкъяслы котырӧ. Медводдзаысьтӧ дзолюкъяс пырӧны тӧдтӧминад полӧмпырысь, кодсюрӧ бӧрдӧмӧн. А пара тӧлысь мысти видзӧдан да, ыджыд сцена вывсянь нин асьсӧ петкӧдлӧны, ёртъясыс моз жӧ кинас и кокнас вӧчасьӧны, нюмъялӧны.

Быд во арнас йӧктан котыр пасйӧ чужан лун. Дерт, абу на ёна ыджыдӧсь, но дзолюкъясыдлысь тай быд во пасйӧны. Да и бать-мамлы кутшӧм любӧ, кор ассьыныс Машуксӧ ли Ванюксӧ аддзӧны сцена вывсянь, окотапырысь снимайтӧны видео- да фотокамера вылӧ, а сэсся видзӧдӧны-донъялӧны кагукыслысь быдмӧмсӧ.

Тавося нимлун вылӧ челядь дорӧ волісны Фея-волшебница, Белоснежка да Малефисента. Кодкӧ отсасис, а кодкӧ и дӧзмӧдчис томуловлы. Фея-волшебница пуктіс став вынсӧ, медым Белоснежка да Малефисента лоины ёртъясӧн.

Y 4 2

А челядь таын ёна отсасисны. Видзӧдысьяс водзын найӧ петкӧдчисны и матрёшкаясӧн, и лягушаясӧн, и пусьысьясӧн, и чипанпиянӧн. Татшӧм ногӧн найӧ петкӧдлісны бать-мамыслы, мый велӧдчисны вӧчны йӧктан кружокӧ ветлігӧн. Торйӧн нин нимкодьмӧдӧны медся ичӧтъясыс, кодъяс муртса на кык тӧлысь ветлӧны Надежда Старцева дорӧ.

Гажыслы кывкӧртӧд вӧчисны фейерверк, тшын да мыльнӧй пузырьяс лэдзӧм. Медбур козинӧн дзолюкъяслы лои ыджыдсьыс-ыджыд торт, кодлӧн торйыс вичмис дзик быдӧнлы.

Чужан лунӧн, «Бэйбики»! Талун янсӧдчам, а аскисянь нин кутам виччысьны выль корӧм нимлунасьны.

Надежда ПУНЕГОВА.

Снимокъясыс Надежда Батаговалӧн да Екатерина Чеусовалӧн.

 

Добавить комментарий


наверх