Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Чолӧм, дзолюкъяс!

Чолӧм, дзолюкъяс!

Y 8 1

Ноябрь 12 лунӧ искусство гимназиялӧн концертасян залын школаӧдз велӧдігӧн национальнӧй тӧжд-моглӧн лабораторияын зільысьяс пасйисны тшупӧда пас – 20 вося юбилей. «Чолӧм, дзолюкъяс!» гаж вылӧ волісны детсадъясӧ ветлысь посни войтыр, воспитательяс, велӧдысьяс.

...Залын пукалӧ уна йӧз, ставӧн виччысьӧны, кор заводитчас концертыс. И со ӧзйӧ яръюгыд би, да сцена вылӧ мича шылад улӧ петӧ Зарни Ар – гаж нуӧдысь Елена Бутарина. Шонді кодь югыд да тусь кодь мича нывбаба чолӧмалӧ ставнысӧ ыджыд гажӧн.

Радлана виччысьтӧмторйӧн лои Кикуруллюлӧн да Ваткыльлӧн петӧм! Найӧ ёна гажӧдісны артистъ-ясӧс да видзӧдысьясӧс, шмонитісны, ворсісны да коралісны сцена вылӧ сьылысь-йӧктысь котыръясӧс. Ассьыныс енбинысӧ да мастерлунсӧ петкӧдлісны Выльгорт сиктса 8-ӧд номера, Сыктывкарса 93-ӧд номера детсадйӧ ветлысьяс, Сыктывкарса 47-ӧд номера детсадйысь Егор Рассыхаев, Кулӧмдін районса Улыс Воч сиктысь челядь видзанінса дзолюкъяс, Сыктывкарса 17-ӧд номера челядь сӧвмӧдан шӧринысь да Кулӧмдін сиктысь 7-ӧд
номера «Голубок» детсадйысь зонпосни, Коми Республикаса искусство колледжысь «Коми сьылан» ансамбль. Видзӧдысьяслы мойвиис нимкодясьны посни челядьлӧн творчествоӧн. Дзолюкъяс сьылісны сьӧлӧм вӧрзьӧдана сьыланкывъяс, збоя йӧктісны, гораа да ясыда лыддисны кывбуръяс. Быдӧн зілис сьӧлӧмсянь чолӧмавны лабораторияын уджалысьясӧс.

Y 8 2

Гора да дыр кыссьысь кекӧначасьӧмӧн чолӧмалісны лаборатория котыртысь, сыӧн веськӧдлысь, педагогика наукаса кандидат Зоя Васильевна Остаповаӧс.

–Менам зэв бур команда, и ми зілям-уджалам мудз тӧдтӧг,– пасйис Зоя Васильевна.

Лабораторияын сы кындзи ӧні зільӧны нӧшта на нёльӧн: тайӧ велӧданног лӧсьӧдысьяс Марина Владимировна Рудецкая, Лариса Геннадьевна Кулышева, педагогика наукаса кандидат Татьяна Ивановна Чудова да тьютор Екатерина Валерьевна Попова. Лаборатория сетӧ позянлун ветлӧдлыны челядькӧд музейясӧ да тӧдмӧдны найӧс коми культураӧн, сӧвмӧдны посни челядьлысь серпасасян, кывбур тэчан сямсӧ, бура велӧдны мича да озыр чужан коми кыв. Кызь вонас лабораторияӧн дасьтӧмаӧсь да йӧзӧдӧмаӧсь детсадса дзолюкъясӧс велӧдан матӧ 80 пособие. Збыльмӧдӧма да пыртӧма олӧмӧ уна уджтас.

–Ми крепыд йитӧд кутам Куратов нима педколледжын уджалысьяскӧд, миянлы ёна отсалӧ «Коми войтыр» котыр, ёртасям «Би кинь» журналкӧд да «Йӧлӧга» газеткӧд,– висьталіс сцена вывсянь Зоя Васильевна.

Уна ёрт воліс чолӧмавны лабораторияын уджалысьясӧс. Шоныд кывъяс висьталісны да став бурсӧ сиисны Александр Пивкин, епископ Питирим.

Школаӧдз велӧдігӧн национальнӧй тӧжд-мог лабораторияын зільысь котыр вӧчӧ тӧдчана да колана удж. Таысь налы муӧдз копыр да ыджыд аттьӧ!

Сиам и ми енбиа уджалысьяслы водзӧ сӧвмыны, ылӧдз нимавны да, дерт жӧ, ставныслы крепыд дзоньвидзалун!

Виктория МИХАЙЛОВА

Снимокъясыс авторлӧн.

(Унджык снимок позьӧ аддзыны ӧтуввезса https://vk.com/yologa лист бокысь)

 

Добавить комментарий


наверх