Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Катя, Дима да Артём

Катя, Дима да Артём

Y 4 1

Ноябрь тӧлысся бӧръя вежалунӧ Россияса войтыр нимӧдӧны быдӧнлы медся дона, радейтана мортӧс – мамӧс. Буретш тайӧ гаж водзын торъя нин окота тӧдмӧдны лыддьысьысьясӧс том мамкӧд – Екатерина Мылкокӧд. 21 арӧса авъя аньыслӧн мичлун кындзи эмӧсь и ыджыд вын да ас водзӧ сувтӧдӧм мог олӧмӧ пӧрты зільӧм.

Катя чужлӧма-быдмӧма Усинск районса Семӧндрей сиктын, 2012 воын эзысь медальӧн помалӧма сэтчӧс шӧр школа. Велӧдчигас на йӧзӧдлӧма медводдза гижӧдъяссӧ республикаса газет-журналын, тшӧтш и «Йӧлӧгаын». Вӧлі пӧ ыджыд кӧсйӧм велӧдчыны журналистӧ,– висьталӧ нывка. Но олӧмыс нуӧдӧма мӧд туйӧд: 11 классын Катя пырӧдчӧма Сыктывкарса университетӧн котыртӧм конкурсӧ да лоӧма вермысьяс лыдын. Таысь нывкалы вӧзйӧмаӧсь пырны юриспруденция факультетӧ, туявны йӧзкотыркӧд да оланпаскӧд йитчӧм наукаяс.

Екатерина медводдза семестрсянь нин гӧгӧрвоӧма – велӧдчӧмыс сьӧлӧм сертиыс. Та вӧсна и лекция да семинар дырйи водзмӧстчӧма – презентация да доклад дасьтігӧн век медводдзаяс лыдын вӧлӧма. А сессия бӧрас зачёткаас ӧтторъя «вит» сярвидзӧма. Но студентлӧн олӧмыд озыр абу сӧмын выль тӧдӧмлун босьтӧмӧн, но и выль ёртъясӧн, быдсикас гажӧн, прӧст кад коллялӧмӧн. Ӧтуволанінысь нывъёртъяскӧд тшӧкыда ӧтвылысь нимлунасьлӧмаӧсь, котыртлӧмаӧсь-дасьтылӧмаӧсь быдсикас гаж, пырӧдчӧмаӧсь спортӧ. Кыдз пасйӧ Екатерина, тайӧ пӧ тӧжд тӧдтӧм кадыс и вӧлӧма.

Y 4 2

Мӧдӧд курсын велӧдчигӧн ӧтуввезйын Катякӧд тӧдмасьӧма Дмитрий, недыр мысти шуӧмаӧсь аддзысьлыны. Медводдзаысь паныдасьлігӧн пӧ и кажитчим ӧта-мӧдлы. Дима вӧлӧма буретш сэтшӧм зонмӧн, кутшӧмӧс нывка серпасавлӧма аслас вежӧрын: сюсь, кывкутысь, олӧм вылас зумыд видзӧдласа. Сӧмын нывлӧн пӧлыс олӧма да уджалӧма мӧд карын, Микуньын. Аддзысьлӧмаӧсь том йӧз гежӧда, шойччан лунъясӧ, а каникул дырйи кӧ вичмывлӧма коллявны ӧтлаын вежон – шудӧн пӧ нин вӧлі чайтам,– юксьӧ мӧвпъяснас Катя.

Тадзи кольӧмаӧсь тӧлысь бӧрын тӧлысь. Гожся экзамен сдайтӧм бӧрын, каникул дырйи, Екатерина и гӧгӧрвоӧма, мый регыд лоас мамӧн.

– Кор стӧча нин висьталісны, кага пӧ виччысян, шӧйӧвоши. Менам ӧд дзик мӧд думъяс да кӧсйӧмъяс вӧліны. Медводз мӧвпышті – а мый велӧдчӧмкӧд лоас? Ог ӧд эновт! Но та вылӧ видзӧдтӧг стӧча верма шуны, мый ми Димакӧд сэк кылім асьнымӧс медся шуда йӧзӧн!

Каникулсӧ Катя коллялӧма чужан сиктас, радейтана мортсьыс ылын. Буретш сэки Дима босьтчӧма вежны уджсӧ, ӧд найӧ регыд куимӧн лоасны. Торйӧнтӧ ёна гажтӧмтчӧмаӧсь ӧта-мӧдсьыс, а арнас ныла-зонма шуӧмаӧсь ворсны кӧлысь.

Сентябрын Катя бара на воӧма университетӧ. Медводз абу лысьтӧма весиг висьтасьны ёртъясыслы. Но дырсӧ абу жӧ вермӧма дзебны, кывсьӧма ставыс. Ёртъяс пӧ кӧть и чуймисны, но ставныс сӧмын бурӧн матыстчисны, кодкӧ кынӧмӧд малыштас, кодкӧ юасяс кагук йылысь. Весиг велӧдысьяс пӧ вӧлі нюмдӧны, кор Катялы вичмывлӧма дасьтыны мамъяслӧн да нӧбасьысь нывбабаяслӧн инӧдъяс кузя презентация либӧ доклад. Кык пӧв пӧ интереснӧ вӧлі тайӧс туявны, да и бӧрас тӧдӧмлуныс ковмис.

Выль 2015 во водзын Катя да Дима ворсӧмаӧсь кӧлысь. Аньлӧн висьталӧм серти, гажыс пӧ тӧвся мойд кодьӧн вӧлӧма. Сійӧ водзвыв кыӧма-вурӧма быдсикас мичмӧдантор. Дасьтӧма фотосессия кежлӧ шоныд кӧлуй, пимы да гын сапӧг, бабыслысь чышъян, кепысь да дадь. А невесталысь букет мичмӧдӧмаӧсь абу дзоридзьясӧн, а тугъясӧн да кольясӧн. Том гозъя окотитӧмаӧсь буретш татшӧм, мукӧдысь торъялана гаж.

Y 4 3

Тулыслӧн коймӧд лунӧ чужӧма багатыр Артём. Дона верӧсыс дінас жӧ вӧлӧма, тайӧ кыпыд, но сьӧкыд здукӧ быдногыс отсалӧма аньлы.

–Некор татшӧмнас эг аддзыв ассьым пӧлӧс: шемӧсмӧм, шуда да быттьӧ шӧйӧвошӧм,– висьталӧ Екатерина.

Том мамлы кӧть и сьӧкыд вӧлӧма, но ставсӧ тай удитлӧма. Пиыс тӧлысся на и вӧлӧма, кор матыстчӧма сессия кежлӧ дасьтысян кад, сэк кежлӧ Катя вуджӧдчӧма нин заочнӧй юкӧнӧ. И со ӧні нюмъялігтыр нин казьтылӧ, кыдзи моздорас какугкӧд лыддысьлӧма да вочакывъяс гижалӧма. Сэк отсӧг вылӧ и бабъяс да тьӧтыс локтӧмаӧсь, Катя весиг лекцияяс вылӧ удитлӧма ветлыны. И бара на экзаменъястӧ сӧмын «вит» вылӧ сдайтӧма.

Дерт, Катя медся уна кад вичмӧдӧ дона пиукыслы. Кыдзи и мукӧд том мам-батьлӧн, вӧлӧмаӧсь и ӧні на овлӧны узьтӧм войяс, кагалӧн «медводдза пиньяс». Но и шудыс да радлуныс тырмӧ: медводдза нюм, кыв... Кор велӧдчӧмысь да уджысь прӧстӧсь, том гозъя олӧны Усинск районын. Катя сӧмын шогсьӧ, верӧслы пӧ колӧ командировкаясӧ ветлыны, а ёртъясыс ылынӧсь, унджыкыс ӧд велӧдчӧны на. Но та вылӧ видзӧдтӧг Катялы пыр сюрӧ быдсикас кипом удж. Торъя нин ичӧт Артёмлы мойвиӧ мам киӧн кыӧм паськӧм новлыны. А тайӧ гожӧм ӧтуввезйын урок серти ань велӧдчӧма снимайтчыны да содтӧд на босьтчӧма вежласьны мир пасьтала олысь войтыркӧд открыткаясӧн. Гажтӧма овны Катя абу велалӧма.

Кор Катя висьталӧ пи йывсьыс, синъясыс ӧзйӧны, а вом доръясыс дзик пыр и нюмдӧны. Сэтшӧм долыд таысь! Сиам тайӧ шуда позйыслы сӧвмӧдны-пестыны ёрта-ёртӧс радейтӧмсӧ, а Катялы водзӧ лоны татшӧм жӧ водзмӧстчысь да кыпыд руа мортӧн!

Мария ИГУШЕВА.

Снимокъясыс Анастасия ШУКТОМОВАЛӦН

да Екатерина МЫЛКОЛӦН гортса архивысь.

 

Добавить комментарий


наверх