Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Оліс-выліс мойд

Оліс-выліс мойд

Y 10 1

Сыктывкарса 18 номера школаын нуӧдісны «Оліс-выліс мойд» конкурс-фестиваль. Пырӧдчисны сэтчӧ 19 школаысь 280 ныв-зон. 4-9 классын велӧдчысьяс петкӧдчисны сцена вывсянь, ордйысисны коми кывйӧн сёрнитны да актёрлӧн мастерствоӧн вӧдитчыны кужӧмӧн. Тшӧтш вӧлі и серпасъяслӧн конкурс.

Медводдза луннас сям-кужӧмсӧ петкӧдлісны 18-ӧд номера школаын велӧдчысьяс. Том актёръяс тӧлысьбыд дасьтысисны сы кежлӧ: велӧдісны кывъяс, пырӧдчисны рольӧ, дасьтісны костюмъяс. Ёна отсасисны велӧдысьяс да бать-мам. И эз весьшӧрӧ – томуловӧс корисны петкӧдчыны «Коз пу дорын» передачаӧ. Куим мойдлы уси татшӧм шудыс.

Видзӧдысьяс збыльысь веськавлісны мойдӧ: вӧр-ва шыяс, коми сьыланкыв юргӧм, обряд да традицияӧн тӧдмӧдӧм, зверъяс, вӧралысьяс, Пера-багатыр, Вӧрса да Чукля... Ставнысӧ весиг лыддьӧдлыны он вермы. Гаж нуӧдысьяс: Настук (София Мальцева), Ванюк (Дмитрий Лезин) да Дона гоб (Никита Мезенев) – ставныскӧд тшӧтш восьлалісны-веськавлісны ӧти мойдсянь мӧдӧ.

Y 10 2

1 места шедӧдісны 4 «б» да «в» классын велӧдчысьяс. Петкӧдлісны Соломония Пылаевалысь «Кӧк-вок, петук да руч» мойд. «Медбур роль»  нимпасын вермысьнас лои Апполинария Исупова. 2 места босьтісны 6 «б» классын велӧдчысьяс. Найӧ петкӧдлісны Геннадий Юшковлысь «Куим йӧй» мойд. Том артистъяс – Кирилл Нестеров, Влада Андреева да Айсель Халилова шедӧдісны «Медбур роль» нимпасын вермӧм. 3 места вичмис 6 «г» классын велӧдчысьяслы. Соломония Пылаевалӧн «Ош сёркни» мойд серти дасьтӧм петкӧд-чӧмысь Максим Катаевлы вичмис жӧ «Медбур роль» нимпасын вермӧм. 5 «б» классын велӧдчысьяс петкӧдлісны Иван Коданёвлысь «Коді лоас чемпионӧн» мойд да шедӧдісны «Актёрское мастерство» нимпасын вермӧм, а медбур актёрлысь ним сетісны Серафим Соболевлы. Соломония Пылаевалысь «Повзьӧдчысь шыр» мойд петкӧдлісны 6 «а» классын велӧдчысьяс да босьтісны «Медбур актёрскӧй мастерство» нимпасын вермӧм. Илья Морев вермис «Медбур роль» нимпасын. «Йӧз-костса традиция видзӧм-сӧвмӧдӧм» нимпасын вермысьнас жюри шуис 6 «в» классын велӧдчысьясӧс, кодъяс петкӧдлісны «Чукля» мойд. Дмитрий Казаковлы вичмис «Медбур роль» нимпасын вермӧм. 7 «г» классын велӧдчысьяс петкӧдлісны Соломония Пылаевалысь «Мабать» мойд да лоисны «Яркое воплощение идеи добра и справедливости» нимпасын вермысьясӧн. «Медбур роль» нимпас вичмис Дарья Панюковалы, Любовь Мирошниклы да Данил Парначёвлы. «Пера-багатыр» мойдысь вермысьясӧн шуисны 9 «в» классын велӧдчысьясӧс. Найӧ шедӧдісны «Любовь и бережное отношение к истокам народного творчества» нимпасын вермӧм. Бура жӧ петкӧдчисны 5 «к» да 7 «в» классъясын велӧдчысьяс.

Y 10 3

Мӧд луннас ворсан сямнас ордйысисны мукӧд школаысь том актёръяс. 1 места шедӧдысьясӧн лоины 11 номера велӧдчанінысь томулов, кодъяс петкӧдлісны Соломония Пылаевалысь «Сямтӧм ош»  мойд. «Медбур роль» нимпасын вермысьнас жюри шуис Юлия Краеваӧс. Зэв жӧ бура петкӧдчисны Коми национальнӧй гимназияын велӧд-чысьяс, кодъяс дасьтӧмаӧсь С.Пылаевалысь жӧ «Нерсьысь баля» мойд. Медбура ворсысьнас тані шуисны Юлиана Игушеваӧс.

Мӧд места вичмис 4 номера школаысь ворсысьяслы, кодъяс петкӧдлісны Иван Коданёвлысь «Тшакъяслӧн зык» мойд, да 18 номера школаысь том артистъяслы. Бӧръяясыс дасьтӧмаӧсь «Сямтӧм ош» мойд.

Коймӧд места шедӧдысьяснас лоины 27 номера школаысь том ворсысьяс, кодъяс петкӧдлісны Соломония Пылаевалысь «Варов лягей» мойд. Наталья Поповалы вичмис «Медбур роль» нимпасын вермӧм.

Аслыспӧлӧслуннас торъялісны 33 номера школаын велӧдчысьяс, кодъяс петкӧдлісны «Ёма да кык чой» йӧзкостса мойд. 16 номера школаын велӧдчысьяс петкӧдлісны «Кысук» йӧзкостса мойд да вермисны «Йӧзкостса традиция видзӧм да сӧвмӧдӧм» нимпасын. С.Пылаевалысь «Кӧч козин» мойдӧн петкӧдчӧмысь 1 номера школасалы вичмис «Любовь и бережное отношение к истокам народного творчества» нимпасын вермӧм. «Медбур актёрскӧй мастерство» нимпасын вермысьнас жюри шуис 81 номера школаын велӧдчысьясӧс, кодъяс петкӧдлісны Николай Щукинлысь «Кӧинӧс кокыс вердӧ» мойд. Медбур костюмъясысь торъя нимпасӧн пасйисны 8 номера да 43 номера школаясын велӧдчысьясӧс.

Ирина ЧУМАКОВА

да миян корр.

 

Добавить комментарий


наверх