Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Литература во меӧдз эз и во!

Литература во меӧдз эз и во!

Y 6

Потанын на куйлігӧн пӧль-пӧч, мам-бать тӧдмӧдӧны челядьсӧ литератураӧн: мойдӧны, ӧввӧ сьылӧны... Ичӧтсянь миянӧс велӧдӧны радейтны небӧгъяс, а найӧ велӧдӧны миянӧс овны. Оз ӧд прӧста шуны, мый литература – олӧмӧ велӧдан небӧг. Сійӧ сӧвмӧдӧ мортлысь оз сӧмын тӧлклун да кужанлун мыйкӧ вӧчны, но и пытшкӧсса озырлунсӧ. Вӧзйӧ олӧм вылӧ аслыспӧлӧс видзӧдлас, восьтӧ выль сьӧлӧмкылӧмъяс да мӧвпъяс, отсалӧ венны мытшӧдъяс да бӧрйыны веськыд туй.

Быд во канму унджык тӧждлун сетӧ ӧти йӧзкотыр юкӧнлы: том войтырлы, спортлы да с.в. 2015 во вӧлі сиӧма литературалы. Тайӧ сиӧмнас канму кӧсйис матысмӧдны литературасӧ том йӧз дінӧ да уськӧдны тӧд вылӧ, мый миян кывным мир пасьта медся мича да озыр! Та вӧсна Россия пасьта вӧлі лӧсьӧдӧма зэв уна мероприятие. Правительство кутіс лача сетны организацияяслы отсӧг, кодъяс ассьыныс олӧмсӧ йитӧмаӧсь тайӧ юкӧныскӧд.

И збыль, миян республикаын вӧлі нуӧдӧма уна колана да гажа мероприятие, коді чукӧртіс ас гӧгӧрыс уна енбиа войтырӧс, донъяліс налысь тшупӧдсӧ да сетіс позянлун сӧвмыны водзӧ.

Зэв рад, мый меным удайтчыліс сунсьывны та сяма мероприятиеясӧ, но Литература во матыстчӧ нин помлань, а уна тӧдсалы татшӧм шудыс сідз эз и во. Ме чайта, мый не сӧмын миян оланінын эз вӧв небӧгъяслы котыртӧм гажыс, но и мукӧд сикт-грездӧ эз жӧ игӧдчы Литература во, а гашкӧ, и игӧдчыліс, да эз восьтыны.

Ӧти ногӧн кӧ, дерт, кодлӧн эм интерес, аддзасны петан туй и воасны аслас кӧсйӧмӧдз, но ӧд мукӧдыслӧн абу татшӧм вермӧмыс да кӧсйӧмыс, татшӧмъяссӧ эськӧ и садьмӧдісны Литература волӧн котыртӧмъясыс, гӧгӧрвоӧдісны налы, мый литература вайӧ миянлы уна бур тӧдӧмлун да сьӧлӧмлы колана кӧрым.

Мыйла Литература во мукӧд дорӧ эз и во? Коді мыжа да мый вӧчны? Тайӧ Россиялӧн уна нэмчӧжся юалӧмъяс, кодъяс вылӧ вочавидзны абу кокни. Ме вои кык пома бедь кодь вочакыв дорӧ: ӧти-кӧ, гашкӧ, мыжаӧсь организаторъяс, кодъяс эз пыдди пуктыны вылыс тшупӧдлысь корӧмсӧ, а гашкӧ, и чина йӧз эз отсавны налы сьӧмӧн, медым лӧсьӧдны татшӧм чукӧртчӧмсӧ. Мӧд-кӧ, ме думысь, медлёкыс сійӧ, мый йӧзыс асьныс некутшӧма оз водзмӧстчыны татшӧмсяма мероприятиеас. Налы абу окота аслыныс мыйкӧ вӧчны, шыӧдчыны, вӧзйыны мӧвпъяссӧ организаторъяслы: клубса, библиотекаса, музейса уджалысьяслы либӧ чинаджык йӧзлы.

Водзӧ вылӧ мед дугдыны джӧмдасьны татшӧм мытшӧдъясӧ, колӧ ӧтувтчыны чина да прӧстӧй йӧзлы, кужны кывны ёрта-ёртнымӧс. Лоны зільджыкӧн да пыр лэптыны юрнымӧс колана чукӧртчӧмъяс лӧсьӧдӧм вылӧ. Окотапырысь юксьыны мӧвпъясӧн да кӧсйыны вежны олӧмнымӧс бурлань, не повны выльтор пыртӧмысь да став сьӧлӧмӧн радейтны Чужан мунымӧс – сэки ставыс артмас!

Катя МАТВЕЕВА, 17 арӧс, Емдін район, Семуков сикт.

 

Добавить комментарий


наверх