Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Велӧдам удмурт кыв

Велӧдам удмурт кыв

Y 13 2

Быд мортлы окота, медым чужан кывйыс да ас культураыс пыр ёнджыка сӧвмис. Татшӧм жӧ мог сувтӧдӧны ас водзас удмуртъяс. Кык водзмӧстчысь том морт – журналист Александр Бикузин да дизайнер Андрей Соловьёв – панӧмаӧсь #УчимУдмуртский уджтас.

Александр нёльӧд во зільӧ «Моя Удмуртия» телеканалын, кывкутӧ сідз шусяна контент вӧсна – пыртӧ ӧтуввезйӧ теле-радиопрограммаяс, выльторъяс, шылада клипъяс. Вежоннас ӧтуввезйын содӧ дас видеозапись гӧгӧр: тайӧ и «Иворъёс» – выльторъяс, «Свети дорын куноын» – пусян уджтас да мукӧд. Андрей Катя гӧтырыскӧд водзмӧстчӧны дизайн лӧсьӧдӧмын – дасьтӧны быдсикас афиша, логотип. Сідзжӧ том гозъя вӧчӧны быдсикас национальнӧй сувенир.

Том йӧз шуӧны, мый налӧн чужанінын удмурт кыв да культура сӧвмӧдысь уджтасыс  тырмымӧн, но кызвынсӧ на пиысь вӧзйӧма налы, кодъяс кывсӧ тӧдӧны нин. Но ӧд эм войтыр, кодъяс удмурт кыв велӧдӧмын вӧчӧны медводдза воськовъяс на – буретш налы и дасьтӧмаӧсь #УчимУдмуртский проект.

Y 13 1

#УчимУдмуртский – тайӧ тешкодь, но вежӧрӧ бура кольысь серпасъяс, кӧні ассоциация отсӧгӧн гӧгӧрвоӧдӧма кутшӧмкӧ удмурт кыв. Уджтасӧ пыртӧма сэтшӧм кывъяс, кодъяслӧн гижанногыс ӧткодь рочӧн да удмурт кывйӧн, а вежӧртасыс ёна торъялӧ. Удмурт кыв вылӧ аслыспӧлӧс видзӧдласыс ӧдйӧ воӧма войтырлы сьӧлӧм вылас.

«ВКонтактеын» котыр панӧма ассьыс уджсӧ неважӧн на – тавося апрельын, но та вылӧ видзӧдтӧг уджтас йылысь тӧдӧны унаӧн нин. Ӧні #УчимУдмуртский котырын выль кывъяс велӧдӧны матӧ 360 морт, эмӧсь нин и донъялӧмъяс.

Медводдза серпасӧн вӧлӧма «КУ» кыв, рочӧн кӧ – «когда», а гӧгӧрвоӧдана серпаснас лоӧма «Кин-дза-дза» кинофильмысь кадр. Серпас да гижӧд кындзи некутшӧм торъя мичмӧдантор абу вӧлӧма. Ӧні Андрей, кыдзи дизайнер, зільӧ сӧвмӧдны проектсӧ, медым серпасъясыс лоины ӧти стильын, мичаӧсь, синмад шыбитчанаӧсь.

Y 13 3

Удмурт кыв велӧдан серпасъяс ӧдйӧ разалӧны ӧтуввезйын. Найӧс видзӧдысь-лыддьысь войтыр асьныс нин вӧзйӧны кутшӧмсюрӧ кывъяс, кодкӧ юксьӧ Удмуртияын лоӧмторъясӧн, выльторъясӧн, шензьӧданаторъясӧн, мукӧд кывъя войтыр висьталӧны асланыс кыв йылысь.

#УчимУдмуртский сӧвмӧ, Александр корсьӧ выль аслыспӧлӧс кывъяс, Андрей дасьтӧ-лӧсьӧдӧ мича серпасъяс – олӧмыс котырын пуӧмӧн пуӧ. Неважӧн том йӧзлы вӧзйӧмаӧсь дасьтыны открытка чукӧр, коді разалас став мир пасьта.

Y 13 4

Александр и Андрей тӧдчӧдӧны, мый удмурт да коми кывъяс костын уна ӧткодьыс. Зонъяс кӧсйӧны ёртасьны и комикӧд. А, гашкӧ, и миянлы дасьтыны проект #УчимКоми?

Y 16 1

Y 16 2

Y 16 3

Y 16 5

Y 16 4

Y 16 6

 

Мария ИГУШЕВА.

Снимокъясыс Александр Бикузинлӧн да
Андрей Соловьёвлӧн гортса архивысь.

Удмурт кывйӧ велӧдан серпасъяс вӧзъям донъявны
16 лист бокысь да https://vk.com/studyudm котырысь.

 

Добавить комментарий


наверх