Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Дорйӧны биысь парма

Дорйӧны биысь парма

Y 4 1

Август 10 лунӧ Сыктывдін районса Кӧччойяг посёлокын муніс Россияса «Медбур вӧрса кусӧдчысь» конкурслӧн мӧдӧд – регионса тшупӧдын – орд-йысьӧм. Сэтчӧ пырӧдчисны республикаса кар-районысь 16 кусӧдчысь. Конкурссӧ котыртісны вӧр-ва видзан министерство да сотчӧмысь вӧр видзан Коми шӧрин.

Республикаысь медбур кусӧдчысьӧс заводитӧмаӧсь корсьны лунӧн водзджык – конкурсӧ пы-рӧдчысьяс петкӧдлӧмаӧсь теория серти тӧдӧмлунсӧ. Кыдзи тӧдчӧдіс шӧр судья Владимир Дробахин, кусӧдчысьяслы быть колӧ тӧдны техника да тактика, мыйта ва колӧ, медым вермыны би, кыдзи юкны пӧжарсӧ фронт, фланг да тыл вылӧ... Ставнас дасьтӧмаӧсь комын юалӧм. Медбур тӧдӧмлун петкӧд-лӧма Евгений Перетятко, коді кужӧма сетны кызь ӧкмыс стӧч вочакыв.

Y 4 2

Мӧдӧд тшупӧдын конкурсантъяслысь донъялӧмаӧсь вын-эбӧссӧ. Быд кусӧдчысь кад вылӧ комынысь отжимайтчӧма, сэсся шыбитӧма мыш саяс ваӧн тыр РЛО (ранцевӧй лесной огнетушитель) да котӧртӧма 100 метр кузьта дистанция. А бӧрас кӧкъямысысь кыпӧдчылӧма турник вылын. Колӧ тӧдчӧдны, мый РЛО-лӧн сьӧктаыс матӧ 20 килограмм, а сорсян кӧ, судья индӧ штрап – содтӧд секундъяс.

Y 4 3

Коймӧд – медся сьӧкыд, но сэк жӧ медся интереснӧй тшупӧдыс – мытшӧдъяс венан полоса. Тайӧ тшупӧдас кусӧдчысьяслы колӧ петкӧдлыны став кужанлун-сямсӧ. Медводз конкурсант котӧртӧ неыджыд ты дорӧ да сӧвтӧ РЛО-ӧ ва. Вӧрын сотчӧм кусӧдігӧн тайӧ уджсӧ лунтырӧн ковмывлӧ вӧчны дасысь-дас витысь. Тшӧкыда ваысла кусӧдчысьлы колӧ мунны бура ылӧдз, ӧд абу быдлаын тырмымӧн ваыс. Сӧмын огнетушитель лоӧ дась, кусӧдчысьлы колӧ венны «пӧрласьӧм пуяс» этап – мунны доровтӧм керъяс вомӧн. А сэсся кад воштытӧг ву-джны ӧти керйысь вӧчӧм пості. Нёльӧд мытшӧдыс – мыръяс. На вывті чеччалӧмыс ставныслы сетчис кокньыда. Водзӧ кусӧдчысьяслы ковмис корсьны вомӧн сулалысь керъясті туй: кыткӧ кыссьыны, мукӧдлаті – кавшасьны.

Y 5 1

Бӧръя куим тшупӧдын донъялісны буретш би кусӧдӧмын кужӧмлунсӧ. Медводз огнетушитель отсӧгӧн ковмис тыртны 1 литраа банка – кусӧдны ӧзъялысь пу. Та бӧрын заводитчис бензопилаа этап – урчитӧм инъясті пилитісны кер – дерт, эз позь вунӧдны и безопасносьт техника йылысь. Вунӧдчысьясӧс бара на мыждылісны содтӧд секундӧн. Бӧръя этапын мужичӧйяс вӧдитчисны мотопомпаӧн. Сотчанін матігӧгӧрас кӧ эм ва – тайӧ ичӧт насосыс ёна кокньӧдӧ уджтӧ. А конкурсын мотопомпа отсӧгӧн уськӧдлісны ичӧтик пес чуркаяс. Бокисянь конкурсыс чайтсис кокньыдӧн, но збыльвылас и тані ковмис аслыспӧлӧс, гуся тӧдӧмлун.

Ордйысьӧмыс муніс матӧ кык час чӧж. Ни пӧжысь шонді (а колӧ тӧдчӧдны, мый кусӧдчысьяс ордйысисны экипировкаын), ни конкурслӧн сьӧкыдлунъяс эз повзьӧдны кусӧдчысьясӧс.

Y 5 2

Коймӧд места шедӧдіс Алексей Шилов, мӧдӧдсӧ – Андрей Исаков, а вермысьӧн лои Евгений Перетятко. Республикаса медбур кусӧдчысь уджалӧ Сыктывкарса авиаотделениеын, парашютӧн сійӧ матӧ 130-ысь нин чеччыштлӧма. Конкурс вылӧ Евгений воӧма пӧжар кусӧданінсянь, кадыс муртса и вӧлӧма да та вӧсна торъя абу и дасьтысьӧма. А вермыны, Евгений Перетятколӧн кывъяс серти, отсалӧма сійӧ, мый став тайӧ кужанлун-тӧдӧмлуныс колӧ быдлунъя уджас. Сентябрь 11–16 лунъясӧ медбур кусӧдчысь кутас дорйыны республикалысь ним став Россияса конкурсын. Паськыдджыка Евгений Перетятколӧн олӧм да татшӧм колана удж йылысь лыддьӧй локтан номерын.

Y 5 3

Мария ИГУШЕВА.

Снимокъясыс авторлӧн.

 

Добавить комментарий


наверх