Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Лэбалысь кусӧдчысь

Лэбалысь кусӧдчысь

Y 4 1

«Йӧлӧгалӧн» воддза номерын гижлім «Медбур вӧрса кусӧдчысь» конкурс йылысь. А талун вӧзъям матӧджык тӧдмасьны сэні вермыськӧд. Евгений Перетятко юксьӧ газет лыддьысьяскӧд удж да олӧм йылысь мӧвпъясӧн.

Евгений чужлӧма Сыктывкарын, тані жӧ помавлӧма шӧр школа. Кор воӧма кад бӧрйыны олӧмас туй, Женялӧн вӧлӧма кык мӧвп: ӧти-кӧ, зон окотитӧма велӧдчыны вылыс тшупӧда велӧдчанінын, а мӧд-кӧ, мунны армияӧ. Вузӧ пыран экзамен сдайтӧм бӧрын институтын бюджет местаыс Евгенийлы абу вичмӧма, и, сідзкӧ, том мортӧс виччысис армия.

Евгений школасянь нин вер-мӧма ошйысьны крепыд дзоньвидзалунӧн да мужичӧйлӧн этшӧн, гашкӧ, та вӧсна и веськалӧма ВДВ-ӧ. Кык вося служба бӧрын Евгений кольччӧма армияӧ нӧшта ӧти во кежлӧ – контрактникӧн. Десантникӧн служитігӧн Евгений дас нёльысь чеччыштлӧма парашютӧн, но медводдза чеччыштӧмыс век кежлӧ кольӧма и вежӧрас, и сьӧлӧмас.

Y 4 2

–Медводдзаысь чеччыштӧм водзын юрын бергаліс вывті уна мӧвп, вӧлі тшӧтш и полӧм... Тӧдан эськӧ, мый нелючки оз ло безопасносьт боксянь – парашют вӧчӧма колана ногӧн, но мортыд морт и эм – сьӧлӧмкылӧмыд вермӧ,– висьталӧ сійӧ.– Медводдзаысь чеччыштігӧн медшӧрыс – вӧчны самолётысь воськов, да гӧгӧрвоны, мый парашютыд воссис. Тайӧ здукас, кор юр весьтад воссьӧ купол, ставыс сувтӧ ас инас, полӧм пыдди чужӧ шуд, вунлӧ быдлунъя тӧжд-могыд. А сӧмын сувтан кокнад муӧ – чеччавтӧгыс овны он нин вермы.

Служба помасьӧ, и Евгений бӧр воӧ чужанінас. Кӧсйӧмсӧ – велӧдчыны институтын – дзик пыр и збыльмӧдӧма. Локтан воӧ Евгений помалӧ Сыктывкарса вӧр институт, туй стрӧитысь специалистӧн лоас. Велӧдчӧм кындзи Женя заводитӧма уджавны. Армияын босьтӧм тӧдӧмлуныс ковмӧма сотчӧмысь вӧр видзан Коми шӧринын, кӧні тӧрытъя десантник лоӧма парашютист-кусӧдчысьӧн. Вит воӧн мужичӧйлӧн мыш сайын чукӧрмӧма парашютӧн 133 чеччыштӧм.

Y 5 1

Ӧні Евгений Перетятко лыд-дьыссьӧ инструкторӧн. Сылӧн могъяс лыдын – не сӧмын кусӧд-ны вӧрса пӧжар колана ногӧн (та серти эм уна индӧд да формула, коді отсалӧ вермыны би), но и енэжсянь на индыны пӧжарлы сикас, лыддьыны сотчанінлысь ыдждасӧ. Инструктор юрнуӧдӧ аслас 4-5 морта котырӧн, кывкутӧ безопасносьт техника вӧсна.

–Миян уджным сьӧкыд да вель кывкутана. Парашют дасьтігӧн ме тшӧкыда видлала ёртъяслысь уджсӧ, кыдзи найӧ чукӧртӧмаӧсь парашютсӧ, а мӧд инструктор – донъялӧ менсьым уджӧс,– висьталӧ Евгений.– Ас костын шмонитам: кодӧскӧ удж вылӧ вайӧ автобус, машина, ыджыд каръясын – метро, а миянӧс – самолёт да парашют.

Евгенийӧс да сылысь ёртъяссӧ «шыбитӧны» кусӧдны ылі пӧжаръяс, кытчӧ позьӧ воӧдчыны сӧмын енэжті. Накӧд ӧттшӧтш самолётсянь лэччӧны и быдсикас техника, сёян-юан да палаткаяс. Васӧдінын мужичӧйяс паськӧдӧны оланін да панӧны удж. Биысь вӧр дорйӧм – аслыспӧлӧс наука. Евгенийлы колӧ водзвыв артавны, гӧгӧрвоны, кытчӧ мунас биыс, да сувтны сылы паныд.

–Бинад оз позь веськӧдлыны, сійӧ ӧдйӧ паськалӧ, вуштӧ-чышкӧ ставсӧ, мый паныдасяс,– шуӧ сійӧ.– Но и сійӧс позьӧ вермыны, сӧмын колӧ вӧчны уджсӧ колана ног – тупкыны билы туйсӧ, та могысь кусӧдчысьяс вӧчӧны лыа канаваяс. Мукӧддырйи чайтан, мый пӧжарыс сетчис нин, а сэсся другӧн казялан, кыдзи муысь, быттьӧ гаг, петӧ ичӧтик би...

Y 5 2

Кусӧдчысьяслӧн медуна уджыс майсянь октябрӧдз – тайӧ сідз шусяна пожароопаснӧй кад. Тайӧ тӧлысьясӧ кусӧдчысьлӧн быд здук дась торъя ноп. Сэні и вежсян кӧлуй, сёян, быдсикас колана инструмент. «Пӧсь кадӧ» кусӧдчысьяслӧн котыр лоӧ аслыспӧлӧс семьяӧн, а инструкторӧс позьӧ шуны и психологӧн, мортӧн, коді тайӧ семья вӧснаыс кывкутӧ.

Пӧжарнӧйяс оз весьшӧрӧ овны и тӧлын. Кыдз тӧдчӧдӧ Евгений, быд уджын эм кытчӧ сӧвмыны. Кусӧдчысьяс лыддьӧны колана небӧгъяс, ветлӧдлӧны тренировка вылӧ, сӧвмӧдӧны кужанлун-сямнысӧ. Тӧлысьнас некымынысь разьлӧны-паськӧдлӧны парашютсӧ. А нӧшта некымынысь чеччыштлӧны парашютӧн. Ок, и мичаа тайӧ видзӧдсьӧ – еджыд лымъя му весьтын уна рӧма купол.

А тулыснас бара – ӧти луннас нёль-вит чеччыштӧмӧдз – гожӧмӧдз колӧ пальӧдны вежӧрын кужанлунтӧ, петкӧдлыны, мый тэ бара на дась уджавны...

Мария ИГУШЕВА.

Снимокъясыс Е. Перетятколӧн гортса архивысь.

 

Добавить комментарий


наверх