Ноябрь 25–26 лунъясӧ Сыктывкарын муніс «Шойччам Комиын» республикаса выставка-ярманга. Кыдзи шойччыны чужанінын, кӧні коллявны выльвося лунъяс? Чери кыйны, вӧравны, сиктӧ ветлыны, хаски понъясӧн исласьны, байдаркаӧн кывтны – татшӧм шойччӧмыс, торйӧн нин карса войтырлы, дыр кежлӧ вежӧрас коляс.

Выставка-ярмангасӧ чолӧмалана кывъясӧн восьтіс культура, туризм да архивын удж министерствоӧн веськӧдлысь Сергей Емельянов. «Выставкалӧн мог – ӧтувтны туризмын уджалысьясӧс, сетны позянлун водзмӧстчысь йӧзлы сӧвмыны водзӧ, тӧдмасьны ӧта-мӧдыскӧд, дасьтыны ӧтувъя ыджыд проектъяс. Окота, мед войтыр тӧдісны чужан мусӧ, ветлывлісны республикалӧн уна шемӧсмӧданаинӧ»,– тӧдчӧдіс сійӧ. Нӧшта министр пасйис, мый Комиын туризм нырвизьыс ёна вежсяс матысса кадӧ: выльторъяс пыртасны этнокультура парклӧн, шойччан керкаяслӧн уджӧ да отрасльӧ ставнас.

Коми Республикалӧн эм бур подув, медым сӧвмӧдны пытшкӧсса туризм. «Парма» вузасян да шойччан шӧринын паськӧдчыліс кар-районъяслӧн да шойччӧг дасьтысь котыръяслӧн выставка-ярманга. Стендъяс вылын быдӧн зілис петкӧдлыны медся мича, аслыспӧлӧс инъяссӧ. Гожся да тӧвся маршрутъяс, коми оласног да традиция подулын дасьтӧм
уджтасъяс, спорт да активнӧй туризм – уна кар-районын нуӧдӧны-сӧвмӧдӧны тайӧ уджсӧ.

Гӧсьтъяс окотапырысь чӧсмасисны пӧжасӧн да туруна чайӧн, ньӧбалісны быдсикас сувенир да видзӧг, пыралісны чумӧ да вӧр керкаӧ. Ӧні Комиын сӧвмӧны сиктса, спортӧ ышӧдан, вӧр-ва видзан да Енлы эскысьяслӧн туризм.

Ярманга дырйи позис унджык тӧдмавны татшӧм нималана инъяс йылысь, кыдзи «Югыд ва» национальнӧй парк, «Бызовая» да финн-йӧгра этнопарк. Сэні жӧ орччӧн ас йывсьыныс висьталісны и ичӧтджык котыръяс. Со Удораса Сёльыбын, вӧлӧмкӧ, позьӧ бергӧдчывны важся комияслӧн олӧмӧ: овны сиктса керкаын, вӧравны, пывсьыны – ставсӧ уна нэм сайын моз.

Тӧдчанаӧн артмис и нималана путешественник Евгений Рыбинкӧд аддзысьлӧм. Том мужичӧй некымын во нин ветлӧ Россияті да суйӧрсайса странаясті велосипедӧн. Кык гӧгыля ёртыскӧд вӧвлӧма Индияын, Азияса уна мукӧд муын, Америкаын... А Сыктывкарын «Велопрогулки» уджтас збыльмӧдысь томулов кӧть Америкаӧдз эз на воны, но тшӧкыда чукӧртчывлӧны да ыджыд гажа котырӧн ветлывлӧны юркарбердса сиктъясӧ.

Выставка дырйи быд окотитысь вермис ворсны, донъявны сьылысь-йӧктысь котыръяслысь петкӧдчӧмсӧ, пырӧдчыны мастер-классъясӧ: вӧчны видзӧг либӧ серпасавны пу чача. Ярманга котыртысьяс дасьтӧмаӧсь тшӧтш лотерея, и медшудаяслы вичмисны дона козинъяс.

Сідзжӧ кык лун чӧж нуӧдісны быдсикас тӧжд-мог йылысь «гӧгрӧс пызан» сайын сёрни,
уджаліс и «Синематур» киноплощадка.

Мария ИГУШЕВА.

Снимокъясыс авторлӧн.