Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Александра Мишариналӧн кок туйӧд

Александра Мишариналӧн кок туйӧд

Y 1

Ыджыдвиддзын, буракӧ, сынӧдыс аслыспӧлӧс. Паськыд видзьяс вылын быдмӧм-сӧвмӧм войтыр пиысь унаӧн нималӧны республика да канму пасьта. Найӧс  ті, лыддьысьысьяс, дерт жӧ, бура тӧданныд. Сцена вылын уна во нин мичаа сьылӧ Михаил Бурдин, коркӧ шмонь, а коркӧ зэв джуджыд мӧвпа гижӧдъяс петӧны Алексей Попов перӧ улысь, а Печать керкаын зільысь журналистъясӧс лыддьӧдлыны чуньыд, чайта, оз тырмы. Уна бур да тӧлка йӧзлы чужаніннас лои гажа Ыджыдвидз сикт. А мӧдаръюгыдас кымын мунӧмалысь нимсӧ позьӧ казьтыштны? На пиын и медводдза кывбур гижысь-ань Александра Мишарина.

Александра Петровнаӧс ыджыдвидзса век казьтылӧны бур ногӧн, пыдди пуктӧмӧн. Поэтесса некор эз пукты асьсӧ сиктса йӧзысь вылӧджык, кӧть и уна во оліс карын да тшӧт вылас вӧлі уна кывбура небӧг. Мӧдарӧ, ыджыдвидзсалы ас мортӧн сійӧ вӧлі. Ань век чолӧмасис, радпырысь воліс школаӧ челядькӧд аддзысьлыны, ёртасис ас арлыда йӧзкӧд.

Урокъяс дырйи гижысь медъёна вӧлі радейтӧ кывзыны челядьӧс, налысь кывбур лыддьӧмсӧ. Ачыс эз уна сёрнит, но коліс кӧ висьтасьны челядь водзын, век сёрнитіс накӧд лабутнӧя, меліа, быд пӧрйӧ кыліс зонпоснисӧ сылӧн помтӧг радейтӧмыс. Эз ӧд прӧста поэтесса гижлы кывбурас:

Сиктса челядь котырӧй,

Пармаса ныв-пиянӧй,

Видзвывса яр дзоридзьяс,

Радейта ме тіянӧс.

Александра Мишариналӧн енбиыс тыдовтчӧ сылӧн гижӧдъясас. Найӧ зэв кыпыдӧсь, югыдӧсь, тырӧмаӧсь вӧр-ва да коми йӧз дінӧ муслунӧн. Найӧ шонтӧны лыддьысьысьлысь лов. И найӧс  век окота  лыддьыны.

Коми кыв да литература урокъяс вылын челядь радпырысь тӧдмасьӧны Александра Мишариналӧн кывбуръясӧн, нӧшта, гашкӧ, и сы понда, мый наын кылӧ чужаніныслӧн руыс.

Y 2

Ӧшым 19-ӧд лунӧ тырӧ 70 во Александра Мишариналӧн чужан лунсяньыс. Дерт жӧ, ми челядькӧд ӧтвылысь шуим пасйыны тайӧ лунсӧ зэв кыпыда, кыдз и век вӧвлі гижысьлӧн олігас. Да мед эз сӧмын ӧти лун ло казьтылӧма поэтессаӧс, а дыр кад чӧж. Та могысь ми дасьтім «Александра Мишариналӧн кок туйӧд» уджтас. Велӧдчысьяс зэв азыма босьтчисны уджӧ, медводз мед дасьтыны уджтаслысь бала, а бӧрас – кывкутӧмӧн уджавны  сійӧс збыльмӧдігӧн.

Медыджыд воськовъяснас лоины районса тшупӧдын дасьтӧм Александра Мишариналысь кывбуръяс мичаа лыддьӧм кузя конкурс да лыддьысьысьяслӧн конференция – сійӧс тшӧтш жӧ сиӧма гижысьлӧн творчестволы. Челядь зэв бура петкӧдчисны кывбур лыддьӧмын, зэв сьӧлӧмсяньыс лыддисны Коми мулы сиӧм кывбуръяс. Ӧні дасьтысям конференция кежлӧ. Велӧдчысьяс вӧчӧны гижысь-юбиляръяс творчестволы сиӧм туялана уджъяс, кодӧн и воасны Ыджыдвиддзӧ.

Та кындзи Кӧрткерӧс районса школаясын вӧчалісны поэтессалӧн гижӧдъяс серти серпасъяс, лӧсьӧдісны гижысьлы сиӧм выставкаяс. Коми кывйысь быд урок дырйи вичмӧдлісны 5 минут, медым челядь выль пӧв да выль ног видзӧдлісны Александра Мишариналӧн олӧм да творчество вылӧ. А медшӧрыс – ныв-зон асьныс гижисны выль кывбуръяс. Сідзкӧ, збыльвылӧ мӧдӧдчисны Александра Мишариналӧн кок туйӧд. Огӧ на вермӧй шуны, лоас-ӧ кодкӧ на пиысь гижысьӧн, но мый коми кыв дінӧ муслуныс налӧн вирас йиджис – та йылысь позьӧ стӧча нин висьтавны!

Уджтас серти кывкӧртӧдъяс ті тӧдмаланныд «Йӧлӧга» газетлӧн тайӧ номерын. Асланыс сьӧлӧмкылӧмъясӧн, мӧвпъясӧн, выль гижӧдъясӧн, серпасъясӧн ныв-зон юксьӧны тіянкӧд газет лист бокъясын. Та кындзи, петасысь ті аддзанныд А.П. Мишариналӧн «Нывкаяслы» кывбур серти Э.А. Старцеваӧн дасьтӧм урок. Мед эськӧ став тайӧ гижӧдыс чужтасны тіян сьӧлӧмын шоныд ловкылӧм да тшӧктасны казьтыштны енбиа коми аньлысь гижӧдъяссӧ.

Ыджыд аттьӧ висьталам Коми Республикаса гижысь котырлы, национальнӧй политика министерстволы да Сергей Иванович Габовлы конкурсъясӧ пырӧдчысь челядьӧс небӧг-козинӧн могмӧдӧмысь, «Йӧлӧга» газет редакциялы – йӧзӧдчыны позянлунысь, Кӧрткерӧс районса велӧдысьяслы да велӧдчысьяслы – азыма уджӧ пырӧдчӧмысь, Ыджыдвидзса юралысь Николай Иванович Симпелевлы А.П. Мишариналы гу вылас дзоридзьяс ньӧбӧмысь.

Виччысям ставнытӧ – коми кыв радейтысьясӧс да Александра Мишариналысь творчество пыдди пуктысьясӧс – гажа Ыджыдвиддзӧ ӧшым тӧлысь 19-ӧд лунӧ. Ми ӧтвылысь ветлам поэтессалӧн гу вылӧ, тӧдмасям Александра Мишариналы сиӧм выставкаӧн да кывзам коми гижысьяс творчестволы сиӧм висьтасьӧмъяс.

Видза корам!

Пыдди пуктӧмӧн, «Шондібан»  этноклубӧ  ветлысьяс

да Эльвира СТАРЦЕВА. Ыджыдвидз сикт.

 

Добавить комментарий


наверх