Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Восьлала аслам ордымӧд

Восьлала аслам ордымӧд

Y 10 1

«Йӧлӧга» газетын ми гижлім нин Ангелина Шахова йылысь, коді ӧні велӧдчӧ Б.Щукин нима театр институтын. Талун тӧдмӧдам сылӧн ёрт, а сідзжӧ и ӧтлаын велӧдчысь Валериан Каневкӧд. Том морт пыр окотитӧма гӧгӧрвоны актёр профессиялысь аслыспӧлӧслунсӧ. Талун ассьыс кӧсйӧмсӧ сійӧ пӧртӧ олӧмӧ.

Школаын

Валериан Канев чужлӧма Изьва районса Щельяюр посёлокын, помавлӧма сэтчӧс 1-ӧд номера школа. Сизимӧд классас велӧдчигӧн нин мӧвпалӧма актёрлӧн профессия йылысь. И кор юасьлӧмаӧсь ныв-зонлысь, кодӧн пӧ кӧсъянныд лоны, ыджыд шыпасъясӧн гижлӧма – актёрӧн. Дерт, сэки зонка мӧвпыштлыны весиг абу вермӧма, мый тайӧ уджас ковмас ёна велӧдчыны, уна вын пуктыны, унаторйын асьтӧ вежны. Сэки, школаӧ ветлігас на, ставыс тайӧ вӧтын кодь вӧлӧма. Ӧд син водзас сулаліс шӧр рольын ворсысь Валериан.  

Зонка некор абу ӧтдортчылӧма школаса рытпукъяс дырйи петкӧдчӧмъясын ворсны, петавлӧма сиктса культура керкалӧн сцена вылӧ – ставыс тайӧ ёна волӧма сьӧлӧм вылас. Асьсӧ сӧмын искусствоын и аддзӧма, мӧвпалӧма велӧдчыны театр институтын, весиг аддзӧма асьсӧ институтын велӧдчысьӧн нин да и вузлӧн сайт вылас тшӧкыда пыравлывлӧма. Татшӧмсяма дум-кӧсйӧмнас юксьӧма мамыскӧд, и сійӧ гӧгӧрвоӧма писӧ.

Y 10 2

Театрын!

Кор Коми Республикаса шылада-драмаа театрын корсьӧмаӧсь енбиа том войтырӧс, медым мӧдӧдны велӧдчыны институтӧ, Валериан тшӧтш видлӧма ассьыс вынсӧ. И со ӧні сійӧ Б.Щукин нима театр институтса студент.

Ыджыд аттьӧ висьталӧ театрӧн художествоа веськӧдлысь Светлана Гениевна Горчаковалы, а сідзжӧ Б.Щукин нима институтын велӧдысьяс Владимир Сажинлы да Валерий Маркинлы, мый сетӧмаӧсь позянлун веськавны студентъяс лыдӧ да унаторйӧ велӧдчыны. Таысь кындзи том морт пуктӧ ас водзас мог лоны видзӧдысьыслы гӧгӧрвоанаӧн. Медым пӧ эськӧ ворсігӧн менсьым сьӧлӧмкылӧмъясӧс кылісны йӧзыс, медым пӧ ме эг ворс быттьӧ, а збыльвылӧ олі сцена вылас.

Унаторйӧ на том морт окотитӧ велӧдчыны енбиа актёръяслысь. Лыддьӧдлыны кӧ пӧ, газет лист бокыс оз тырмы. А медшӧрыс, мыйӧ велалӧма нин Валериан, кывзыны да аддзыны ворсысь ёртсӧ. Ӧд петкӧдчӧмад пӧ орӧдчыны оз позь. Ворсны заводитысьяслы медся сьӧкыдыс збыльвылӧ кужны радлыны, бӧрдны, серавны, радейтны, и медым тайӧ сьӧлӧмкылӧмъясыс йиджисны видзӧдысьлӧн сьӧлӧмӧдз. Но та вылӧ пӧ ми и велӧдчам.

Валериан Канев петкӧдчӧма нин А.Островскийлӧн «Поздняя любовь» пьесаын – олӧма адвокат Маргаритовӧн; К.Жаковлӧн «Биармияын» – Оксор царӧн; А.Чеховлӧн «Каштанкаын» – каньӧн.

Бӧркыв пыдди

Москваса театр институтын велӧдчӧм бӧрас Валериан кӧсйӧ локны уджавны Светлана Гениевна Горчакова дорӧ. Вужвойтырлӧн шылада-драмаа театрын пӧ ме верма тыр-бура восьтыны апыштӧм став кужӧмлунӧс. Том йӧзлы сійӧ вӧзйӧ збыльысь аддзыны ассьыс ордымсӧ. Медым пӧ ті вӧлінныд шудаӧсь, колӧ лоны шаньӧн да кывны мукӧдӧс. А ме пӧ аддзи нин ассьым туйвизьӧс, и ӧні вӧча ставсӧ, медым актёрлӧн профессияын лоны ас мортӧн.

 

ЛЫДДЬЫНЫ ВОДЗ?...

Надежда ПУНЕГОВА.

Снимокъясыс Валериан Каневлӧн гортса архивысь.

 

Добавить комментарий


наверх