Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Кывны асьтӧ ёнджыкӧн

Кывны асьтӧ ёнджыкӧн

Y 4 1

Водзӧ тӧдмӧдам «Йӧлӧгаса» лыддьысьысьясӧс Коми Республикаса волонтёръяслӧн котыръясын зільысьяскӧд. Талун асланыс удж йылысь висьталӧны Удора районса Кослан сиктысь «Мы» котырса ныв-зон да наӧн веськӧдлысь Надежда Николаевна Вурдова.

2011 воӧ Косланын содтӧд тӧдӧмлун сетан шӧринын «Волонтёръяс» программа подулын ассьыс удж панӧма «Мы» котыр. Надежда Николаевналӧн борд улын выль тӧдӧмлун босьтӧны 5-11 классъясын велӧдчысь войтыр.

–Таво миян котырӧ ветлӧ 22 ныв-зон, челядь велӧдчӧны нуӧдны быдсикас акция, тшӧкыда пырӧдчӧны да асьныс дасьтӧны социальнӧй уджтасъяс. Сиктса
томулов – зэв водзмӧстчысьӧсь. Долыд, мый ыджыд каръясӧ велӧдчыны мунӧм бӧрын вӧвлӧм велӧдчысьяс и водзӧ нуӧдӧны доброволечьяслысь удж да кутӧны сиктса котыркӧд топыд йитӧд,– висьталӧ Надежда Вурдова.– Санкт-Петербургса университетын велӧдчӧ Таисия Ванюта, сійӧ ёна радейтӧ пемӧсъясӧс да зільӧ отсавны приютӧ веськалӧм кань-понлы. Вокыс, Александр Ванюта, велӧдчӧ Улыс Новгородса экономикалӧн вылыс тшупӧда школаын да тшӧтш пӧртӧ олӧмӧ социальнӧй уджтасъяс. Анастасия Долгина босьтӧ тӧдӧмлун Сыктывкарса университетын да зільӧ волонтёръяслӧн «От сердца к сердцу» котырын, Валерия Бушенева юркарын жӧ велӧдчӧ да водзмӧстчӧ «Ветер перемен» отрядын. Торйӧн окота висьтавны Даниил Никитин йылысь. Зон велӧдчӧ Ухтаса кӧрт туй техникумын, а прӧст кадӧ ышӧдӧ томуловӧс видзны дзоньвидзалун, пырӧдчыны спортӧ, эновтны курыд юантор да куритчӧм... аслас кывбуръясӧн да сьыланкывъясӧн. А каникул дырйи студентъяс юксьӧны асланыс тӧдӧмлунӧн, кужанлун-сямнас ичӧт ёртъясыскӧд – ӧтув пырӧдчӧны быдсикас акцияӧ, форумӧ да слётӧ.

Y 4 2

Косланысь «Мы» котыр пырӧ Удораса челядьлӧн ӧтмунӧмӧ, та вӧсна ныв-зон водзмӧстчӧны оз сӧмын асланыс сиктын, но и районын, а нӧшта пырӧдчӧны и став Россия пасьтала мунысь акцияясӧ. «Волонтёры» уджтасын ыджыд пай сиӧма Айму вӧсна Ыджыд тыш йылысь тӧдӧмлун паськӧдӧмлы. И косланса тшӧтш пырӧдчӧны «Волонтёры Победы» водзмӧстчӧмӧ. Велӧдчысьяс дасьтӧны да нуӧдӧны томуловлы квестъяс: «Блокада Ленинграда», «Битва за Севастополь», «Битва за Москву» да мукӧд. Россияса мукӧд ныв-зонкӧд пырӧдчӧны «Георгиевская ленточка», «Бессмертный полк», «День неизвестного солдата», «День Героев
Отечества» акцияясӧ. Нӧшта «Мы» котыр босьтчис видзны-дӧзьӧритны Айму вӧсна Ыджыд тышын усьӧмаяслы обелиск.

Косланса томулов пӧртӧны олӧмӧ и социальнӧй уджтасъяс, тайӧ: «Мы против нецензурной брани», «От сердца к сердцу», «Память в орденах», «Обелиск» да мукӧд.

Верстьӧлӧн ыджыд мог – быдтыны кагаысь шань, ыджыд сьӧлӧма мортӧс, коді эськӧ колана здукӧ отсаліс неминучаӧ веськалӧмалы.

–Ми зілям сӧвмӧдны челядьӧс нравственносьт, морттуй боксянь,– висьталӧ Надежда Вурдова.– Велӧдчысьяскӧд ӧтув отсалам ветеранъяслы гортгӧгӧрса уджын, волывлам пӧрысьяслӧн керкаӧ, гажӧдам ӧтка пӧль-пӧчӧс. Аддзысьлӧны ныв-зон и тшӧтшъяяскӧд – нуӧдӧны акцияяс, районса больничаын бурдӧдчысь посниуловлы дасьтӧны выльвося козинъяс, ветлывлӧны Усогорск посёлокӧ челядьлӧн реабилитация шӧринӧ. Быд во Косланын вермытӧмаяслӧн лунӧ челядь нуӧдӧны коррекция школаын велӧдчысьяскӧд «Возьмёмся за руки, друзья» акция.

Y 5 1

Дерт, и дзоньвидзалун видзан да сӧвмӧдан удж оз коль бокӧ – кыдзи кутны асьтӧ туй вылын, видзчысьны юр дурмӧданторйысь. Тӧдмӧдӧны и дзоньвидза оласногӧ кутчысьӧмӧн.

«Ми» котыр нималӧ нин республикаын. «Доброволец РК» конкурсса «Социальнӧй волонтёрство» нырвизьын косланса босьтӧмаӧсь финалистлысь диплом. А Саша Ванюта лоӧма «Волонтёрство 70-летия Победы» нимпасын вермысьӧн: сэки 11-ӧд классын на велӧдчысь кужӧмӧн дорйӧма «Память в орденах» проект.

«Мы» котырысь ныв-зон нимӧдӧны чужанінсӧ и ыджыд аддзысьлӧмъяс дырйи. Со «Карта добра» став Россияса форум вылын Валерия Бушеневалысь «Краски добра» уджтассӧ шуӧмаӧсь медбурӧн, нӧшта ныв шедӧдӧма мӧдӧд тшупӧда диплом «Команда 11» республикаса конкурсын.

А дзик на неважӧн Дарья Веткина петкӧдчӧма «Внуки Победы» форумын да бара на вайӧма чужан сиктас вермӧм.

Александр Ванюта йылысь гижӧдын некымынысь нин казьтыштім. Ӧні зонка велӧдчӧ вузын, но волонтёрствоын медводдза воськовсӧ вӧчӧма буретш «Мы» котырын, сэні жӧ шедӧдӧма медводдза ыджыд вермӧмъяс, гӧгӧрвоӧма доброволечлӧн уджлысь тӧдчанлунсӧ.

Y 5 2

–«Мы» котырлы квайтӧд во нин – и квайтнан восӧ ме пырӧдчи сылӧн уджӧ. Тайӧ кадколастӧ ёртъяскӧд дасьтім лыдтӧм-тшӧттӧм акция. Век пуктывлім уна вын, зілим вӧчны ставсӧ колана ног, зумыда. Вежӧрӧ колис куритчӧмысь эновтчыны ышӧдан акция. Артмис сійӧ зэв аслыспӧлӧсӧн: синмад шыбитчана костюмъяс, бутафория (ставсӧ асьным вӧчим) кажитчисны сиктса олысьяслы, та вӧсна и акцияӧ пырӧдчысьлӧн лыдыс вӧлі уна,– висьталӧ Александр. – Сідзжӧ ыджыд да колана уджтасъясысь верма торйӧдны «Память в орденах» проект. Мукӧд волонтёръяскӧд ӧтвылысь корсим Айму вӧсна Ыджыд тышын вӧвлӧм салдатъяслӧн медальяс йылысь юӧръяс. Бӧрти тайӧ юӧръяс сертиыс дасьтім гижӧдъяс, да козьналім салдатъяслӧн рӧдвужлы.

Волонтёрлӧн удж меным сьӧлӧм серти, сійӧ сетӧ позянлун аддзысьлыны выль йӧзкӧд, паськыдджыка тӧдмасьны олӧмнас, мирнас. Волонтёр ичӧтсянь нин паныдасьӧ быдлунъя олӧмысь тырмытӧмторъясӧн да велӧдчӧ венны найӧс. Доброволечлӧн удж – тайӧ аслыспӧлӧс ордйысьӧм, аскӧд ордйысьӧм: сямман-ӧ венны мытшӧдъяс, тырмас-ӧ вын-эбӧсыд. Быд удж бӧрын ме кыла ачымӧс ёнджыкӧн, кывкутысьӧн. И нӧшта, волонтёръяс – котырын уджалысьяс, и буретш тайӧ медыджыд гусяторйыс, мый отсалӧ мортлы аддзыны олӧмын ассьыс ин.

Мария ИГУШЕВА.

Снимокъясыс «Мы» котырлӧн.

 

ЛЫДДЬЫНЫ ВОДЗӦ...

 

Добавить комментарий


наверх