Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Аскиа луныс – 3D принтер сайын!

 Y 12 1

Радейта ассьым уджӧс сы понда, мый эм позянлун уна йӧзкӧд тӧдмасьны. И со неважӧн тӧдмаси Ирина Балинакӧд. Збыльысь шуа, шензьӧдіс сійӧ менӧ. Тайӧ том мортыс – 3D моделингын мастер. Коді сійӧ сэтшӧмыс да мый вӧчӧ, видла гӧгӧрвоӧдны.

Тайӧ мастерыс компьютерын торъя программа отсӧгӧн серпасалӧ коланатор, шуам, кодлыськӧ бюст, машиналысь кутшӧмкӧ юкӧн либӧ киносериалысь торъя геройлысь чужӧм-мыгӧрсӧ. Сэсся видзӧдалӧ сійӧс 3D проекцияын, ставсӧ колана ногӧн арталӧ, весиг быд чукыр колӧ аддзыны да коланаинӧ пуктыны. Колӧ лоны и вывті стӧчӧн. Ыджыдӧн кӧ артмӧ коланаторйыс да оз тӧр дзик пыр мониторӧ – юклӧ некымын ичӧтджык юкӧн вылӧ, сы бӧрын быдӧн вылын торйӧн уджалӧ. Сэсся кыдзи и прӧстӧй принтер вылын, лэдзӧ сійӧс пластикысь 3D принтерӧн, бура косьтӧ. И медбӧрын скульптор моз нин гӧгӧрбок шыльӧдӧ-мольӧдӧ, ковтӧмсӧ идралӧ, вӧчӧ чукыръяс да колӧ кӧ, краситӧ-мавтӧ, мичаммӧдӧ. И нӧшта на мый менӧ медся ёна шензьӧдіс, Ирина Балина ачыс, аслас киясӧн чукӧртӧма уджалан 3D принтерсӧ. Ӧні сы вылын и печатайтӧ ассьыс уджъяссӧ.

Y 12 2

Гашкӧ, кодкӧ шуас на, мый компьютерӧн уджавнытӧ кокньыд, эм кӧ колана программа. Збыльвылас, и программатӧ на колӧ тӧдны сэтшӧм бура, медым 3D принтер вӧчис-лэдзис сійӧс, мый колӧ. Дзик стӧча колӧ кужны моделируйтны, медым некутшӧм вешйыштӧм эз ло. Лоас кӧ весиг ичӧтсьыс-ичӧт тырмытӧмтор, уна лун да уна кад воштӧм бӧрын уджтӧ позьӧ шыбитны урнаӧ, сійӧ лоӧ туйтӧмӧн, ковтӧмӧн.

– Пукалі челядькӧд гортын, – заводитіс висьтавны ассьыс олӧмсӧ Ирина, том мам. – И быдлунъя олӧмыс, ӧтиторйыс сэтшӧма дышӧдіс. Окота вӧлі мыйӧкӧ босьтчыны, дзик выльторйӧ, медым лолӧс личӧдыштны. Эг тӧд, мый меным колӧ, корси ачымӧс, ӧтуввезті «келалі». И ӧтчыд аддзи статья, кӧні вӧлі гижӧма 3D моделинг йылысь. Медводз лыдди шензьӧмсорӧн, збыльтор-ӧ гижӧны, сэсся окота лои аслым видлыны, а сэсся нин телепит босьтіс, кыдзи менам да мыйкӧ оз артмы?!

Y 12 3

Нёль во сайын 3D принтеръяс абу на вӧлі ёна паськалӧмаӧсь. Да и ӧні на Сыктывкарын та йылысь юӧртӧ он тшӧкыда кыв. Ме тай эг на кывлы-а, кытчӧдз ачым ас синмӧн эг аддзыв. Медся ёна менӧ шензьӧдіс ачыс Иринаыс. Некор эг чайтлы, мый том ань вермас водзмӧстчыны мужичӧйяслӧн нырвизьті. Сэсся ӧд некор на татшӧмторъяс сійӧ абу пырӧдчылӧма: абу тӧдлӧма программаяс, абу кывлӧма и моделируйтӧм да нӧшта на 3D принтерӧн печатайтӧм йылысь.

Ӧзйӧма кӧ, и вӧчӧма. Татшӧм нин, Ириналӧн кывъяс серти, сылӧн характерыс. Кыдзи и пыр овлӧ, пырысьтӧм-пыр ставыс оз артмы ни оз ладмы. Но кӧсйӧмыс вӧлӧма вывті ыджыдӧн! Заводитӧма велӧдчӧмсянь. Да-да. Буретш ӧтуввезйысь жӧ босьтӧма медводдза тӧдӧмлун: корсьӧма да велӧдӧма программаяс, видлӧма гӧгӧрвоны схемаяс, мыйкӧ вӧчӧма да кыдзи и пырджык овлӧ ставыс дудӧма гӧгӧрвотӧмысла. Уна жӧ и синва кисьтӧма. Сэсся ӧтуввез пыр корсьӧма ӧткодя мӧвпалысьясӧс, тӧдмасьӧма инженеръяскӧд, быдторсӧ налысь юасьӧма. Гижнытӧ ӧдйӧ, а збыльвылас матӧ во том мортлӧн кольӧма, медым мыйкӧ да заводитӧма артмыны. И ӧні пӧ сувтнысӧ ог нин вермы, пыр мыйкӧ выльтор окота тӧдмавны, сӧвмыны.

Y 13 1

Аслас уджаланінас петны Ирина абу нин кӧсйӧма. Сылы кутӧма кажитчыны бӧрйӧм хоббиыс, коді сетӧма уна позянлун, да окота лоӧма йитны ассьыс олӧмсӧ буретш тайӧ нырвизьыскӧд, 3D моделингкӧд.

Выльторйыс сиралӧма сійӧс. Ирина кыптӧма аслас, верӧсыслӧн да челядьыслӧн син водзын. Пияныс весиг гӧрдитчӧны мамнаныс. Том ань кутӧма гӧгӧрвоны, мый сылы кажитчӧ уджавны сьӧкыд программаясын. Тайӧ Blender 3D. Freecad, Kомпас 3д, ZBrach, Daz Studіo да уна мукӧд. Ёна воӧ сьӧлӧм вылас проектируйтны кутшӧмкӧ ичӧтик заказъяс, кажитчӧ вӧчны ставсӧ мичаа да медым и мукӧдыслы кажитчис сылӧн вӧчӧмыс.

Y 13 2

– Менам бать радейтіс конструируйтны – водзӧ висьталіс Ирина. – Ме некор эг чайтлы, кыдз шулӧны тай, вирыс пӧ кыскас, тайӧ збыльтор. Тыдалӧ, тадзи мекӧд и лои. А мӧд ногӧн ме ог куж весиг висьтавны, мыйла ме босьтчи тайӧ уджас. Медшӧр кӧсйӧмӧй вӧлі аслым видлыны чукӧртны 3D принтер. И сійӧ збыльмис! Медводдза принтерсӧ ме судзӧді Нидерландыысь, схемаяс-детальяс. Весиг инструментъяс тшӧтш сэтысь корси-ньӧби. И босьтчи уджӧ. Кыткӧ артмӧ, кыткӧ оз. Тӧдсаяс став Россия пасьталаысь отсасисны ӧтуввез пыр, велӧдісны кыдзи-мый да кытчӧ колӧ пуктыны. Сэсся дырӧн тай артмис жӧ-а. А радыс вӧлі, ачым тэчи да!

Ӧні менам мӧд принтер нин. И мыйӧн куті гӧгӧрвоны тайӧ уджсӧ, пыр окота мыйкӧ вежыштны-бурмӧдны. Коймӧд принтер нин окота тэчны...

Y 13 3

Унаторйын нин Ирина – мастер. Ичӧтик хобби вуджис олӧмыслӧн корӧмӧ да уджӧ. Том ань ёнджыкасӧ уджалӧ заказъяс вылын, кор овлӧ прӧст кад – сьӧлӧмыслысь корӧмъяссӧ олӧмӧ пӧртӧ, сэсся и пияныслы кутшӧмсюрӧ чачаяс вӧчӧ. Став вӧчӧмторйыс пӧ меным радейтанаӧн лоӧ, ӧд сійӧ босьтӧ кад да, медшӧрыс, менам сьӧлӧмлысь юкӧн. Быд вӧчӧмтор – тайӧ пӧ менам видзӧдлас, менам гӧгӧрвоӧдӧм.

Ӧти гижӧдад ставсӧ он тӧрӧд, но колӧ бытьысь пасйыштны медводдза уджсӧ – «Дюны» киноысь вегыльлысь (большой червь) мыгӧрсӧ и медбӧръясӧ, Владимир Высоцкийлӧн статуэтка. Шензьӧдӧ, и тайӧ збыль! Видзӧдлӧй фотояссӧ и асьныд казяланныд, кутшӧм коланаторйӧн ноксьӧ Ирина Балина. Аскиа луныс 3D принтер сайын!

Надежда ПУНЕГОВА.

Снимокъясыс Ирина Балиналӧн гортса архивысь.

 

Добавить комментарий


наверх