Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Ӧти бисер, мӧд, коймӧд...

Y 8 1

«Йӧлӧга» газетлӧн талунъя гӧсьт – Лариса Рочева. Том ань кысьӧ бисерӧн. Сылӧн киӧн вӧчӧма унатор нин: серпас, колье-исерга, браслет, эмӧсь и быдса наборъяс, кодъяс ёна мичаджыка видзӧдсьӧны мукӧд бижутерия серти. Ларисакӧд ӧтлаын велӧдчылі Коми Республикаса Юралысь бердса искусство гимназияын, Захарова на сэки вӧлі. Ныв век торъявліс аслыспӧлӧслуннас, олӧм вылас аслыснога видзӧдласнас, и сэк жӧ нюмъявны-шмонитны да быдӧнлысь сьӧлӧмкылӧмсӧ лэптыны кужӧмнас.

Мамыссянь вуджӧма

Чужлӧма Лариса Сыктыв районса Заречье грездын. Ичӧтсяньыс аддзӧма, кыдзи мамыс кысьӧ-вышивайтчӧ. Дерт, сэсся и ачыс велӧдчӧма. Сійӧ абу лыддьылӧма тайӧс кутшӧмкӧ енбиӧн. Радейтӧмаӧсь семьяас и ёна лыддьысьны. Ачыс Лариса да и ичӧтджык вокыс мичаа серпасасьлӧмаӧсь.

Y 8 2

Ӧкмыс класс помалӧм бӧрын локтӧма велӧдчыны искусствояс гимназияӧ, гуманитарнӧй юкӧнӧ. Сэсся пырӧма Сыктывкарса 1 номера педучилищеӧ, и медводдза уроксӧ сетӧм бӧрын гӧгӧрвоӧма, мый велӧдысьӧн лоны оз кӧсйы. Та бӧрын велӧдчӧма вузасьысьӧ да кутшӧмкӧ кад уджалӧма лавкаын. И век жӧ ордымыс вайӧдӧма Коми пединститутӧ, том ань босьтӧма педагог-психологлысь специальносьт. Велӧдчигас пыр уджалӧма. Сэсся петӧма верӧс сайӧ, чужӧма пи, а сёрӧнджык ныв. 

Ӧні Лариса уджалӧ Сыктывкарса 33 номера школаын педагог-психологӧн. Прӧст кадӧ кысьӧ бисерӧн, уджалӧ заказъяс вылын.  

Быд вӧчӧмторлӧн аслас ним

Y 9 1

Квайт во сайын Лариса Рочева вуджӧма овны ас оланінӧ. И пыр жӧ окота лоӧма керка пытшкӧссӧ мичмӧдны. Да мед эськӧ сэтшӧмторйӧн, мый мукӧдыслӧн абу.

Кысьыны-вышивайтчыны пӧ эз вӧв окота. Сэсся дыр мӧвпалӧм бӧрын босьтӧма канва, бисер и схема серти заводитӧма кыны серпасъяс. Ичӧт кагукыдкӧд пукалігад тай он уна кадтӧ прӧстмӧд. Со и Ларисалӧн тадзи вӧлӧма. Ӧти серпасыд дыр кадӧн артмӧма, но кутшӧм! Ӧнӧдз сійӧ медрадейтанаяс пӧвстын. Нӧшта радейтӧ серпасавны-кыны вӧвъясӧс. Эм пӧ гуся мӧвп – аслым серпасавны да и аслым бисерӧн кыны мича серпас, кольны аслым. Талун кежлӧ аньлӧн вӧчӧма комын кымын серпас. И сӧмын ӧти ас дорас, мукӧдсӧ ньӧбӧмаӧсь-корӧмаӧсь, шензьӧдана мича да. Ӧти нывбаба весиг некымын серпас нин ньӧбӧма, кажитчӧ да.

Y 9 2

Сэсся Ларисалы окота лоӧма бисерӧн кысьыны велӧдчыны. Таӧдз сійӧ некор на абу босьтчылӧма. Аттьӧ пӧ, мый ӧтуввезйысь ӧні быдторсӧ позьӧ аддзыны. Йӧзӧн вӧчӧм-пуктӧм мастер-классъяс серти Лариса и велӧдчӧма.

Медводдза уджыс – «квадратный жгут» техникаӧн кыӧм колье. Аддзӧма ӧтуввезйысь да, окота лоӧма видлыны кыны. Дерт, абу пырысьтӧм-пыр сійӧ артмӧма. Но гӧгӧрвоӧм бӧрын нин Ларисалӧн артмӧмаӧсь колье, исерга да браслет.

– Вит во чӧж ме кыи аслым, – висьталіс том ань. – А сэсся сымындатор чукӧрмис! Ог нин вӧлі тӧд, кытчӧ воштыны. Уджала чешскӧй бисерӧн, кажитчӧ, мый сійӧ мича да дзик ӧткодя пуксьӧ. Но сійӧ и донаджык китайса серти. Уна сьӧм шыблалі аслам хобби вылӧ. А сэсся коркӧ чуйдісны, вузав пӧ ассьыд вӧчӧмторъястӧ. И со эмӧсь нин ньӧбысьяс.

Ларисалӧн уна удж нин кыӧма-вӧчӧма. «Аддзӧны» найӧ ассьыныс кӧзяевасӧ быдсяма ярманга вылас. Шойччан лунъясӧ сулавлӧ и юркарса ЦУМ-ын, кӧні сы кодь жӧ мастеръяс вӧзйӧны ас киӧн вӧчӧмторъяссӧ ветлысь-мунысьлы.

Медся ёна шензьӧдӧ сійӧ, мый быд вӧчӧмторлы Лариса сетӧ ассьыс ним. И быд удж, кодӧс вӧчлӧма,  сійӧ бура помнитӧ-тӧдӧ.

Y 9 3

Бӧркыв пыдди

Лариса Рочева оз пов видлыны выльторъяс. Сійӧ пыр сӧвмӧдӧ ассьыс енбисӧ, пыртӧ уджас выль техникаяс. Ӧні нин зільӧ вӧчны сійӧс, мый кажитчас унджык аньлы. Тшӧкыда босьтлывлӧ и заказъяс. Ньӧбасьны окотитысьясыс асьныс бӧрйӧны колана рӧма бисер-мольяс, вермӧны вайны весиг ассьыныс схемаяс. И татшӧм ногӧн Лариса кыӧ налы колана мичмӧдчантор. Овлӧ, мый весиг мужичӧйяс волӧны корӧмӧн, медым мусаыслы мыйкӧ мастер вӧчыштас-кыыштас.

Буретш тайӧ лунъясӧ, март 14 лунӧ, Лариса Рочева пасйис ассьыс чужан лун. Газет пыр окота чолӧмавны да сины енбиа аньлы крепыд дзоньвидзалун, олӧмас лоны шудаӧн. Медым сӧвмӧдіс-ёнмӧдіс ассьыс енбисӧ, повтӧг видліс уджавны быдсяма техниканас. Кыдзи тулыснас став вӧр-ваыс ловзьӧ, кыдзи ытваыс ыджыд ӧдӧн нуӧ ассьыс васӧ, медым и том аньлӧн олӧмыс вӧлі тыр-бурӧн да став мытшӧдыс кывтіс-муніс бокиті.

Надежда ПУНЕГОВА.

Снимокъясыс

Лариса Рочевалӧн

гортса архивысь.

 

Добавить комментарий


наверх