Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Тэ водзын став мирыс восьса!

Y 4 1

Неважӧн тӧдмаси Александр Паршинкӧд. Ачыс чужлӧма Удора районса Косланын, а сэсся ичӧтнас на семьяыскӧд вуджӧма овны Сыктывкарӧ. Александр оз пов босьтчыны кутшӧмкӧ выльторйӧ. Торйӧн нин радейтӧ пырӧдчыны, рочӧн кӧ, активнӧй спортӧ: котралӧ лыжиӧн, исласьӧ конькиӧн, чеччалӧ парашютӧн. Бӧръя дас вонас мужичӧйлысь уна кад босьтӧ дайвинг. Та йылысь паськыдджыка сёрнитам.

Дайвинг – тайӧ Александрлӧн олӧм, сы йылысь мужичӧй вермӧ висьтавны дугдывтӧг. Пыр пӧ эм мыйӧн шензьӧдны кывзысьтӧ.

Y 4 2

– Менам чайтӧм серти, кӧть ӧтчыдысь кӧ видлін уявны ва улын да видзӧдін-тӧдмасин вапытшса оласногӧн, пыр кутас кӧсйыссьыны тайӧс вӧчны, – висьталіс Саша. – Менам тай сідзи артмис-а. Чайті, регыдик кежлӧ ылалі. Но со дас во нин колис, ачым верма уджавны инструкторӧн, а пыр на ва улӧ кыскӧ, пыр окота мыйкӧ выльтор сэтысь аддзыны. Ваувса олӧмыс ӧд – дзик мӧд мир. Татчӧс флора-фаунаыс быттьӧ кыскӧ ас дорас. Ва улын сёрнитӧ кывны он вермы, сӧмын ас синмӧн верман видзӧдны да шензьыны.

Дайвингӧ пырӧдчыны позьӧ кӧть кодлы, арлыд вылӧ видзӧдтӧг. Дзик медводдза урок дырйи инструктор сетӧ медшӧр тӧдӧмлунъяс: кыдзи лолавны ва улын, кутшӧм ногӧн кывтны. Эм весиг вапытшса знакъяслӧн быдса система, коді отсалӧ гӧгӧрвоны ӧта-мӧдтӧ. Медводдза занятие дырйи жӧ колӧ сюся кывзыны профессионаллысь висьталӧм-велӧдӧмсӧ, мунны сы бӧрся да вӧчны ставсӧ колана ног. 

Александр шоныда казьтылӧ Сьӧд саридзын ассьыс медводдза уялӧмсӧ. Ассьыд сьӧлӧмкылӧмъястӧ пӧ восьтыны весиг он куж – ставыс мича, мӧд пӧлӧс, тэ гӧгӧр кывтӧ быдсяма чериыс да ва пытшкын олысьыс. Сэні пӧ быттьӧ кадыс сувтӧ ӧти местаӧ, нинӧм он кыв ни он аддзы, сӧмын шензян.

Y 5 1

Сы бӧрын Александр унаысь на пыравлӧма ва улад: миян республикаса да Киров обласьтса ю-тыясӧ да тшӧтш и Египетса Гӧрд, Вьетнамса Лунвыв-Китай саридзьясӧ. Торйӧн нин кажитчӧ сылы вӧйӧм пыж-корабльяс видзӧдны. Татшӧмторйыс пӧ менӧ торйӧн ёна кыскӧ ас дорас: окота тӧдмавны, кытчӧ мунӧма судноыс, кутшӧм груз нуӧма, корсьны и вӧйӧмыслысь помкасӧ.

– Медым ваувса уялӧмъясыд эз вайӧдны неминучаӧдз, пыр колӧ уджавны ас вылад, тренируйтчыны, – шуӧ Александр. – Пыр на казьтыла, кыдзи дас во сайын локті юркарса бассейнӧ, медым тӧдмасьны, мый сэтшӧм дайвингыс, видлыны ассьым вынъясӧс. Сэксянь воӧдчи нин «Дайв Мастер» тшупӧдӧдз, и ӧні верма ачым нин велӧдны став окотитысьсӧ.

Y 5 2

Ва улын уявны велӧдчыны бурджык буретш бассейнын. Тані абу джуджыд, сэсся и инструкторъясыд пыр орччӧнӧсь. Колігӧн вермасны висьтавны, мый колӧ вӧчны, а сэсся и отсаласны бӧрйыны колана оборудование.

Александрлӧн инструкторӧн да медбур уялан ёртӧн ӧнӧдз лоӧ «Белый медведь» клубӧн веськӧдлысь Валерий Арнольд. Тайӧ ыджыд опыта мастер нин. Клубӧ ветлысьяс сыкӧд уялӧмаӧсь нин быдсяма ты-юясын, саридз-океанын. Клубас босьтӧны 8 арӧсысь ыджыдджык ныв-зонмӧс. Уна олӧма йӧз ветлӧ сэтчӧ.

Дайвингӧ пырӧдчӧм отсалӧ бурмӧдны дзоньвидзалунтӧ, сетӧ позянлун видлыны ассьыд вынъястӧ, а сідзжӧ велӧдӧ, кыдзи кутны асьтӧ неминуча дырйи. 

– Дайвингӧ пырӧдчыны окотитысьяслы вӧзъя ӧти колана индӧд: ва пытшкын уялігӧн колӧ пыр кутны син водзад ёрттӧ да кужны гӧгӧрвоны сійӧс, кыдз шуласны «без слов», тӧдны, мый сылӧн ставыс бур, либӧ, мӧдарӧ, колӧ отсӧг. Мӧд ногыс оз артмы, – кывкӧрталіс Александр.

Y 5 3

Гӧгӧрвоана, мый ыджыд ва улын ӧткӧн видзчысьны он вермы, овлӧ быдсяма лоӧмторйыс. Та йылысь и висьталӧ миянлы инструкторыс.

Дайвинг – тайӧ став олӧм кежлад радейтчӧм. Медся сьӧкыдӧн пыр овлӧ медся-медся медводдза воськолыс. А пуктан кӧ ас водзад мог, видзӧдлыны ваувса мирсӧ, чайта да, некутшӧм мытшӧд оз падмӧд. Ӧд сӧмын мӧвпыштан, мый ва пытшкын сы мында мичлуныс да гӧгӧрвотӧмыс, и пырысьтӧм-пыр окота суныштны да нимкодясьны. Эмӧсь ӧд и ва улын снимайтысь фотоаппаратъяс. Кымын шензьӧдана снимок позьӧ вӧчны аслыд да петкӧдлыны матыссаыдлы да ёртъясыдлы.

Александр корӧ ӧнія том йӧзӧс этшаджык пукавны компьютер сайын. Тіян водзын пӧ став мирыс восьса. А сэні – сы мындатор!.. Медводдза воськолыс пӧ ас саяныд.

Надежда ПУНЕГОВА.

Снимокъясыс Александр Паршинлӧн гортса архивысь.

 

Добавить комментарий


наверх