Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

«Ӧшкамӧшка» быдтӧ «кодзувъясӧс»

Y 12 1

Шуд уси веськавлыны «Ӧшкамӧшка-2017» челядьлӧн фестиваль вылӧ. Ёна и аттьӧалі сійӧс котыртысьясӧс. Ичӧтикъяс сьӧлӧмсяньыс петкӧдчисны ыджыд сцена вывсянь. Став сьӧлӧмкылӧмныс – чужӧм вылас. Сэтшӧм любӧ видзӧдны, кыдзи найӧ кужӧмӧн да быттьӧ ворсӧмсорӧн петкӧдлісны ассьыныс номеръяссӧ. Мусаӧсь да мичаӧсь, ичӧтикӧсь да ыджыд кужӧмлунаӧсь – со ӧд кутшӧм енбиа войтыр быдмӧны миян садъясын! Нимкодясь да ыззьӧд сӧмын найӧс выль вермӧмъяс вылӧ.

Быд во юркарын мунӧ «Ӧшкамӧшка» челядьлы коми национальнӧй фестиваль. Таво сійӧ муніс дас ӧтиӧдысь нин. Пырӧдчӧны фестивальӧ челядь садъяс, петкӧдӧны ыджыд сцена вылӧ ассьыныс ичӧтик быдтасъяссӧ – татшӧм ногӧн  чужтӧны коми кыв да чужанін дорӧ радейтчӧм да муслун. Уна вын пуктӧны тайӧ уджас садса воспитательяс да, дерт жӧ, мам-батьыс.

Y 12 2

Конкурс ӧтувтіс нёльсё сайӧ дзолюкӧс, а такӧд тшӧтш и налысь велӧдысьяссӧ да матыссасӧ. Медбур номеръяссӧ позис аддзыны-видзӧдны-кывзыны Коми Республикаса Юралысь бердса искусство гимназиялӧн концертнӧй залын гала-концерт дырйи. Комиӧн сьывны-йӧктыны да лыддьыны кывбур кужӧмнас садйӧ ветлысьяс шензьӧдісны миянӧс, видзӧдысьясӧс. Окота вӧлі быд петкӧдчысьлы «бис» горзыны да ланьтлытӧг клопайтны. А костюмъясыс дзолюкъяслӧн сэтшӧм мичаӧсь! Синтӧ ёрӧны!

Y 13 1

Медся «гажа» местаыс вӧлі сцена саяс. Дасьтысьӧм котыръяс виччысисны ассьыныс петан кадсӧ. Ӧтияс сьылӧны, мӧдъяс репетируйтӧны йӧктӧм, коймӧдъяс прӧста сідзи пукалӧны-куйлӧны – татшӧм ногӧн шойччӧны. Тані и удайтчис унджык котырсӧ снимайтны фотоаппарат вылӧ. Кык кывйӧн сёрнитыштім и велӧдысьясыскӧд, кодъяс висьталісны кыдзи-мый да дыр-ӧ кадӧн дасьтісны петкӧдлан номерсӧ, кыдзи бӧрйисны колана шыладсӧ, корсисны костюмъяс и.

Гажлӧн режиссёрнас вӧлі Ирина Рюхова. Кужӧмӧн сійӧ меститӧма 23 номертӧ аслас сценарийӧ. Ми, видзӧдысьяс, эгӧ мудзӧй нимкодясьны томуловлӧн петкӧдчӧмъясысь. Быд номер вӧлі быттьӧ ыджыд небӧгысь ӧти лист бокӧн. И сценарийысь кӧ кӧть ӧти номер «чышкисны»,  эськӧ эз тырвыйӧ бурӧн ло аддзӧмторйыс. Ыджыд праздникӧн артмис «Ӧшкамӧшка-2017».

Y 13 2

Окота аттьӧавны челядькӧд уджалысьясӧс, ӧд налӧн артмӧма пуктыны петкӧдчантор, корсьны колана паськӧм, кужӧмӧн дасьтӧмаӧсь и челядьнысӧ. Дзоляникъяс сцена вылын кутісны асьнысӧ прамӧй артистъясӧн нин: повтӧг печласисны ки-кокнас, эз повны микрофонысь да уна йӧза залысь. Мый велӧдӧма-дасьтӧма – сійӧс и петкӧдлісны, нинӧм эз торкны.

Концертсӧ нуӧдіс Коми Республикаса Ёртасян керкаысь специалист Ольга Степанова. Чолӧмавны дзолюкъясӧс волісны «Сыктывкар» администрацияӧн веськӧдлысь Валерий Козлов да Коми Республикаса национальнӧй политикаса министрӧс вежысь Вячеслав Попов. Найӧ пасйисны, мый челядьлӧн коми кывсӧ пыдди пуктӧмыс да сы дорӧ муслуныс ылӧдз тыдалӧ. А сэсся быд челядь садлы да и артистъяслы вичмисны аттьӧалана кывъяс да козинъяс.

Y 13 3

«Ӧшкамӧшкаын» петкӧдчыны окотитысьыс воысь-во содӧ. И мый тӧдчана,  петкӧдчанторъясыслӧн чужӧмбаныс тшӧтш жӧ мичаммӧ. Кор гаж помас став ичӧтик артистыс петӧ сцена вылӧ нин, казялан, мый найӧ быттьӧ уна рӧма мольяс, кодъяс виччысьӧны, кор эськӧ пысаласны найӧс сикӧтшӧ да ӧшӧдасны сьылі вылӧ нимкодясьны. Шензьӧдӧ, кутшӧм повтӧг дзолюкъяс да дзик сьӧлӧмсяньыс кужӧны нюмъявны да радуйтчыны сетӧм козинъясыслы.

Мед эськӧ тайӧ гажыс мунас уна во на. Сэтшӧм нимкодь, мый садикӧ ветлысьяслӧн  ичӧтсяньыс нин эм позянлун петавлыны ыджыд сцена вылӧ. Код тӧдас, гашкӧ, некымын во кольӧм бӧрти тайӧяс пӧвстысь и чужасны выль «кодзувъясыд» да?! Видзӧдлам, олӧмыс петкӧдлас...

Надежда ПУНЕГОВА.

Снимокъясыс авторлӧн.

 

Добавить комментарий


наверх