Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

«Сыр-кон»: юркарса супергеройяс, Сейлор Мун да Джокер

Y 1

Чайта, быд мортлӧн эм кутшӧмкӧ хобби, прӧст кад колляланног... Шуам, шылад радейтысь век вермас ветлыны концерт вылӧ, театрал – донъявны артистъяслысь ворсӧм, кипом удж вӧчысь – быдсикас ярмангасӧ котыртлӧ. А мый вӧчны, тэнад хоббиыд кӧ торъялӧ мукӧдысь, а тӧдмасьны аскоддьӧмыдкӧд висьтавны радейтанатор йывсьыд окота?

Комикс да сериал, супергеройяс йылысь кино да быдсикас мультфильм, пызанвывса да видео ворсӧмъяс, аниме, косплей да уна мукӧдтор радейтысьяслы отсӧг вылӧ воисны Людмила Бженбахова да Прокопий Уляшов. Тайӧ кык том мортыс коймӧдысь нин дасьтӧны да нуӧдӧны «Сыр-кон» гик (мӧд ногӧн кӧ – популярнӧй) культуралысь фестиваль.

Гик – тайӧ морт, коді вывті ёна радейтӧ ассьыс хоббисӧ, мукӧддырйи найӧс шулӧны шойччӧмын водзмӧстчысьяс. Збыль, фестиваль чукӧртӧ буретш татшӧмъясӧс, татчӧс войтыр став сьӧлӧмсянньыс ноксьӧны-вурсьӧны, зільӧны унджык тӧдмавны-лыддьысьны, аддзысьлӧны прӧст кадӧ, ӧтув видзӧдӧны сериалъяс да ворсӧны. Но став йывсьыс сьӧрсьӧн-бӧрсьӧн.

Y 8

«Сыр-кон» сяма фестивальыс шусьӧ конвенцияӧн, нуӧдӧны татшӧм аддзысьлӧмсӧ мир пасьтала. Тшӧтш и Сыктывкар тайӧ гысӧ кыйӧма, ӧд миян юркарын гикъяс тырмымӧн жӧ. Медводдзаысь «Сыр-кон» чукӧртчыліс Юношескӧй юркарса библиотекаын, сэк нин лои гӧгӧрвоана, мый мӧд аддзысьлӧм кежлӧ ковмас паськӧдчыны – сы мында мортыс воӧма. Сэсся гикъяс чукӧртчылӧмаӧсь «Июнь» вузасян шӧринын, а таво аслыспӧлӧс хоббиа ныв-зонмӧс аслас жыръясӧ лэдзӧма «Югӧр» инициатива шӧрин.

2017 вося «Сыр-кон» дасьтыны заводитӧмаӧсь кык тӧлысьӧн водз, Люда да Прокопий бергӧдӧмаӧсь ыджыд удж, ӧд кыдзи гӧгӧрвоана, фестиваль ӧтувтӧ вывті уна нырвизь. Ныла-зонма ветлывлӧмась татшӧмсяма аддзысьлӧм вылас и мукӧд карӧ, бокисянь видзӧдлӧм бӧрын ас водзас пуктӧмаӧсь мог – оз сӧмын дасьтыны фестиваль, а лолыштны сыӧ олӧмсӧ, медым эськӧ быдӧн кыліс асьсӧ шудаӧн.

Y 9 1

Ёна отсалӧмаӧсь и ёртъясыс, со шуам «КомиКомикс» лавка ассьыс вузӧссӧ вӧзйӧма, искусствояс колледж дасьтӧма фестивальлы лӧсялысь выставка, кинотеатръяс вичмӧдӧмаӧсь плакатъяс. Мича шыладӧн нимкодьӧдӧмаӧсь видзӧдысьясӧс «Тоника» котыр да «Palіsander» шылада велӧдчанінысь музыкантъяс. А уна рӧма пиксель-шоуӧн петкӧдчис «Fіrefly» котыр.

Торйӧн окота висьтавны конвенциялӧн «чужӧм» йылысь. Но медводз фестивальлӧн ним йылысь: «сыр» – буретш тадзи ас костаныс томулов Сыктывкарсӧ нимтӧны, а «кон» – тайӧ конвенция. Кор нимыс артмӧма, дзик пыр и чужӧма мусаник шырлӧн мыгӧр. Прокопий – енбиа серпасасьысь, став мичмӧдантор дасьтӧмсӧ ас вылас босьтӧма. Билетъяс да афиша, кружка да футболка, значок да открытка, мыйсӧ сӧмын абу серпасалӧма зон. И быдлаысь позьӧ аддзыны сыр-конлысь да сыкӧд йитчӧм геройяслысь серпасъяс. А нӧшта Прокопий Уляшов думыштӧма нималана супергеройяс образ подулын юркарса супергеройясӧс, сӧмын оз ков пӧ стрӧга на вылӧ видзӧдны, серпасалӧма найӧс шмонитігсорӧн, мед унджыкӧн фестиваль йылысь тӧдмаласны. (Ми тайӧ серпасъяссӧ йӧзӧдам «Йӧлӧгалӧн» тайӧ петасса 16 лист бокын, донъялӧй).

Фестивальыс муніс апрель медводдза лунӧ, пажын кадсянь сёр рытӧдз. «Эзысь» залын позис ворсны видео да пызанвывса ворсӧмъясысь. Воссьыліс тшӧтш и варгеймеръяслӧн клуб (татчӧс войтыр ичӧтик салдатъясӧн ворсӧныноксьӧны), а нӧшта «эзысь» залын позис «суныштлыны» виртуальнӧй олӧмӧ.

«Зефир» жырйын вузасисны комиксъясӧн, юкталісны чӧскыд кӧра кофеӧн, вӧчисны аквагрим. Тані жӧ паськӧдчыліс выставка, а гӧсьтъяс ноксисны кубикрафтӧн (лякалісны кабалаысь квадрат мыгӧра чачаяс) да серпасасисны.

«Рӧмпӧштанъяса» жырйын лыддисны лекцияяс: Алексей Бешкарев висьталіс научнӧй фантастика нырвизьын сериалъяс да кино йылысь, Владислав Дониченко тӧдмӧдіс коми мифология серти дасьтӧм кооПЕРАтивнӧй ворсӧмъяс йылысь, «Fіrefly» котырысь том йӧз висьталісны биӧн йӧктӧм йылысь. Лекцияяс костын гӧсьтъяс шойччигмоз видзӧдісны мультфильмъяс.

Y 9 2

Быд конвенциялӧн шӧр петкӧдчӧмыс – тайӧ косплей-дефиле. Буретш кино, аниме либӧ книгаысь геройӧ пасьтасьысьяс чукӧртӧны ас гӧгӧрыс чуйялысь войтырӧс. «Сыр-кон» медбур косплейӧс бӧрйӧны кык номинация серти: ӧтка да котыр пӧвстысь. Таво сцена вывсянь петкӧдчисны кызь нёльӧн, быдӧнлы фестиваль дасьтысьяс вичмӧдісны козин. Кодсюрӧ коймӧдысь нин пырӧдчӧ конкурсас, но таво и выль ныв-зон содӧмаӧсь. Быд косплейӧс Людмила да Прокопий торйӧн бӧрйӧмаӧсь, донъялӧмаӧсь петкӧдчан программасӧ, зільӧмаӧсь и сӧветӧн отсыштны.

Тавося фестиваль дырйи вӧлі котыртӧма нӧшта ӧти ворсӧм – гӧсьтъяслӧн билетъяс вылӧ дзебсьӧмаӧсь чизимонъяс – ставнас 25 персонаж, кодъясӧс тшӧтш думыштӧма да серпасалӧма Прокопий. Ворсысьлы (кодӧн вермис лоны быд гӧсьт) коліс чукӧртны став чизимонсӧ, а сідзкӧ, унджыккӧд тӧдмасьны, сёрнитны... Тайӧ гажыс ӧтувтіс и варов, шмоньлив ныв-зонмӧс, и найӧс, коді быдлунъя олӧмас, гашкӧ, оз вермы шуны асьсӧ сибыд мортӧн, а тані, ёртъяс костад, кужис асьсӧ восьтыны, гажӧдчыны да нуны сьӧрсьыс конвециялысь кыпыд ру.

Мария ИГУШЕВА.

Снимокъяс «Сыр-кон». Фестиваль гик-культуры. Сыктывкар. ВКонтактеын котырысь.

 

Добавить комментарий


наверх