Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Александра Фокс: «Удитны ставсӧ!»

Y 4 1

«Йӧлӧгалӧн» воддза номерын паськыда висьталім «Сыр-кон» гик-культуралӧн фестиваль йылысь. Ассьыс тӧдчана пай конвенция нуӧдӧмӧ пуктіс и миян талунъя гӧсьт, косплей да музыка радейтысь — Александра Фокс. Окота матӧ-джыка тӧдмӧдны тайӧ збой нылыскӧд: Саша оз пов торъявны мукӧдсьыс, корсьӧ асьсӧ, сьӧлӧмсяньыс радейтӧ уджсӧ да зільӧ сӧвмӧдны енбисӧ.

Ичӧт Саша

Дзоля нывкаӧн на Саша радейтӧма кипом удж. Мамыс вылӧ видзӧдӧмӧн нускӧма-вурсьылӧма, вӧчалӧма быдсикас причёска: став аканьсӧ, вӧлӧм, шырӧ-краситӧ ас ногыс. Весиг уна рӧма сунисысь вӧчалӧма парикъяс... да новлӧма найӧс. А квайт арӧсын, Покемонъяс йылысь мультфильм видзӧдӧм бӧрын, нывка вурӧма ассьыс медводдза косплейсӧ – кольквиж дӧраысь артмӧма Пикачулӧн костюм. Тӧдчӧдам, косплей – тайӧ нималана анимэ, сериалъясысь либӧ ворсӧмъясысь персонажъясӧ пасьтасьӧм, косплееръяс асьныс вурӧны-дасьтӧны костюмсӧ.

Ичӧтдырся медводдза воськовъяссӧ нывка казьтывлӧ серамсорӧн, но буретш найӧ и вайӧдӧмаӧсь Сашаӧс ӧнія хоббиясӧдз.

Школаын велӧдчигӧн нывка видлӧма ассьыс вынсӧ и быдсикас йӧктӧмын, дас арӧсӧдз ветлӧма балет вылӧ, дас квайтӧдз велӧдчӧма йӧзкостса йӧктӧмӧ, но медся уна кад – матӧ сизим во – нывка сиӧма хип-хоплы. Медводз школабердса кружокӧ ветлӧма, а сэсся вуджӧма и хип-хопӧ торъя велӧдчанінӧ. Сценакӧд йитӧдыс Сашалӧн зэв топыд, но та йылысь водзынджык.

8 классын Сашалы юрас воӧма мӧвп – школа бӧрын пырны велӧдчыны иностраннӧй кывъяс факультетӧ. Суйӧрсайса кывтӧ ныв ёнасӧ абу радейтлӧма, но кӧсйӧмыс чужӧма тай. Но сэк жӧ, кывъяс велӧдӧмын Сашалӧн кужанлун-сямыс вӧлӧма, и некымын во мысти англия кыв бура нин тӧдысь нывка сдайтӧма ЕГЭ да пырӧма велӧдчыны СГУ-ӧ. И со ӧні велӧдчӧ 3 курсын нин, сӧмын... искусствояс колледжын.

Y 5 1

Саша – музыкант

Збыль, Саша повтӧм морт – некымын во чӧж дасьтысьӧма туявны кывъяс, а мунӧма велӧдчыны саксофонӧн ворсны. Музыкальнӧй школаӧ Александра некор абу ветлывлӧма, нотаяс абу тӧдӧма, но шыладтӧ ичӧтсяньыс радейтӧма. Дас кык во сайын медводдзаысь босьтӧма киас гитара, ворснысӧ велӧдчӧма ачыс: библиотекаысь корсьӧма колана небӧгъяс да аккордъяс.

– Некыдз оз вӧлі артмы баре (струнаяс вылӧ колана ног чуньяс пуктӧм, тайӧ мытшӧднас уна том гитарист паныдасьлӧ), – юксьӧ казьтылӧмнас Саша. – Весиг бӧрдлывлі, а кор артмис, керка тырнас горзі-радлі, став суседӧс, гашкӧ, чуйді.

Колӧ тӧдчӧдны, мый орччӧн олысьяс та бӧрын уна шылад на кывласны стен сайысь, ӧд регыдъя кадӧн нывка заводитӧма уджыштавны да ньӧбӧма ассьыс медводдза электрогитара, а сы дорӧ и комбоусилитель. 7 классын Сашалӧн лоӧма ӧтуввезйӧ петанін, а сідзкӧ, воссьӧма позянлун нӧшта на сьӧлӧмсяньджык велӧдчыны шыладӧ. 14 арӧсын нывка шуӧма ньӧбны синтезатор, а тайӧ шылада инструментыс абу донтӧм лыдысь, медым кӧсйӧмыс збыльмас Сашалы ковмӧма уджавны гожӧм чӧж. И абу весьшӧрӧ, вӧлӧмкӧ, нывлӧн ки-чуньыс быттьӧ ачыс колана ног личкалӧмаӧсь клавишаясті, та йылысь бӧрти висьталасны колледжса велӧдысьяс.

11 класс бӧрын, кор ныв другӧн гӧгӧрвоӧма, мый окотитӧ босьтны творчествоа профессия, медыджыд отсӧгыс бара на муса мамсяньыс воӧма, ань туйдӧма нывсӧ видлыны вын искусствояс колледжын. Кор Саша медводдзаысь локтӧма колледжӧ, сэтчӧс уджалысьяс дзик пыр и висьталӧмаӧсь, гитаристыд пӧ тырмымӧн, а духӧвӧй музыкантъяс век колӧны. И пондӧмаӧсь лыддьӧдлыны: труба, габой, саксофон... Бӧръяыс нывкалы сьӧлӧм вылас и воӧма. Коймӧд во нин Саша велӧдчӧ ворсны тайӧ мича инструментнас, медводдза курссянь луннас 7-9 час репетируйтчӧ. Колледжӧ со позьӧ быд лун волыны, весиг шойччан лунӧ. Саша тшӧкыда 7 час асылын сэні нин, медым колана ног дасьтысьны ворсӧм кежлӧ, а велӧдчан луныс вермас и 9 час рытын помасьны. Ворсӧ Александра и велӧдчанінбердса «Тоника» ансамбльын да, дерт, оркестрын. Ёртъясыскӧд ветлывлӧны и быдсикас фестиваль конкурс вылӧ, да, мый тӧдчана, тшӧкыда шедӧдлӧны вермӧмъяс. Некымын лун сайын на оркестр воӧма Череповецысь, томулов лоӧмаӧсь мӧдӧн «Северная Рапсодия» конкурсын.

Саксофон — дерт, медшӧрыс, но та кындзи Саша бӧръя куим вонас велӧдчӧма фортепиано да ударнӧйяс вылын ворсны. А нӧшта енбиа ныв ачыс гижӧ шылад.

– Медводз юрӧ воӧ мелодия – висьталӧ Александра, – сійӧс гижышта нотаяс отсӧгӧн да ворса фортепианоӧн – кывза. А сэсся юкла инструментъяслӧн партияяс вылӧ да бара ворса фортепианоӧн. Менам бура уна шылад нин чукӧрмис, быдсикас коллективъяслы. Ёнджыкасӧ гижа эстраднӧй нырвизьын, кӧть и велӧдча классическӧй юкӧнын.

А нӧшта велӧдчанінын Саша заводитӧма сьывны, гӧлӧсыслысь позянлунсӧ колледжас кужӧмаӧсь восьтыны да.

Y 5 2

Саша - косплей дасьтысь

2010 восянь Саша топыда босьтчӧма косплей дасьтӧмӧ. Ӧтчыд, анимӧ видзӧдігӧн, Сашалы окота лоӧма унджык тӧдмавны косплей йылысь. Ӧтуввезйыд ки улын вӧлӧма да дзик пыр и «суныштлӧма» сэтчӧ, тадзи нывка «ӧзйӧма» выль мӧвпӧн – вурны-дасьтыны ассьыс косплей. Медводдза геройнас лоӧма Наруто – анимеысь герой.

– Кор бӧръян, кодӧн эськӧ лоны, видзӧдан мыгӧр да чужӧм, а нӧшта и этш вылӧ, – висьталӧ Александра. Менам медводдза косплей – Наруто – шань, ыджыд сьӧлӧма, кывкутысь, могъяссӧ олӧмӧ пӧртны зільысь. Геройыс меным зэв матын, чайта, мый ми мыйӧнкӧ ӧткодьӧсь. Тайӧ зэв тӧдчана, ӧд косплей – абу сӧмын паськӧм да быдсикас атрибутика – тайӧ сӧмын тэныд лӧсялана образ.

Дасьтыны бур косплей – ыджыд удж. Колӧ вурны паськӧм, корсьны лӧсялана парик да линзы, дасьтыны крафт – аслыспӧлӧс атрибутика. Выкройкасӧ позьӧ босьтны и вурсян журналысь, а сэсся сӧмын мыйсюрӧ содтыны либӧ чинтыны. Тшӧкыда ковмывлӧ вежны дӧралысь рӧмсӧ (лавкаысь колана рӧма дӧрасӧ тшӧкыда он на аддзы), серпасасьны, вӧчны аппликация да сідз водзӧ. Ёна колӧ вежлавны и кӧм, тшӧкыда косплейер ньӧбӧ медся донтӧмсӧ, а сэсся вундалӧ, лякалӧ, мичмӧдӧ... Ӧти косплей дасьтӧм вылӧ шӧркодя колӧ тӧлысь, медшӧрыс пӧ – ставсӧ колана ног мӧвпыштны.

Талунъя лун кежлӧ Александралӧн дас сизим косплей. Быдӧн дорӧ эм аксессуар да клафт, парик да линзы, некымын костюм пӧ колӧ на помыштны, а кутшӧмсюрӧ виччысьӧ ассьыс кадсӧ.

Александра йылысь унатор на позьӧ висьтавны, нывка «ӧзйӧ» аслас уджнас, юрнас суныштӧ кажитчанаторас. Нывкаыс ӧтувтӧ медся аслыспӧлӧсторсӧ да ставсӧ тай удитӧ!

Мария ИГУШЕВА.

Снимокъясыс

Александра Фокслӧн

гортса архивысь.

 

Добавить комментарий


наверх