Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Серпас чужӧ шыладысь, мӧвпысь...

Y 8 1

Кывкутысь, зіль, енбиа, творчество вылӧ аслыссяма видзӧдласа, став уджсӧ помӧдз вайӧдысь... Со ошкана татшӧм кывъяс висьталӧны Удора районса Кослан сиктысь Сергей Доронин йылысь. И збыль, «Йӧлӧгалӧн» талунъя гӧсьт вермас чуймӧдны. Дас куим арӧса Сергей водзмӧстчӧ творчестволӧн уна нырвизьын. Зон корсьӧ асьсӧ серпасасьӧмын, киӧн вӧчасьӧмын, сьылӧмын, йӧктӧмын...

– Сергей, вай медводз сёрнитыштам серпасасьӧм йылысь... Кор медводдзаысь босьтін киад карандаш-краска?

– Кыдзи и мукӧд челядь моз, серпасасьны ме заводитлі ичӧтдырйи на, мам-бать сӧмын на ньӧбасны вӧлі выль альбом – а сійӧ тыр нин... Менӧ ичӧтсянь кыскис ас дорас творчество да киӧн вӧчасьӧм. Ичӧт классын велӧдчигӧн медводдзаысь вайи альбомӧс школаӧ, петкӧдлі уджъясӧс ёртъяслы да велӧдысьяслы. Вӧлі зэв долыд налӧн ошкӧмысь, шань кывъясысь. Та бӧрти ме нӧшта на унджык да нӧшта на сьӧлӧмсяньджык куті серпасасьны.

Y 8 2

– Кыдзи тэ чайтан, медым мичаа серпасасьны, колӧ оз енбиыс, либӧ эм кутшӧмкӧ мӧд сикас гусятор?

– Некодлы ассьым видзӧдласӧс, дерт, ог вӧзйы, но чайта, мый некутшӧм енби абу. Но сэкжӧ мортлы сетӧма аслыспӧлӧс видзӧдлас, кужӧмлун, кодӧс колӧ быдтыны-сӧвмӧдны. Том мортлы, кӧсйӧ кӧ вӧчны ассьыс уджсӧ бура, быть колӧ кужны пуктыны ас водзас колана мог, и нинӧм вылӧ видзӧдтӧг мунны сы дорӧ, велӧдчыны. Чайта, медшӧрыс – мортлӧн ыджыд окотитӧм.

– Велӧдчӧм йылысь кӧ воис сёрниыс. Кыдзи тэ сӧвмӧдан кужӧмлунтӧ?

– Велӧдча ме гортын ӧтуввез отсӧгӧн. Ӧні вель уна видео-урок да туториал – тайӧ тшӧтш аслыспӧлӧс графическӧй урок, кӧні сьӧрсьӧн-бӧрсьӧн петкӧдлӧма серпаслысь артманногсӧ. На отсӧгӧн, воськов бӧрся воськов, велалан серпасасьны. А нӧшта видзӧда мукӧд художникъяслӧн творчество вылӧ, донъяла выль уджъяс. Бара жӧ ӧтуввез таын меным ыджыд отсасьысьӧн лоӧ. «ВКонтактеын» эм уна котыр, кӧні том серпасасьысьяс петкӧдлӧны ассьыныс уджъяссӧ, кодкӧ сӧмын на босьтчӧма, медводдза воськовъяс вӧчӧ, кодкӧ воясӧн нин ноксьӧ...

Y 9 1

– Кыдзи тэ серпасасян? Пырӧдчан-ӧ кутшӧмкӧ художественнӧй нырвизьӧ?

– XXІ нэм сетӧ паськыд позянлун – сӧмын бӧрйы. Ӧні ме ёна серпасася компьютер отсӧгӧн, графическӧй планшет вылын. Радейта и карандашъяс, прӧстӧй и уна рӧма. Корсюрӧ серпасася акварельӧн, но тайӧ нырвизьыс сьӧкыда на сетчӧ.

– Сергей, юксьы газет лыддьысьяскӧд, кыдзи чужӧ серпасыд?

– Чужӧ... шыладысь, мӧвпысь, коді бергалӧ юрын да вӧрзьӧдӧ сьӧлӧмӧс. Медтшӧкыда ме вуджӧда серпас вылӧ ассьым сьӧлӧмкылӧмӧс. Шуам, кор ме жугыль либӧ гажтӧмтча – серпас вылын артмӧ синва, ме быттьӧ кыла тайӧ синваыслысь дойсӧ. А кор лолӧй кыпыд – чужӧны шуда, шондіа образъяс. А нӧшта радейта дасьтыны козин вылӧ портретъяс, татшӧм серпас вылӧ, дерт, мортыслӧн образыс нин ышӧдӧ.

Y 9 2

– Коді медводз аддзӧ тэнсьыд серпасъястӧ? Пырӧдчылан-ӧ кутшӧмкӧ конкурс-петкӧдчӧмӧ?

– Веськыда кӧ шуны, меным зэв тӧдчана, кыдзи мукӧдыс донъялӧны менсьым серпасъясӧс. Та вӧсна дась уджъясӧс петкӧдла медводз ёртлы, сэсся мамлы. А конкурсъясад, дерт, пырӧдча, неважӧн на ысті ассьым уджӧс «Милее север для меня» районса конкурс вылӧ, дзоньвидзалунлы сиӧм ордйысьӧмын серпасӧй вермысьӧн лои.

– Тӧда, мый унаторйын нӧшта водзмӧстчан...

– Да, хореография вылӧ со сизимӧд во нин ветлӧдла, та кындзи нӧшта на и сьыла. Косланса содтӧд тӧдӧмлун сетан шӧринбердса «Рукодельница» котырӧ ветлӧдла, вӧчала быдсикас поделка, вурся, кыся бисерысь, радейта вышивка. Велӧдыськӧд – Ирина Станиславовна Ванеевакӧд – тшӧтш конкурсъясад пырӧдчам и шӧринын, и районын, весиг республикаса тшупӧд вылӧ петалам: «Нарядная Пасха», «Валенку благодарная Россия», «Зимняя сказка», «Зарни кияс», «Пластиковое чудо», «Безопасность глазами детей» да мукӧд.

Y 9 3

– Гӧгӧрвоана, творчество босьтӧ олӧмад ыджыд пай. А окотитан-ӧ тэ йитны ассьыд олӧмтӧ сыкӧд? Абу кӧ гусятор, юксьышт водзӧ вылӧ мӧвпъяснад.

– Кор велӧдчи ичӧт классъясын, ёна окотитлы лоны дизайнерӧн либӧ модельерӧн, ӧні видзӧдласӧй неуна вежсьыштіс. Чайта, меным колӧ лоны серпасасьны велӧдысьӧн. Мӧд во кӧсъя мунны велӧдчыны юркарса искусствояс гимназияӧ, и ӧні колӧ бӧрйыны нырвизьсӧ: художественнӧй либӧ хореография... Ок, и сьӧкыд бӧрйыны сӧмын ӧтитор! А матысса кад йылысь кӧ – окота велӧдчыны ворсны гитараӧн.

 

Мария ИГУШЕВА.

Серпасъясыс да снимокъясыс

Сергей Доронинлӧн.

 

Добавить комментарий


наверх