Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Художествоа тату –мый сійӧ татшӧмыс?!

Y 11 3

Кор висьталӧны татуировка йылысь, син водзӧ пырджык сувтӧ ыджыд тушаа том морт, кодлӧн пельпом вылас серпасалӧма кутшӧмкӧ пемӧс либӧ тӧдчана гижӧд. Сійӧ кадыс, кор татуировкаяс вермисны висьтавны морт йылысь, мый сійӧ пырӧ кутшӧмкӧ кланӧ да нуӧ ас пытшкас лёк нырвизя оласног, бырис. Ӧні кучик вылӧ художествоа серпасасьӧм – тайӧ искусстволӧн аслыспӧлӧс сикас. Тату отсӧгӧн быд морт вермӧ петкӧдлыны аслыспӧлӧслунсӧ, мукӧдысь торъялӧмсӧ, сідз шусяна индивидуальносьтсӧ. «Йӧлӧгалӧн» талунъя гӧсьтъяс – Александр Галанцев да Евгений Сажин тату мастеръяс.

Медым гӧгӧрвоны татуировщикъяслысь оласногсӧ, колӧ медводз ветлыны налӧн уджаланінӧ да ставсӧ ас синмӧн аддзывны. Кор ме пыри тату салонӧ, мекӧд дзик пыр чолӧмасис неыджыд диван вылын пукалысь косіник зон, сьӧд паськӧма, юрсиыс пельпомӧдзыс, киас кутӧ гелевӧй сьӧд ручка да кабала.

Y 10 1

Евгений

Тайӧ том мортсӧ шуӧны Евгений Сажинӧн. Сылы 26 арӧс, чужлӧма Сыктывкарын. Юркарса 24 номера школа помалӧм бӧрын пырӧма велӧдчыны технологическӧй лицейӧ, сэсся эштӧдӧма Сыктывкарса вӧр институт, босьтӧма автомобильнӧй туйяс да аэродромъяс юкӧнын специальносьт.

– Серпасасьны заводитлі ичӧтсянь, – висьталіс Евгений. – Но художественнӧй образование абу. Урокъяс вылын радейтлі серпасасьны, киын пыр вӧлі шарикӧвӧй ручка. Татшӧм ногӧн и чужи графика дорӧ муслуныс. Кужӧмлунӧй вӧляникысь пыр быдмис. Кольыштіс неуна кад, и ме дорӧ кутісны шыӧдчыны Россия пасьталаысь йӧз, и весиг суйӧрсайсаяс. Унаӧн на пӧвстысь музыкантъяс да экстремальнӧй нырвизьын зільысьяс. Менсьым уджъясӧс корлісны быдсяма афишаяс, дискъяс да футболкаяс вылӧ. 2014 воын нин менам вӧлі персональнӧй выставка.

Y 10 2

Евгений зільӧ пырӧдчыны быдсяма конкурсъясӧ, торйӧн нин матын графика жанр. Сійӧ окотапырысь ветлӧдлӧ и мукӧд серпасасьысьлӧн выставкаяс вылӧ, медым, дерт жӧ, тӧдмавны мыйкӧ выльтор. Ӧні вӧчӧ медводдза воськовъяс выйӧн серпасасьӧмын...

Александр

Александр чужлӧма Усинскын. Школасӧ помалӧм бӧрын босьтӧма экономистлысь специальносьт. 2003 воын чужӧма мӧвп восьтыны ассьыс тату салон. Водзтіджык салоныс меститчӧма неыджыд жырйын, кӧні вӧлӧма кык юкӧн. Ӧтарас сулалӧма кушетка, ичӧтик пызан вылын быдсяма рӧма краскаа флаконъяс да асептическӧй растворын уджалан аппарат. Мӧд юкӧнас сулалӧмаӧсь пызан да улӧсъяс, кӧні куйлӧны вӧлӧм колана журналъяс да эскизъяса папкаяс.

Y 11 1

– Александр, гӧгӧрвоӧд, кутшӧм нырвизьын тэ зілян?

–Кутшӧмкӧ торъя нырвизь абу, – шуӧ том морт. – Кор кӧсъя шойччыштны, уджала графикаын либӧ олдскул техникаын. Ачымӧс сӧвмӧда реализм техникаын. Тату кындзи серпасася выйӧн. Кор окота лоӧ дзоньнам «суныштлыны» творчествоӧ, сэки уджала холст вылын, серпасася выйӧн. А мукӧддырйи окотапырысь босьта картон да пастель краскаяс. Медъёна кажитчӧ серпасавны йӧзӧс. И кымын сьӧкыдджык персонажлӧн характерыс - чужӧмыс артмӧ колоритнӧйджыкӧн да интереснӧйджыкӧн, синмад тай пырджык шыбитчӧ персонажлӧн видзӧдласыс.

– Коді медтшӧкыда волывлӧ вӧчны тату?

–18-25 арӧса том нывъяс. Найӧ тшӧкыда корӧны вӧчны ичӧтик татуировкаяс да медым пӧ оз ёна тыдавны йӧзыслы.

Y 11 2

Кыдзи вӧчсьӧ татуировка?

Тату мастеръяскӧд сёрниыс артмис зэв аслыспӧлӧсӧн. Том йӧз сьӧлӧмсяньыс висьтасисны асланыс радейтана удж йывсьыс. Татуировка вӧчигӧн мортыслы вӧлӧм оз сюйны обезболивающӧй укол. Но эм анестезия — налы, кодъяс оз вермыны терпитны дойсӧ.

Окота лои юавны, а позьӧ оз вӧчны татусӧ недыр кад кежлӧ? Александр да Евгений шуӧны, мый тайӧ нин лоӧ серпасӧн, кодӧс вӧчӧны хна либӧ специальнӧй маркер отсӧгӧн. Татшӧм уджыс пӧ кутчысяс... сӧмын кык вежон.

А мыйта кад колӧ татуировка серпасалӧм вылӧ? Александр висьталіс, мый родинка вӧчӧм вылӧ мунас 2 минут, а тшӧктасны кӧ пӧ серпасавны ставнас мышкусӧ – ковмас во джын. Медся дыр мужичӧй уджавлӧма 15 час сувтлытӧг.

Бӧркыв пыдди

Бур тату мастерӧн вермас лоны быд морт, кодлӧн эм ыджыд кӧсйӧм да коді вермӧ уджавны художествоа юкӧнын. Тату салонын эм позянлун велӧдчыны тӧлысся курсъяс вылын. Тані жӧ сетасны сертификат.

И медбӧрын, кутӧй тӧд выланыд, татуировка вӧчӧны сӧмын 18 арӧсысь ыджыдджыкъяслы!

Виктория ПОПОВА.

Снимокъясыс Александр Галанцевлӧн да

Евгений Сажинлӧн гортса архивысь.

 

Добавить комментарий


наверх