Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

И Уралса коми тӧдӧ кывйыдлысь дон

Y 12 1

Сюсь, водзмӧстчысь да унатор тӧдысь студентъяскӧд аддзысьлыны-сёрнитны меным ёна кажитчӧ. Со и та пӧрйӧ воча сёрнитысьӧн лои Ирина Терентьева, Салехардысь ныв, коді велӧдчӧ Питирим Сорокин нима канму университетлӧн коми филология юкӧнын. Шензьӧдана, мый Урал из сайын быдмӧм ныв сёрнитӧ изьваса коми ногӧн, пыдди пуктӧ коми кыв да кӧсйӧ сӧвмӧдны-велӧдны сійӧс водзӧ.

Бать-мам дорын

Ирина чужӧма-быдмӧма Ямал-Ненеч кытшын. Бать-мамыс – тундраса кӧр видзысьяс. Коркӧ уна во сайын сэтчӧ мунлӧмаӧсь овны изьваса коми. И ӧнӧдз на сэні олӧны комиӧн сёрнитысь да комилысь культура-традиция видзысь-сӧвмӧдысь войтыр. Ириналӧн бать-мамыс буретш сёрнитӧны изьваса коми ног. Челядьыслы тшӧтш жӧ вуджӧдӧмаӧсь чужан кыв дорӧ муслунсӧ. Сэні пыр на ветлӧны корасьны, корӧны бать-мамлысь гӧтрасьӧм вылӧ бурсиӧм. Аньяслы колӧ кужны вурны сарапан, медым новлыны чумын, а мужичӧйяслы колӧ лоны вывті сюсьӧн да унатор вӧчны кужысьӧн.

Ичӧтдырыс том мортлӧн кольӧма тундраын жӧ. Ирина бура тӧдӧ сэтчӧс сьӧкыд олӧмсӧ, дзолясяньыс велӧдчӧма да кужӧ верстьӧлысь удж вӧчны: чумын став коланасӧ бергӧдны-вӧчны, кӧръясӧн да снегоходӧн веськӧдлыны, чум тэчны-лэдзны, ичӧтджык чой-вок бӧрсяыс видзӧдны.

Y 12 2

Ирина семьяас медыджыд. И кор воӧма кад пырны велӧдчыны школаӧ, сійӧ мунӧма овны пӧль-пӧч ордас Салехардӧ. Кӧр видзысьясыд гортад гежӧдика волӧны, и та вӧсна налӧн челядьлы водз лоӧ верстяммыны. Сёрӧнджык нин чоя-вока олӧмаӧсь бать-мамыслӧн патераас сӧмын асьныс. Ирина велӧдчӧма кадетъяслӧн классын, мӧвпалӧма мунны МВД структураӧ водзӧ велӧдчыны-уджавны. Но олӧмыс ас ногыс шыбӧлитӧма.

«Нинӧм вӧчтӧг овны ме ог вермы»

Ирина Терентьева сэтшӧм морт, мый нинӧм вӧчтӧг пукавны оз вермы. Пыр вӧлӧма вывті збойӧн, унакӧд тӧдмасьӧма-ёртасьӧма. Быдлаӧ удитӧ пырӧдчыны и. Коймӧд классын велӧдчигас ныв пырӧма сьывны «Обдорянка» коми фольклор группаӧ. Сэні нывъяс окотапырысь сьывлӧмаӧсь коми сьыланъяс, медрадейтанаӧн вӧлӧма «Обь ю дорын» («Висер вожын» сьыланкыв вежыштӧмӧн ливкйӧдлӧмаӧсь) да «Ме ю шӧрӧ пета».

Том мортлы пыр кажитчылӧма мыйкӧ выльтор тӧдмавны коми йылысь. Сэсся 2011 воын мойвиӧма ветлыны Изьваӧ, да тані нин сылы ставыс сьӧлӧм вылас воӧма – ставӧн пӧ комиӧн сёрнитӧны, вот дивӧыс! Тӧдмасьӧма «МИ» котырын зільысьяскӧд, а сэсся нин кутӧмаӧсь ӧтлаын пырӧдчыны быдсяма фестиваль-конкурсас.

Y 13 1

Тадзи жӧ Ирина тӧдмалӧма, мый Сыктывкарын эм университет, кӧні велӧдӧны коми филология. И школасӧ помалӧм бӧрын нинӧм йылысь мӧвпавтӧг локтӧма татчӧ велӧдчыны водзӧ.

Сыктывкарын ныв со коймӧд курсын на велӧдчӧ-а, тӧдса нин уна том йӧзкӧд. И бара жӧ тані быдлаӧ пырӧдчӧ. Прӧст здук кӧ эм, пыр аддзысьлӧ ӧткодя мӧвпалысьясыскӧд. Водзмӧстчӧ «МИ» котырын. Оз вунӧд и чужанінсӧ, зільӧ сэтчӧс «ЯНРОД» (Ямало-Ненецкое регионально-общественное движение коми зырян) том йӧзлӧн юкӧнын веськӧдлысьӧс вежысьӧн.

- Юрын уна мӧвп, унатор окота пӧртны олӧмӧ, - висьталӧ Ирина Терентьева. - Ме восьса став выльторйыслы, зіля пыр сӧвмӧдны ачымӧс да мекӧд орччӧн олысьясӧс. Университет помалӧм бӧрын менӧ виччысьӧны Салехардын, сэтчӧс телерадиокомпанияын кута нуӧдны «Изьватас олӧм» телепередача да «Зарни куд», «Чужан му» радиопередачаяс.

Том морт ёна радейтӧ коми серъяс. Кепысь-носки-шапка сылӧн бытьысь коми серъяса. Ачыс кужӧ кысьыны бисерӧн, вышивайтчӧ. Ёна радейтӧ лыддьыны коми литература, кӧть эськӧ пӧ зэв сьӧкыд литература кывсӧ дзик пыр гӧгӧрвонысӧ. Медрадейтана лыддянторйыс – Яков Рочевлӧн «Кык друг», изьваса ногӧн пӧ гижӧма да.

Y 13 2

Ирина радейтӧ изьваса коми ног сёйны кын яй да чери. Ок, и чӧскыд пӧ наӧн номсасьнытӧ! Ёна пӧ гажӧй тані бырӧ сэтшӧмторсьыс.

Ныв радейтӧ и быдлаӧ ветлыны. Вӧлӧма нин Францияын, Германияын, Амстердамын, Польшаын, Белоруссияын, Финляндияын, Нидерландыын, Швецияын. Россияса уна пельӧс нин кытшовтӧма. Со медбӧръя ветлӧмъясыс – нывъёртъясыскӧд Казаньӧ, гӧститны Ярославльӧ, бать-мамыскӧд да чой-вокыскӧд Пятигорскӧ.

Ёна кыскӧны сійӧс гӧраяс, ӧд чужлӧма сійӧ буретш Уралса изъяс дорын. И нӧшта шуӧ, верӧс саяд пӧ бытьысь пета коми мужичӧй сайӧ, коді быдторсӧ кужӧ вӧчны.

Бӧркыв пыдди

Ирина Терентьева йылысь позьӧ гижны уна. Сылӧн водзмӧстчӧмыс тыдалана. Сэсся и кор мортыс кужӧ сёрнитны, висьталӧ ставсӧ стӧча да пӧрадок тӧдӧмӧн, водзӧ вылас колана мӧвпъясӧн олӧ, весиг чайтсьӧ мукӧддырйиыс, мый он студенткакӧд сёрнит, - ыджыд мортӧдз вермас быдмыны. Мед эськӧ сідзи и лоӧ.

А нӧшта на зэв бур, мый и Урал из сайын олӧны комияс, быдтӧны ичӧтик коми посниуловӧс, велӧдӧны сёрнитны найӧс комиӧн жӧ, вужйӧдӧны наӧ коми традицияяс, велӧдӧны пыдди пуктыны Чужан му да кыв-культура.

Надежда ПУНЕГОВА.

Снимокъясыс Ирина Терентьевалӧн гортса архивысь.

 

Добавить комментарий


наверх