Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Кытчӧ инавны олӧма йӧзӧс?..

Кытчӧ инавны олӧма йӧзӧс?..

KM 6 1

Сыктывдін районса Зеленечын кӧсйӧны пӧдлавны ыджыд арлыда йӧзлысь да вермытӧмъяслысь  керка. Сэні олысьяссӧ ыстӧны бӧр гортас. А на пыдди кӧсйӧны овмӧдны патера вылӧ ӧчередын сулалысьясӧс.

—Та йылысь миянлы юӧртіс кольӧм вежонӧ Зеленеч сиктса администрацияӧн веськӧдлысь. Шуис, мед мунам рӧдвуж ордӧ либӧ кытысь локтім. Но кӧні миянӧс виччысьӧны? — Выль во кежлӧ татшӧм со «козинсьыс» синваныс доршасьӧ олӧма йӧзлӧн.

KM 6 2

Кыдзи висьталӧны найӧ, ветеран керкалысь нимсӧ некымынысь нин вежлӧмаӧсь. Ӧні сійӧ шусьӧ «Специализированный жилой дом», и коммунальнӧй услугаӧн могмӧдӧмысь вештысьӧны асьныс олысьясыс. Зеленечын «пӧрысьяслӧн ӧтуволанінын» дас кык ветеран. Быдӧнлӧн аслас торъя жыр. Отсасьӧны налы соцработникъяс: пелькӧдчӧны, песлалӧны кӧлуйсӧ, пуӧны сёян, ветлӧны лавкаӧ.

Мӧдаръюгыдӧ?

Владимир Александрович Вавилин  Комиӧ локтӧма 1974 воын. Уджалӧма-олӧма Сыктывдінса Мандачын. Мужичӧйлы уна шог ковмӧма пыкны. Дас вит во дӧзьӧритӧма парализуйтӧм гӧтырсӧ. Сэтшӧм пӧ сьӧкыд вӧлӧма, мый ачыс асьсӧ помавны видлӧма. Дзебӧма кыкнан писӧ. Ӧтиыс кувмӧныс доймалӧма вӧрын, юр вылас кер усьӧма. Мӧд пиыс веськалӧма машинаӧн туй выв неминучаӧ. Олӧма йӧзлӧн керкаын Владимир Александрович 2008 восянь.

—Кор ме татчӧ локті, йӧзлы социальнӧй отсӧг сетысьяс шуисны, мый нэм помӧдз тані кута овны. Ме ог тӧд, кытчӧ мунны, — майшасьӧ   пенсионер.

KM 6 3

Елизавета Ивановна Могилевцева татчӧ вуджӧма Сыктывдін районса Гаръяысь. Дас ӧти арӧссянь сійӧ  олӧма ӧтнас. Батьыс усьӧма война вылын, мамыс кувсьылӧма водз.  Война кадӧ Елизавета Ивановна мукӧд челядь моз мырсьӧма  колхозын. Тшыгъялӧмаӧсь, но фронтлы ыстӧмаӧсь став урожайсӧ. Комын кык во ань вузасьӧма лавкаын Луздор районын. Сэсся дзоньвидзалуныс омӧльтчӧма да, вайӧмаӧсь Зеленечӧ ветеранъяслӧн керкаӧ.

Валентина Алексеевна Бесхлебнаялы 72 арӧс. Ӧкмыс во нин тані олӧ. Яснӧгын киссьӧм керкаыс, гашкӧ пӧ, оз нин и сулав да. Пиыс 19 во нин кыз му улын, олӧма нывбабалы отсасьысьыс некод абу. Ачыс беддьӧн ветлӧ.

—Пӧрысьясӧс вӧтлӧм бӧрын, татчӧ кӧсйӧны овмӧдны мукӧдӧс. Мед, сідзкӧ, йӧрас кодйӧны гу да лыйлӧны миянӧс. Сэки некодлы нин ог  мешайтчӧй...— нормӧма Валентина Алексеевна.

Улич вылӧ?

KM 6 4

Збыльысь-ӧ кольӧны ветеранъяс юр сюянінтӧг, юалім Зеленеч сиктса администрацияӧн веськӧдлысь Марина Цывуниналысь. Сылӧн висьталӧм серти, олӧма йӧз веськалӧмаӧсь «дзугйӧ». А октӧмаӧсь лэчсӧ республикаса чинаяс, кор 2012 воын кири-тӧмаӧсь стрӧйбасӧ «асланыс борд увсьыс». Сэтчӧдз керкаыс вӧлӧма Коми Республикаса йӧзӧс социальнӧя могмӧдан агентстволӧн. Буретш найӧ и овмӧдлӧмаӧсь сэтчӧ киссьӧм нин стрӧйбаысь Сыктывдін районса ӧтка пӧрысь йӧзӧс. Но ветеранъяскӧд  соцагентствоын зільысьяс патера кӧртымалӧм йылысь некутшӧм сёрнитчӧм абу кырымавлӧмаӧсь.

Нӧшта на водзынджык тайӧ ӧтуволаніныс вӧлӧма Зеленечса видз-му овмӧслӧн, да найӧ и могмӧдлӧмаӧсь жырйӧн ассьыныс уджалысьяссӧ. Татшӧм лыдас сӧмын ӧти баб — Александра Григорьевна Торлопова, и вӧтлыны сійӧс некод оз вермы.  Мукӧдыслӧн жӧ, кыдзи шуи нин, патера кӧртымалӧм йылысь некутшӧм сёрнитчӧм абу, кӧть и олӧны сэні уна во.

Шуам, Владимир Александрович Вавилин олӧ 2008 восянь. Кольӧм во сійӧ шыӧдчылӧма Сыктывдін районса ёрдӧ, медым сетасны патера кӧртымалӧм йылысь кабала, но нинӧм абу артмӧма. Ёрдын сӧмын шуӧмаӧсь, мый мужичӧй збыль сэні олӧ.

—Меным найӧ ставныс зэв жальӧсь, — висьталӧ Марина Анатольевна. — Кык воысь дыр нин котрала ёрдӧ, чина йӧз дорӧ, мед корсьны петан туйсӧ, но весьшӧрӧ.  Керкасӧ ӧтилы-мӧдлы мачалісны,  а сэні олысьяс дорӧдз быттьӧ некодлы мог абу. Видз-му овмӧс 1995 воын сетіс керкасӧ Сыктывдін районлы, вӧдитчисны сыӧн социальнӧй юкӧнын зільысьяс. А сэсся 2011 вося февраль 28 лунӧ эмбурӧн веськӧдлан управление киритіс жыръяссӧ государстволӧн жилфондысь.  2012 воын  Коми Республикаса социальнӧй юалӧмъяс  агентство нин вуджӧдіс стрӧйбасӧ миянлы, Зеленеч сиктлы.

—Ми вӧлім паныд, — водзӧ висьталӧ Марина Анатольевна. — Ас тшӧт весьтӧ кутны-дӧзьӧритны  ог вермӧй. Нӧшта на лоис сідз,  мый тайӧ керкаыс абу нин социальнӧй стрӧйба, а ӧтуволанін. Кӧть эськӧ та кузя кабалаяссӧ абу на лючки лӧсьӧдӧма.

—И артмӧ, мый Зеленеч сиктса администрациялӧн  эм «тыртӧм» керка, кытчӧ позьӧ овмӧдны ӧчередын сулалысьясӧс. Татшӧмыс миян 10 семья. На лыдын и бать-мамтӧмъяс,  и йӧзӧдлытӧм войнаса ветеранъяс... Патерасӧ виччысьӧны найӧ 1989 восянь. И мый меным вӧчны? Тайӧс ме юавлі нин и районса, и республикаса чинаяслысь, и ведомствоясын зільысьяслысь, и прокуратуралысь, но вочакывйыс абу. Гижӧдчылі республикаса Юралысьлысь удж вӧчысь Сергей Гапликов дорӧ, но менӧ сы дорӧ эз лэдзны. Шуисны, мый сы дорӧ вермасны веськавны сӧмын прӧстӧй йӧз. Веськыда шуа,  быттьӧ менам киӧ сетісны чер, на пӧ керышт. И дерт, сэсся медвойдӧр меным таысь ковмас кывкутны, ёрдӧдз кӧ делӧыс воас, — пикӧ жӧ воӧма Марина Анатольевна.

KM 6 5

Зеленеч сиктса юралысь сідзжӧ туясьӧма, ветеран керкаын олысьяслӧн эм-ӧ матысса рӧдвужыс да мӧд оланін. Тыдовтчӧма, кызвыныслы збыльысь некытчӧ муннысӧ. Шуам,  Лидия Модестовна Габова Гаръяысь керкасӧ козьналӧма. Выль кӧзяиныс вузалӧма нин мӧдлы. И кытчӧ воштысяс ӧні Модестовна?..

Геннадий Николаевич Прокушев да Раиса Николаевна Фурманова гозъя овлӧмаӧсь Пӧингаын 2010 воӧдз. Тӧдса, посёлоксӧ «пӧдлалӧмаӧсь», а йӧзсӧ вуджӧдӧмаӧсь Выльгортса Пичипашняӧ. Олӧма гозъя сідз шусяна переселение кузя  уджтасас эз нин веськавны...

Ставнысӧ, дерт, ог лыддьӧдлӧй. И сідз, кытчӧ инавны олӧма йӧзӧс?..

Екатерина МАКАРОВА.

Сыктывдін р.

Снимокъясыс авторлӧн.

 

Добавить комментарий


наверх