Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Марья тьӧт да Кӧза

Марья тьӧт да Кӧза

khatanzeyskiy

Вой шӧрӧ Кремльса Спасскӧй башняын часілысь дас кыкысь точкӧмсӧ кывны-аддзыны окотитысьыс быд здук содӧ.

Ӧтияс кӧсйӧны, медым ӧдйӧджык мынтӧдчыны помся кыс-сьысь корпоративъясысь. Да ас оланінын муса семья котыркӧд ӧти пызан сайын точкысьны шампанскӧйӧн. Бӧръяысь... Таво вы-лӧ! А сэсся Важ выль воӧдз весиг не кыйкъявны холодильникын кӧдзӧдӧм вина доз вылӧ.

Мӧдъяс, медым кокниа ышлолыштны да кыпыда колльӧдны вобыд ыджыдалысь Кӧзаӧс. Сылысь асныралӧмсӧ дыр на кутасны казьтывны кодсюрӧ.

Вермас ӧмӧй вунны, мый буретш 2015 воын сюра «лешак» качӧдіс доллар-евротӧ Россияын некор вӧвлытӧм тшупӧдӧдз да та бӧрын бара на донсялісны сёян, паськӧм, техника, услугаяс... Весиг Марья тьӧтка, коді оз тӧд, кӧні сійӧ сӧтана Америкаыс, саридзсайса сьӧм дурӧм вылӧ ыстысьӧмӧн, тулыснас лэптіс сюрукыслӧн куйӧд вылӧ дон!

Комиын олысьлӧн паметьӧ йиджис тавося сентябрь 19-ӧд лун. Сэки погона войтыр арестуйтісны татчӧс медыджыд власьт кутысьясӧс, мыждісны найӧс республикаса озырлун оланпас торкалӧмӧн асэмбуралӧмын да йӧршитісны сутшкасьысь сутуга сайӧ виччысьны ёрдлысь помшуӧм. Йӧзлы тайӧ юӧрыс балябӧжаныс вачкӧм кодь лоис: вӧвлӧм чинаяс тӧрыт на велӧдісны найӧс, мый овны колӧ судзсьӧмӧн, ышӧдісны быд ногыс тышкасьны коррупциякӧд, а сэккоста асьныс... Ко-лӧкӧ, водзӧ на гусясисны, да веськалісны со Кӧзалӧн сюр йылӧ. Ви-дзӧдӧмпӧръя, некымын Выль во ковмас паныдавны налы нар вылын.

Татшӧмсяма юӧрыс сюрӧ уна, но восӧ, кутшӧмӧн кӧть сійӧ эз вӧв, колӧ сигӧртны сӧмын бур казьтылӧмӧн.

Таво кыпыда пасйим Ыджыд Вермӧмлы 70 во тырӧм. Россиялы паныда мирӧвӧй санкцияяс понда ырыштчим сӧвмӧдны пытш-кӧс рынок, ловзьӧдны промышленносьт, видз-му овмӧс. Аръявылыс Марья тьӧтка америкаса вылӧ сӧткӧмӧн бӧр чинтіс куйӧд донсӧ, некод пӧ оз ньӧб да. Коми Республикаын Юралысьлысь удж вӧчысь Сергей Гапликов эскӧдіс, мый ставнымӧс «заколебитас», но овны кутам европасаысь бурджыка. А нӧшта... менам пи чужис. Буретш татшӧм козин ме кори Кӧдзыд пӧльлысь Выль во войӧ курантъяслӧн бовгигӧн...

Пыдди пуктана лыддьысьысьяс, дона ёртъяс, чолӧмала тіянӧс матыстчысь Ӧбезьяна воӧн да сиа, медым збыльмасны став гуся кӧс-йӧмныд! Кольӧй дзоньвидзаӧн, шудаӧн, а син курӧдана шогыс мед нэм кежлӧ вушйӧ тіян паметьысь!

Григорий ХАТАНЗЕЙСКИЙ.

 

Добавить комментарий


наверх