Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Колӧ ёнджыка песны асьтӧ...

Колӧ ёнджыка песны асьтӧ...

KM 25

Вадим Изъюров — том специалист, некымын тӧлысь на велӧдӧ Нёбдінса школаын физкультура. Но сиктад быдӧн быттьӧ ки пыдӧс вылын, абу сьӧкыд донъявны выльӧн локтӧмтӧ. Кыдз тыдовтчӧ, Вадим Изъюров лоӧма ас мортӧн и верстьӧлы, и челядьлы.

Школаӧ пыралігӧн (буретш сэки ставныс дасьтысисны Выль вося гаж кежлӧ) казялім, кыдзи ныв-зон малямушъяс моз физкультура велӧдысь дорын и гӧгралӧны-бергалӧны. Бур, кор челядьлы верстьӧ мортыд — медматысса ёрт. Сыкӧд позьӧ и гусяторйӧн юксьыны, а ковмас кӧ, отсӧгла на шыӧдчывны...

Важӧн казялі, мый физкультура урокыд торйӧн нин воӧ сьӧлӧм вылас челядьлы. Да и кыдзи мӧд ногыс? Ӧд буретш вильшасиг-пессигад вильышпозъяслӧн содӧ выныс, найӧ ӧдйӧджык верстяммӧны-сӧвмӧны...

—Чужи ме Пезмӧгын, — сёрниӧ воим да висьталіс Вадим Александрович. — Ичӧтдырйи радейті котравны лызьӧн, ворсны волейбол-баскетболӧн, гӧньлӧдлыны кучик мач. Дас ӧтиӧд класс бӧрын ысті документъясӧс Шойнатыса мӧд номера техническӧй училищеӧ, босьті сэні автомеханиклысь специальносьт. Мыйкӧдыра уджышті Кӧрткерӧсса ДРСУ-ын.

—Ӧтчыд вочааси Адзорӧмса шӧр школаысь физрук Владимир Макаровкӧд. Сійӧ вӧзйис меным пырны велӧдчыны юркарса 2 номера педколледжӧ физкультура отделениеӧ. Шуис на, тэ пӧ вӧлін шӧр школаын бур спортсменӧн, а сідзкӧ, тэысь артмас бур педагог-тренер. Думыштчылі велӧдысьлӧн кывъяс вылын, да... сетчи юр-карӧ. Кокньыда сдайті эк-заменъяс, лои педколледжса студентӧн.

—Студенталігӧн некор эг весьшӧрӧ чужъяв тӧв. Нёльӧд курсын велӧдчигӧн медаси Эжваса детдомӧ физкультура велӧдысьӧн. Сэтчӧс челядькӧд эз вӧв кокни воӧдчыны ӧти кывйӧ. Но некор эг норасьлы, век зіли венны падмӧг-мытшӧдсӧ.

—Кывлі, мый юркарын велӧдчигӧн «висьмылӧмыд» тшӧтш и каратэӧн. Весиг республикаса ордйысьӧмъяс вылын косясьлӧмыд...

—И ӧні на радейта спортлысь тайӧ юкӧнсӧ. Но бӧръя кадӧ меным сьӧлӧмӧ йиджис рукопашнӧй кось. Кыкысь вежоннас ветлывла Кӧрткерӧсӧ, кӧні нуӧда та кузя секция.

—А ветлывлан-ӧ ордйысьӧм вылӧ?

—Школаын челядьӧс велӧдігӧн прӧст кадыс шоча вичмылӧ. Бур, менам эм аслам автомашина, кодӧн журкнитлывла и юрсиктӧ, и весиг Сыктывкарӧ. Неважӧн ветлі Емваӧ, кӧні вӧлі рукопашнӧй кось кузя ыджыд турнир.

—И мый жӧ? Чуктіс-ӧ тэныд кутшӧмкӧ награда?

—Емваын ордйысигӧн босьті мӧд места. Дерт, зэв нимкодь вӧлі. Локтан вося январын юркарын мунас рукопашнӧй кось кузя турнир. Надейтча и сэтчӧ ветлыны.

—Вадим Александрович, Нёбдінса школаын нелямын гӧгӧр велӧдчысь. Ті велӧданныд и посни арлыдаясӧс, и верстьӧджыкӧс. Арлыдаджык ныв-зонкӧд и урокъ-ясыд мунӧны кыдзкӧ кыпыдджыка, а вот ичӧтик «шпингалетъяс» дорын ноксигӧн оз-ӧ волывлы юрад, мыйла ставыс тайӧ меным колӧ?

—Ме велӧдчысьясӧс некор ог юклы жеб да вына вылӧ. Воас кад, и, колӧкӧ, ӧнія ӧк-мыс-дас арӧсаясысь ыджыдджык на тӧлк лоас. Сэсся ме — велӧдысь, и меным став челядьыс ӧткодя мусаӧсь да донаӧсь...

—Но а кыдзи тіянӧс донъялӧны сиктса войтыр?

—Ме — коми морт, а Нёб-дін — нэмӧвӧйся коми сикт, тані быдӧнкӧд ӧти кывйӧ кыдзкӧ ӧдйӧджык воан и. Велӧдысьыдлӧн уджыс сэтшӧм — унджык кадсӧ колляла школаын. Луннас физзалын урок нуӧда, а рытнас, ог кӧ тэрмась Кӧрткерӧсӧ, волейболӧн да баскетболӧн ворсӧм кузя секция. Ӧні нӧшта мини-футболӧн ставным «висьмим». Неважӧн юрсиктӧ «ичӧт» футболнад ветлім, общеобразовательнӧй школаяс пӧвстын медводдза места шедӧдім, — тӧдчӧдіс Вадим Александрович.

—Эмӧсь-ӧ тіян школаын бур лыжникъяс, волейбол-баскетболӧн, мини-футболӧн ворсысьяс?

—Кыдз нӧ натӧгыс. Со зэв бура ворсӧны «ичӧт» футболӧн Даниил Курлович, Егор Ветошкин, Дмитрий Савин. Кутасны кӧ водзӧ вын-эбӧссӧ песны, вермасны быдмыны бур спортсменъясӧдз.

—Кутшӧмӧсь водзӧ вы-лӧ думъясныд?

—Кӧсъя аддзыны школаса велӧдчысьясӧс дзоньвидза, крепыд йӧзӧн. Ог дугдыв дольны аслам быдтасъяслы: винёвъяслы да удалъяслы кык пӧв кокниджык вӧчны ыджыд олӧмын медводдза воськовъястӧ. А сідз-кӧ, оз ков дышӧдчыны, колӧ вӧрны да ёнджыка песны асьтӧ. Мича да статя йӧзыдлы нюмъёвтӧджык шудыд...

 

ЛЫДДЬЫНЫ ВОДЗӦ...

 

Добавить комментарий


наверх