Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Оліс-выліс мойд...

Оліс-выліс мойд...

Декабрь 13-15 лунъясӧ юркарса 18-ӧд номера школаын ми нуӧдім «Оліс-выліс мойд» фестиваль-конкурс. Воддза кык лунас петкӧдчисны миян 1-8 классъясысь ныв-зон, а коймӧд лунас – Сыктывкарса дас велӧдчанінысь челядь – ставыс чукӧрмыліс 400 гӧгӧр морт.

KM 14 1

Ёма-Бабаӧс, Вӧрсаӧс, Яг мортӧс, повтӧм вӧралысьӧс, сиктса войтырӧс, уна сикас пемӧсӧс ворсігас найӧ шензьӧдісны видзӧдысьясӧс да петкӧдчӧмсӧ донъялысьясӧс коми кыв бура тӧдӧмнас, мича сёрнинас, артисталан сямнас, синмӧ шыбитчана паськӧмнас да декорацияяснас. Жюриӧ пырысьяс пасйисны, челядь пӧ лӧсьыда дасьтысьӧмаӧсь фестиваль кежлӧ, тыдалӧ пӧ и налӧн, и велӧдысьясыслӧн, и бать-мамыслӧн конкурс вылын бура петкӧдчыны кӧсйӧмыс.

KM 14 2

Медводдза лунас ассьыныс енбисӧ петкӧдлісны 18-ӧд номера школаысь начальнӧй классъ-ясын велӧдчысьяс. Медся ичӧтъяс дасьтӧмаӧсь Сӧлӧ баблӧн «Чери кыйысь кань» мойд серти сценка. Жюри вылӧ донъяліс уджсӧ, шуис «Актёрлысь сямсӧ медбура петкӧдлысь» нимпасын вермысьӧн, а Александр Парначёвлы сетіс «Медбура ворсӧмысь» диплом.

Окотапырысь лӧсьӧдчӧмаӧсь конкурс кежлӧ 2 «а» классысь зонпосни, дасьтӧмаӧсь шылад-йӧктӧмъяса «Сёркни» мойд.

–Паськӧмсӧ, декорациясӧ лӧсьӧдны отсалісны бать-мам, – висьталіс Валентина Николаевна Оптовко. – И кутшӧма радлісны, кор 2-ӧд классъяс пӧвстын миянӧс вермысьясӧн шуисны. Бать-мамыс челядьлы ыджыд торт козьналісны. Верстьӧлы нимкодь вӧлі, мый мойдъясыс комиӧн юргисны.

KM 14 3

2 «г» класс петкӧдліс Сӧлӧ баблысь «Ур да ош» мойд. Налы сетісны йӧзкостса традицияяс видзӧмысь диплом. Мария Сазанскаялы ошкӧс ворсӧмысь вичмис грамота.

Степан Раевскийлысь «Отсӧг» мойд сувтӧдӧмаӧсь 2 «б» классысь ныв-зон, а 2 «в» классаяс – Сӧлӧ баблысь «Повзьӧдчысь шырӧс». Сӧлӧ баблысь жӧ «Авзан понсӧ» петкӧдлісны 3 «а»-ысь ныв-зон. Мойдас петкӧдлӧма йӧзсӧ и бур, и омӧль боксянь, да том артистъяслы удайтчис восьтыны быд мортлысь этшсӧ. Дмитрий Мальцев да Анастасия Неклюдова ворсісны Митрейӧс да детинкалысь мамсӧ, сяммисны петкӧдлыны семь-яын ӧта-мӧдӧс радейтӧмсӧ, гӧгӧрвоӧмсӧ. Уджач вӧралысь Ласей дедӧн вӧлі Руслан Барановский. Наян озыр мужичӧйӧс ворсіс Артём Трофимов. Мария Круковалы вичмис кывъястӧм роль – Авзан понлӧн. Мойдын петкӧдчӧмыс мунӧ грездса ярманга дырйи, сэні вузасьӧны кӧлачӧн и чериӧн, пӧжасӧн и пӧткаӧн, кыӧм-вурӧмторйӧн и ош куӧн. Ярманга дырйи и йӧктӧны да гудӧкасьӧны – тайӧс ставсӧ найӧ петкӧдлісны жӧ.

KM 14 4

Уджыс челядьлӧн абу вӧлӧма весьшӧрӧ, коймӧд классъяс пӧвстын шедӧдісны медводдза места.

3 «б» класс петкӧдліс «Велӧдчы крыса кыйны» гажа мойд, а 3 «г»-ысь посниулов – Сӧлӧ баблысь «Ёма пинь». Репетируйтчыны найӧ заводитӧмаӧсь конкурсӧдз тӧлысь войдӧр. И бара жӧ бать-мамыс ёна отсасьӧмаӧсь. Карын быдмысь роч челядьлы жӧ кажитчӧма комиӧн сёрнитны.

Вылӧ лои донъялӧма и 4 «г» класслысь «Руч да кӧч» петкӧдчӧмсӧ. Найӧ пӧ, кодлы вичмӧма роль, гӧрдитчӧмаӧсь, мый сцена вылын кутасны ворсны. Тшӧтшъяяс пӧвстын медводдза места босьтӧмаӧсь да весиг чеччалӧмаӧсь – со ӧд кутшӧм нимкодь, кор уджыд сьӧлӧм вылад воӧ.

KM 14 5

«Петук висьӧ» мойдӧн петкӧдчис 4 «а», а 4 «б» класс – Илля Васьлӧн «Кӧчлӧн праздникӧн». Сцена вылын быттьӧ збыльысь пасйисны кӧчлысь нимлунсӧ: самӧварӧн, пирӧг-шаньгаӧн.

–Шемӧсмӧдіс, мый челядьлы сэтшӧм окота вӧлі ворсны коми мойдын, – висьталіс Наталья Николаевна Житкова.

Фестивальлӧн мӧд лунӧ сямсӧ петкӧдлісны 5-8 классын велӧдчысьяс. Вӧр-валӧн, йӧзкостса шыладлӧн коми, сьыланкывъяслӧн шыяс улӧ видзӧдысьяслӧн син водзын сувтісны пӧль-пӧчлӧн олӧмыс, комияслӧн обычайясыс, традицияясыс.

5 «б» вӧзйис видзӧдысьяслы Илля Васьлысь «Тӧрӧкан» мойд серти петкӧдчӧм. Ворсысьяс быттьӧ олісны сцена вылын. Медся ёна кажит-чӧмаӧсь йӧзыслы повзьӧдлана уска Тӧрӧкан да Ош. Челядь бура ворсісны и Левӧс, Тигрӧс, Пышкайӧс, Сюзьӧс, Кӧинӧс... Дерт, кыдзи и мукӧд мойдын, бурыс вермис омӧльсӧ, а ворсысьяс шедӧдісны 5-ӧд классъяс пӧвстын I места.

KM 14 6

«Дыш морт» йӧзкостса мойд дасьтӧма вӧлі 5 «а» класс. Андрей Целищев да Елизавета Рюхова кужӧмӧн петкӧдлісны дыш мужичӧйӧс да сылысь зіль гӧтырсӧ.

Квайтӧд классъяс пӧвстын вермис 6 «м». Челядь ворсісны «Ёма да кык чой» мойд. Ина артистъясӧн петкӧдчисны сцена вывсянь Павел Поздоровкин (Ёмаӧс ворсіс) да Алексей Павлов (керкаӧн сійӧ вӧлі). «Лёк сар» сценкаӧн мӧд места шедӧдіс 6 «д». Быдӧн сьӧлӧмсяньыс ворсіс ассьыс рольсӧ: визув да гора гӧлӧса суседкаӧс, шогалысь бать-мамӧс, асныра сарӧс, а Вячеслав Филиппов быттьӧ весиг вунӧдліс, мый сы мында видзӧдысь чукӧрмӧма залын, повтӧг ворсіс Иванӧс.

–Локтан воӧ челядь бара на кӧсйӧны петкӧдчыны татшӧм фестиваль вылас, – висьталіс Анастасия Андреевна Ионаш.

6 «к» класс сувтӧдӧма «Ош видзысьяс» мойд, петкӧдчӧмыс муніс и вӧрын, и ош керкаын, и куим чойлӧн оланінын.

Мӧд во дорвыв нин фестивальӧ пырӧдчӧны 7 «б» классын велӧдчысьяс. Та пӧрйӧ найӧ дасьтӧмаӧсь Михаил Лебедевлысь «Яг мортсӧ». Кирилл Нестеров сцена вылын вӧлі Райдалӧн батьӧн, озыр кыйдӧса вӧралысьӧн, а нывлӧн киподтуя мамӧн – Полина Турубанова, Александр Кононов – Яг мортӧн, Иван Липин – Туганӧн, Ксения Вусатая – Тунӧн. Залӧ чукӧртчӧмаяслы сьӧлӧм вылас воис и Райда – Анастасия Попова: видзӧдан сы вылӧ да быттьӧ театрын пукалан, сэтшӧм лӧсьыда ворсіс. Тайӧ ныв-зонмыс вермисны 7-8 классъяс пӧвстын.

«Ёма да чӧрс кузьта ныв» мойд дасьтӧмаӧсь 8 «г» классын велӧдчысьяс. Комисӧ оз велӧдны, но сцена вывсянь юргис мича коми сёрни.

–Эз вӧв кокни велавны коминас лӧсьыда сёрнитны, и челядь быд прӧст здукӧ репетируйтісны, – висьталіс Нина Ивановна Косолапова. – Зілисны ставӧн, медым видзӧдысьяс збыльысь быттьӧ веськавлісны коми мойдӧ.

Кольӧм во 7 «в» класс петкӧдліс «Чукляӧс», а таво «Нянь да биын» водзӧ нуӧдісны вӧралӧм йылысь сёрнисӧ. Повтӧм кыйсьысьясӧн вӧліны Владислав Старцев, Дмитрий Казаков, Никита Вежов, Никита Воноканов, Вӧрсаӧс мӧд во дорвыв ворсіс Руслан Коснырев. Налысь петкӧдчӧмсӧ шуисны медбур постановкаӧн.

7 «а» класс жӧ Каллистрат Жаковлысь «Бегство северных богов» гижӧд лыддьӧм бӧрын енъяс йылысь легенда дасьтӧма. Медыджыд Енсӧ ворсіс Дмитрий Лезин, а Пемыд Кульӧс – Владимир Сазанский.

Фестивальлӧн коймӧд лунӧ 18-ӧд номера школа восьтіс ӧдзӧссӧ юркарса мукӧд велӧдчанінысь ныв-зонлы. Иван Коданёвлысь «Асныра кӧчсӧ» петкӧдлісны 34-ӧд, «Мудерлуныс тырмӧсӧ» – 27-ӧд, Каллистрат Жаковлысь «Прӧст пӧльсӧ» – 24-ӧд, «Вӧралысь да Чукляӧс» – 12-ӧд, Сӧлӧ баблысь «Аттьӧсӧ» – 43-ӧд, Николай Лютоевлысь «Выльвося мойдсӧ» – 38-ӧд номера школаясысь, Иван Вавилинлысь «Дружнӧй котырсӧ» – А.Пушкин нима гимназияысь том артистъяс. 18-ӧд номера школаысь ныв-зон петкӧдлісны кык спектакль – «Ёма да кык чой», «Тӧрӧкан». «Петук, Кань да Руч» йӧзкостса мойд дасьтӧмаӧсь 30-ӧд на 4-ӧд номера школаясысь челядь.

Гран-присӧ жюри сетіс кык котырлы: 30-ӧд номера школасалы «Петук, Кань да Руч» мойдысь да 18-ӧд номерасалы «Тӧрӧканысь».

* * *

Фестиваль дырйи жӧ вӧлі нуӧдӧма серпасъяслысь конкурс, кытчӧ ассьыс уджъяссӧ ыстӧмаӧсь юркарса 18 школаын 80-ысь унджык велӧдчысь.

Мойдыд пӧ, шулӧма паськыда тӧдса педагог В.А.Сухомлинский, петкӧдлӧ йӧзкостса культуралысь ыджыд озырлунсӧ да отсалӧ кагалы сьӧлӧмнас и ловнас гӧгӧрвоны ас войтырсӧ. И фестивальыс тшӧтш жӧ пуктіс таӧ ассьыс пай, мойдъяс пыр тӧдмӧдіс быдмысь зонпосниӧс бурнас да омӧльнас, коми войтырлӧн олӧм вылӧ видзӧдласнас.

Ирина Чумакова,

Сыктывкарса 18-ӧд номера школаын

велӧдысь.

 

ЛЫДДЬЫНЫ ВОДЗӦ...

 

Добавить комментарий


Комментарии  

# Мария 13.01.2017 16:26
бур лун! )
Ответить | Ответить с цитатой | Цитировать
# Мария 13.01.2017 16:26
Зэв ыджыд аттьо ворсысьяслы! Ыджыд молодечьяс!!!
Ответить | Ответить с цитатой | Цитировать
наверх