Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Кӧдзыд пӧльлӧн чужанінын

Кӧдзыд пӧльлӧн чужанінын

KM 13 1

Ӧти рыт батя-пиа садикысь локтӧм бӧрын пыригмоз на, порог вомӧн весиг эз удитны воськовтны, шуисны меным, кӧсъям пӧ Югдінӧ Кӧдзыд пӧль ордӧ гӧститны ветлыны! Но, мися, зэв тай бур...

Аскинас пуксим верӧскӧд ноутбук сайӧ, пырим ӧтуввезйӧ да вель ӧдйӧ корсим гостиница (комиӧн пӧ гӧстиница, — шуис Егорка пиӧй) да ньӧбим поездӧ билетъяс.

И со пукалам нин поездын, мунам Кӧдзыд пӧль дорӧ!

Сыктывкарсянь медводз воим Пырасӧ, сэні пуксим автобусӧ да рытнас нин веськалім Югдінӧ.

Мӧд лунас мӧдӧдчим Кӧдзыд пӧльлӧн вотчинаӧ. Сійӧ Устюгсяньыс километр 15 сайын, пожӧма ягын. Автобусыс сэтчӧ ветлӧ зэв гежӧда, и ми таксиӧн мунім. Пыранінас мынтысим, билетыс лунтыр кежлӧ артыштӧма.

Медводз мунім Мойдъяслӧн туй кузя, кӧні паныдалім Ёма-бабаӧс, Шуршикӧс — Кӧдзыд пӧльлы отсасьысьӧс, багатырӧс да мойдъясысь мукӧд геройӧс. Найӧ дасьтӧмаӧсь миянлы мы-тшӧдъяс — колӧ вӧлі нӧдкывъяс тӧдмавны, пос вуджны, черань веза лабиринтті мунны. Сӧмын кор ставсӧ венім, вермим мӧдӧдчыны Кӧдзыд пӧльлӧн керкаӧ.

Керкаас сылӧн мыйыс сӧмын абу! Обсерватория, лаборатория, библиотека, коз пулӧн музей...

KM 13 4

Музеяс чукӧртӧмаӧсь став Россияысь челядьӧн вӧчӧм-мастеритӧм коз пуяс. Мыйысь сӧмын сійӧс абу вӧчӧмаӧсь! И колльысь, и кабалаысь, и дӧраысь, весиг пинь весалан щӧткаысь да лызь ныръясысь! Эм и пӧтӧлӧксянь увлань юрӧн ӧшалысь коз пу.

Библиотекаас позьӧ тӧдмасьны уна сикас войтырлӧн мойдъясӧн. Эм торъя жыр, кӧні петкӧдлӧмаӧсь Кӧдзыд пӧльлысь ёртъяссӧ — Костромаысь Снегурочкаӧс, Яренскысь Матушка-Зимаӧс, Кировысь Кикимораӧс.

Аддзылім ми Кӧдзыд пӧльлысь и узьланінсӧ, и вежсянінсӧ. Паськӧм-кӧмкотыс сылӧн уна! И мичасьыс-мичаыс, и исласяныс, и гожсяыс. Гожӧмнас, вӧлӧмкӧ, Пӧльыд ветлӧдлӧ сюмӧд кӧмкотӧн.

Медбӧрын воим Кӧдзыд пӧль дорӧдз. Дас минут и мойвиис сёрнитны сыкӧд. Юаліс челядьлысь, коді кытысь локтӧма, а сэсся зонпосни висьталісны кывбур. Кӧдзыд пӧль ставныслы козьналіс кампет да «верительнӧй грамота», а сы бӧрын ставӧн снимайтчим.

Та вылын и помасис Кӧдзыд пӧлькӧд миян аддзысьлӧмыс.

Сійӧ кольччис аслас жырйӧ, а ми мунім водзӧ. Сылӧн вотчинаын эм зоопарк, кӧні ми час кык ветлӧдлім. Аддзылім йӧраӧс, кӧръясӧс, ош-кӧин-ручӧс, лэбачьясӧс, а кроликъяссӧ позис весиг киӧ босьтлыны да мольӧдыштны. Корисны пыравны и кузнечаӧ да бурдӧдчан турунъяса аптекаӧ, но ми сэк кежлӧ мудзим нин. Пыралім сӧмын Кӧдзыд пӧльлӧн йи жырйӧ. Сэні ставсӧ вӧчӧма йиысь. Зэв эськӧ кажитчис, но аминь нин кӧдзыд, да ӧдйӧ бӧр петім. А поштаыс игана вӧлі, но Югдінас эм жӧ сэтшӧмыс да, мӧд лунас ми сэтчӧ ветлім.

Вотчинаас лунтыр тырмис гуляйтны. Аскинас шуим видзӧдлыны карсӧ. Карас Кӧдзыд пӧльлӧн эм жӧ резиденция, пошта, мода керка. Резиденцияас пыралім, видзӧдлім. Сэні выльвося открыткаяс чукӧртӧмаӧсь. Мастерскӧйын петкӧдлісны, кыдзи кыӧны вӧлӧгдаса прӧшви. Ёгор сэні Лыммортӧс вӧчис.

А меным медъёна кажитчис Кӧдзыд пӧльлӧн пошта вылын! Челядьсянь тырыс письмӧ, Россия пасьталаысь да весиг мукӧд странаысь гижӧмаӧсь. Ӧткымын письмӧ вылӧ весиг вочавидзӧны, ыс-тӧны поштасяньыс козин.

KM 13 2

Югдін, рочӧн кӧ, Великий Устюг — важся кар. Меным кажитчис, мый эм уна ӧткодьлун Сыктывкаркӧд. Миянын моз жӧ Югдінын эм важся кар, кӧні сулалӧны купечьяслӧн керкаяс, вузасян лавкаяс. Ю пӧлӧныс зэв уна вичко, найӧ помся — вичко бӧрся вичко — сулалӧны. Аминь мича!

Кутшӧмкӧ вичко уджалӧ, кутшӧмкӧ — оз, кӧнкӧ культура учреждение — библиотека, музей. Пыралім этнография музейӧ, вичкоын жӧ меститчӧ. И вичко пытшсӧ аддзылім, и уна кӧлуй-эмбур петкӧдлӧма.

Купеч керкаяс серти тыдалӧ, мый водзті Югдін вӧлӧма вузасьысьяслӧн ыджыд карӧн. Ӧні тайӧ керкаясас кӧні лавка, кӧні детсад, кӧні культура учреждение, и карса администрацияыс вӧвлӧм купеч керкаын жӧ.

Пыралім сёйны кафеӧ, но чӧскыдтӧм да и вывті дона вӧлӧма. Гостиницаын, кӧні олім, чӧскыдджыка пусьӧны и донтӧмджыка вердӧны.

KM 13 3

Купеч керкаяс сайын заводитчӧны пу керкаяс, дзик жӧ Сыктывкарын моз. Уна мичатор позьӧ аддзыны-казявны: и важся карниз-наличник, ӧшиньяс. Чуймӧдіс ӧти керка: веськыда ӧшиньсяньыс вӧчӧмаӧсь каньлы ветлан пос.

Вель окота вӧлі ветлыны «Северная чернь» заводӧ. Сэні эзысь вылын чернёнӧй — сьӧдӧдӧм — серъяс вӧчӧны. Югдінса важся ремеслӧ.

Позис эськӧ видзӧдлыны и мастерлысь уджсӧ, и аслыд видлыны вӧчны узор. Сӧмын тшук сиптысигкежлас воим да, ышловзьыны сӧмын ковмис.

Пыралім заводбердса лавкаӧ да сэтысь видзӧдлім мичаторъяссӧ: эзысь исерга, чунькытш, кикытш.

Гостиницаыс миян вӧлі меститчӧма мича местаын, пожӧма вӧрын, Сухона юлӧн мӧдлапӧлас — Гледенын. Верӧслӧн висьталӧм серти, археологъяс пӧ сэтысь аддзӧмаӧсь, сідз шусяна, гледенскӧй культуралысь слӧй. Важся комилӧн вӧлӧма тайӧ культураыс.

Вежӧраным Югдін колис ас йывсьыс кык сикас видзӧдлас. Ӧтар боксянь кӧ, тӧдчӧ, мый карыс гӧль, туйясыс весавтӧмӧсь, керкаясыс важиникӧсь. А мӧдар боксянь кӧ, кодлы окота ас синмӧн аддзывны важся олӧмсӧ, сэтысь позьӧ унатор видзӧдлыны да тӧдмавны. Чайта, мый и тіянлы окота лои ветлыны Югдінӧ.

Елена Рассыхаева,

erassyhaeva.blogspot.ru

Снимокъясыс Алексей Рассыхаевлӧн.

 

ЛЫДДЬЫНЫ ВОДЗӦ...

 

Добавить комментарий


наверх