Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Мед выльвося войӧ Кӧдзыд пӧль волас...

Мед выльвося войӧ Кӧдзыд пӧль волас...

KM 4 1

Выль воыд — медся радейтана гаж и челядьлӧн, и верстьӧлӧн, кор, чайта, быдӧн эскӧ кутшӧмкӧ дивӧӧ. Весиг верстьӧ лоӧ челядь руаӧн. Тыдалӧ, выльвося войыс збыльысь вежӧ морттӧ.

Ме кӧть и важӧн нин абу челядь, аслам нин кыкӧн быдмӧны, а быд во жӧ выльвося мойдтӧ виччыся.

А дум вылӧ мыйлакӧ ичӧтдырӧй усьӧ. Ыджыдвиддзын бать-мамлӧн керка, орччӧн — ыджыд мамлӧн. Кыкнанныс вевттьысьӧмаӧсь еджыд эшкынӧн. Чайтан, ставӧн нин сэні узьӧны, но... Мишӧ воккӧд виччысям Одыбысь Ира чойӧс. Ыдж-ыд мамлысь юасям, кор нин воасны. А ыджыд мам нырнымӧс чатӧртлас да видзӧдлас сэтчӧ: «Сӧлісны нин автобусӧ, локтӧны, регыд воасны.» А асьным воккӧд думайтам, мыйла ыджыд мамлы ныр розьысь ставыс тыдалӧ? Челядьдырйиыд тай вежӧрыд абу.

И ӧд збыльысь регыд воӧны одыбсаяс: тётя Зоя, дядя Ваня да Ира чой. Ломтысьысь пач водзын ворсам, сёрнитам, сёям мандарин, гранат (ог тӧд кытысь и судзӧдӧ вӧлі тётя Зоя тайӧ фруктысӧ), халва да суктӧм йӧв.

Пачводз дорӧ ылавлам, а сэсся друг ёлка улысь аддзам кампет кулёк да козинъяс: выль колготки, носки, платтьӧ. Кӧдзыд пӧль волӧма...

Ӧні ачым нин Кӧдзыд пӧляла, ёлка улӧ нывъяслы козин пукта. А тіянлы, «Коми му» газет лыддьысьяслы, сиа, мед Кӧдзыд пӧльыд выльвося войӧ волігас мичмӧдӧм коз уланыд пуктас дзоньвидзалун да шуд!

KM 4 3

Улӧс вылӧ кайлам да кывбур лыддям

Комиын ставроссияса Народнӧй фронтӧн веськӧдлысь Елена Ивановалӧн челядьдырся казьтылӧмыс тшӧтш жӧ шонтӧ морӧссӧ:

—Кӧсъя тӧдчӧдны, мый ми челядьдырйи ӧнія зонпоснисьыс ёна торъялім. Сэки миянлы зэв этша мый коліс. Ми вӧлі нимкодясям бенгальскӧй сись ӧзъялігӧн, хлопушка лыям, а сэтысь конфетти киссяс да кутшӧмкӧ маска усяс. Патеранымӧс вӧлі серпантинтӧн мичмӧдам — мича!

Выльвося козлӧн лап вылӧ ӧш-лам яръюгыд кольяс, вӧвъяс, мукӧд чача, а сэсся сідз шусяна дождик. Улас пуктам вата, быттьӧ лым.

Ми сэки эг горшасьӧй. Кӧдзыд пӧльлысь эг корлӧй дона гаджеттӧ да конструктортӧ... Улӧс вылӧ кайлам, кывбур лыддям, и миянлы козьналӧны кампет либӧ мандарин. Ӧні бать-мамлы Кӧдзыд пӧлялӧмыд вывті дона сувтӧ...

Челядьдырӧй коли Печораын. Сэки выльвося коз дорад лымсьыд мыгӧръяссӧ эз вӧчавлыны. Кӧть эськӧ быд йӧрын сулаліс татшӧм козйыс. Ми зонпосни вӧлі асьным Лыммортӧс вӧчам. А выльвося вой бӧрын чеччам да, миян Лыммортыд мичмӧдчӧма мишураӧн да дождикӧн. Коді тайӧс и вӧчис? Дерт, жӧ Кӧдзыд пӧль!

Но первой классын велӧдчигӧн дугді эскыны Кӧдзыд Пӧляд. Тӧд-малі да, мый пашкыр тошкаыс, гӧрд пасяыс — менам ӧти классын велӧдчысьлӧн батьыс.

Ставнытӧ чолӧмала локтан Выль воӧн! Выль воыд — челядьдыр казьтылӧм. Сэки ми эским дивӧӧ, мойдӧ. Да и ӧні мед, кыдзи ичӧтдырйи, став кӧсйӧмныд збыльмас!

KM 4 4

Да тэ Татьяна Николаевна...

—Чужи-быдми Кӧрткерӧс районса Шойнатыын, — висьталӧ В. Савин нима драмтеатрысь артистка Светлана Малькова. — Сиктын вӧлі куим детсад. Ме ветлӧдлі Катыдсаӧ. Кӧдзыд пӧльнас пыр вӧлі пасьтасьӧ детсадйӧн веськӧд-лысь Татьяна Николаевна. Помнита, сійӧ вӧлі зэв стрӧг ань. А дзолядырйи пыр вӧлі думайта, мыйла, мися, Кӧдзыд пӧльыс нывбаба гӧлӧсӧн сёрнитӧ...

Но сійӧ кадыс вӧлі медся шуда! Быд во ми, нывъяс, пасьтасьлім лым чирйӧ, ставӧн — крахмалитӧм платтьӧаӧсь. Гаж дырйиыс козьналасны кампет кулёк, кытчӧ вӧлі пуктӧмаӧсь и печенньӧ да 2-3 мандарин.

Ӧні на сэкся кулёк да коз дукыс кылӧ... И сэкся мороженӧй на со дум вылӧ усис. Весиг веж петіс.

Казьтыла и студенталан кадся Выль во, кор педколледжын на велӧдчи. Олім сэки дружнӧя и аскиа физрукъяс, и роч да коми школаын начальнӧй класс велӧдысьяс, и художественнӧй школаын велӧдысьяс. Быд гаж пасйим ӧтлаын, дерт и, Выль во. Олім витӧд судтаас. Быд жыр дасьтіс кутшӧмкӧ чӧскыд да выль сёян.

Сэки ме медводдзаысь видлі чеснӧка зыртӧм свеклӧ, кытчӧ вӧлі гудралӧма и ӧрек да изюм. Радейтам вӧлі конькиӧн да лызьӧн иславны. Ставӧн быть ӧтлаын.

KM 4 5

Ме ӧд абу ме, а пират

Санкт-Петербургысь киноын да театрын ворсысь Олег Пашнинлӧн челядьдырыс кольӧма Кулӧмдін районса Ярашъюын.

—Ичӧтдырйи радейта вӧлі пасьтасьны выльвося гаж вылӧ кӧчӧн, пиратӧн либӧ военнӧйӧн, — казьтылӧ сійӧ. — Нёльӧд-витӧд классын, стӧчасӧ кор, ог нин помнит, сьӧлӧм вылӧ воӧ вӧлі ӧти нывка.

И ме гижи сылы та йылысь записка, но сетнысӧ эг лысьт, яндыси да.

Мӧвпышті школаын выльвося гаж дырйи пиратӧ пасьтасьны да тадзикӧн матыстчыны сы дорӧ. Ме ӧд, мися, абу ме, а пират, и тадзи кокньыдджык радейтана ныв дорад матыстчыны.

Сідзи и вӧчи. Корси челядь пиысь ассьым сьӧлӧм косьтысьӧс да нуӧді мичмӧ-дӧм коз дорӧ. Киас пукті запискатӧ. А нывкаыд нюмдіс да котӧртіс лыддьыны. Но вочакывсӧ эз и сет. Кӧть эськӧ ёна виччыси...

KM 4 2

«Зарни пӧра»

Мекӧд тшӧтш казьтыліс челядьдырсӧ Владыка Питирим. Со мый сійӧ висьталіс:

—Менам челядьдырӧй коли Кубаньын. Сэки эз пыр мичмӧдлыны козтӧ, кыдзи ӧні. Став семьяӧн пукалім пызан сайын да нимкодясим — Выль во! Миян эз вӧв ни телевизор, ни радио, да асьным гажӧдчим.

Детсадйын эз жӧ сувтӧдлыны козтӧ. Мичмӧдлісны пожӧм либӧ туя. Кыдзи и став зонпосниыс, ёна жӧ радейті выльвоасьны. Помнита, луннас вӧлі котӧрта эрд вылӧ да сэні лым мач вӧчала. Сэсся горт дорӧ гӧгыльта найӧс да Лымморт тэча. Эрд вывсьыс жӧ вӧлі кутшӧмкӧ пашкыр рӧстег вая. Пырта сійӧс гидӧ да мичмӧда кампет коръясӧн, ватаӧн. А сэсся нимкодяся. Чолӧмала вӧлі Выль воӧн и гортса пемӧсъясӧс: куканьӧс, курӧг-уткаӧс.

Коркӧ и бать-мам ньӧбисны пластмассаысь ичӧтик коз. Сувтӧдам вӧлі сійӧс пызан пельӧсӧ. А мичмӧдам нин вӧлі сійӧс дзирдалысь колльӧн да ичӧтик космонавт чачаӧн. Ме ӧд чужи 1961 воын, кор миян Юрий Гагарин медводдзаысь лэбзис космосӧ. И тайӧ чачаыс вӧлі медся донатор.

Кор на детсадйӧ котралі, козиныс вӧлі кампет кулёк. Абу серлӧд-лӧм, кыдзи ӧні, а прӧстӧй кабалаысь. Ыджыдджык чой-вокӧй завидьтісны, школаас налы оз вӧлі сетны да. Семьяын ме вӧлі нёльӧд кага и медічӧт. Дерт, юксьылі чой-воккӧд юмовторнад. Но овліс, и юасьтӧг босьтлісны кампеттӧ. Ыджыд мам таысь видліс найӧс.

Ӧні быттьӧ кампетӧн мырддьысьӧ-мыс и тешкодь, и морӧсӧй шонавлӧ. Челядьдырӧс ме шуа «зарни пӧраӧн».

 

ЛЫДДЬЫНЫ ВОДЗӦ...

 

Добавить комментарий


наверх