Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Паметьӧ йиджис...

Паметьӧ йиджис...

KM 3 1

Январь

Январь 1 лунсянь Комиын йӧзӧс социальнӧя дорйӧм йылысь оланпас вылӧ подуласьӧмӧн ЖКХ услугаясысь мынтысигӧн кокньӧдӧн вӧдитчысьяс пиысь быдӧнлы шуӧма бергӧдны сьӧмсӧ стӧча урчитӧмӧн, сы вылӧ видзӧдтӧг, ыджыд-ӧ патераыс, уна-ӧ сэн олысьыс да с.в.

Вӧчӧма тайӧс сы могысь, медым эз ло кедзовтӧма, шуам, уджвывса ветеранӧс, коді олӧ семьяыскӧд. Водзті татшӧмыслы сьӧма отсӧгыс вичмис ӧткӧн олысь дорысь этшаджык.

Эз быдӧнлы во тайӧ сьӧлӧм вылас. Сідз, йӧзӧдлытӧм войнаса ветеранъяс пиысь кодсюрӧ весиг шыӧдчылісны ёрдӧ. Но, кыдз тыдовтчис, выль ногӧн налы кокньӧдсӧ артыштігӧн оланпассӧ абу торкалӧмаӧсь.

 

KM 3 2

Февраль

Февраль 25 лунӧ Воркутаса «Северная» шахтаын грымӧбтіс неминуча. 780 метр пыднаын виччысьтӧг ыпнитіс метан, а сэсся паськаліс биыс...

Неминуча дырйи пӧгибнитісны 31 горняк да вит спасатель. Комиын йӧзӧдісны куим лунся траур...

 

KM 3 3

Март

Март 10 лунӧ Коми Республикаса Юралысьлысь удж вӧчысь Сергей Гапликов вештіс удж вывсьыс правительствоӧн веськӧдлысь Владимир Тукмаковӧс. Оланпас вылӧ подуласьӧмӧн мездіс и министръясӧс. Кӧть эськӧ асланыс уджӧ найӧ босьтчисны сӧмын на во заводитчигас.

Кыдз тыдовтчис туясигас, Владимир Тукмаков уджмогнас вывтіасьӧмӧн босьтӧ вӧлӧм мукӧд чина йӧзсянь калым. Тӧлысьнас шӧркодя 100 сюрс шайтӧн. Татшӧм ногӧн сійӧ «зепталӧма» 5,5 миллион шайт.

 

KM 3 4

Апрель

Ухта районын экологъяс шызьӧмаӧсь. Кыдз чайтӧны, Уква юӧ вермис веськавны эндӧм скважинаысь ылькнитӧм сёысь ун-джык тонна мусир сорас.

Та йылысь ӧтуввез пыр юӧртӧмаӧсь чери кыйысьяс.

Карса администрация йӧзӧдӧма лоӧмторсӧ кыдз виччысьтӧмӧс. Ускӧттьӧсӧ туялӧм могысь котыртӧмаӧсь комиссия, кытчӧ пырӧны вӧр-ва министерствоын, йӧзӧс доръян да виччысьтӧмторйысь видзан комитетын зільысьяс, меставывса власьт кутысьяс, республикаса прокуратураысь, Росприроднадзорысь, Ростехнадзорысь да мукӧд ведомствоысь чина йӧз.

Ю-шорысь няйт сорассӧ весавны босьтчӧма сёысь унджык морт, на лыдын и Усинскысь «Природа» СПАСФ-ысь специалистъяс.

 

KM 3 5

Май

Сыктывкарса полигонын лёк пон моз эралысь бульдозерӧн вазӧдісны-талялісны Польшаысь вайӧм 1.653 килограмм яблӧг да 86 килограмм помидор.

Татшӧм ногӧн вӧлі бырӧдӧма юркарса базаясысь санкция торкалӧмӧн вайӧм вузӧс. Но йӧзыс эз ошкыны чинаяслысь татшӧм «водзмӧстчӧмсӧ». Разӧдісны пӧ эськӧ детдомъясӧ... Жаль, но челядь-сирӧталы эз мойви чӧсмасьны...

 

KM 3 6

Июнь

Сыктывкарса ёрд мыждіс вӧвлӧм мэр Иван Поздеевӧс уджмогнас вывтіасьӧмысь да карса кудйысь сьӧм таргайтӧмысь.

Суд шуис пуксьӧдны сійӧс дзескыдінӧ куим во да джын кежлӧ условнӧя, таысь ӧтдор перйыны 100 сюрс шайт штрап.

Туялӧм петкӧдліс, мый 2013-2014 воясӧ Иван Поздеев оланпас торкӧмӧн «Делӧвӧй альянс» ООО-лы да аслас жӧ «Стройматериалы-К» ПАК-лы, кодӧс гижӧдӧма гӧтыр вылас, конкурс йӧзӧдлытӧг сетӧма кӧртымӧ му участокъяс.

Аслас татшӧм «водзмӧстчӧмӧн» сійӧ вӧчӧма карса кудлы рӧскодсӧ 12,5 миллион шайт. Ёрдлӧн тшӧктӧм серти, став сьӧмсӧ бергӧдӧма.

 

KM 3 7

Июль

Сыктывкарын С.М.Киров нима шойччан паркӧ пыранінын сувтӧдісны пӧрадок видзигӧн пӧгибнитӧм погона йӧзлы сиӧм памятник.

Памятникыс стела кодь, вӧчӧма гранитысь. Судтаыс 5,5 метр. Казьтылан пассӧ сигӧртӧ Россияса МВД-лӧн герб. Улынджык — Коми Республикалӧн канпас да венок пиын «Шагнувшим в бессмертие» гижӧд.

Памятник кыпӧдӧм вылӧ МВД-ын уджалысьяс да ветеранъяс чукӧртӧмаӧсь кык миллион шайт. Сизим миллионӧдз колана мындасӧ отсалӧма чу-кӧртны республикаса Общественнӧй палата.

 

KM 3 8

Август

Ыджыдысь-ыджыд «козин» вичмис Сыктывкарын олысьяслы да налӧн гӧсьтъяслы Коми Республикалы 95 во тыригкежлӧ.

Буретш тайӧ тӧдчана юбилей кежлас, август 20 лунӧдз, шуӧма вӧлі помавны Киров нима паркын Сыктыв юлысь берег ёнмӧдӧм-мичмӧдӧм кузя став уджсӧ. Но...

«Стройка векатӧ» чорыда конъяліс сувтса зэр. Медся кывкутысь комиссиясьыс бурджыка на сійӧ «донъяліс» стрӧитчысьяслысь уджсӧ, часӧн-джынйӧн бузгис енэжсяньыс, кокньыда пузувтіс да жугліс уна тоннаа плитаяссӧ, быгльӧдліс юас гырысь сьӧкыд изъяссӧ.

Карса администрациялы да быдсикас контроль службаыслы коли сӧмын вомсӧ паськӧдӧмӧн шензьыны...

 

KM 3 9

Сентябрь

Сентябрь 18 лунӧ бӧрйысим. РФ-са Госдумаӧ, Коми Госсӧветӧ, ӧткымын кар-районын меставывса власьт тэчасӧ нырччысьясӧс, а сідзжӧ республикаса юралысьпуясӧс донъялім.

Но, кыдз тыдовтчис, миян республикаын йӧзыслы бӧрйысьӧмыс оз вӧлӧм и ков. Сӧмын 40 прӧчент олысьыс волӧма гӧлӧсуйтнысӧ, мӧд ногӧн кӧ, дас мортысь нёльыс.

Власьтлӧн «Единая Россия» ютырлы Комиын та пӧрйӧ бӧрйысьӧм бӧрас нинӧмӧн ошйысьнысӧ. Россияын шӧркодя артыштӧмӧн кӧ, тайӧ партияыслӧн чукӧрмӧма 54% гӧлӧсыс, миян республикаын – сӧмын 37,8 прӧчент.

Сергей Гапликовӧс, кыдз Юралысьӧс, ошкӧма 174,6 сюрс морт, 62,17% гӧлӧсуйтысьыс. Быттьӧ и абу этша, участокӧ волысьсӧ кӧ артыштны. Но босьтны кӧ тӧд вылӧ ставнысӧ, кодъяслӧн эм право бӧрйысьны, абу уна, сӧмын 24%.

 

KM 3 10

Октябрь

Ухтаысь эстрадаса сьылысь Сергей Емельянов лоис Коми Республикаса культура, туризм да архив удж кузя министрӧн.

Сылы сӧмын на 23 арӧс. Помалӧма Ухтаса государственнӧй техническӧй университет, босьтӧма менеджерлысь диплом. Веськӧдлӧма Ухтаса культура дворечӧн.

Сергей Емельянов петкӧдчылӧма нин войтыркостса да Россияса музыкальнӧй конкурсын, шедӧдӧма 10 Гран-при.

Комиын эз быдӧн ошкы Сергей Гапликовлысь такӧд йитӧдын индӧдсӧ, торйӧн нин дӧзмӧмаӧсь культураын уджалысь нималана йӧз. Но, кыдз шуласны, олӧмыс петкӧдлас...

 

KM 3 11

Ноябрь

Госсӧветысь депутатъяс вынсьӧдісны Коми Республикаса Юралысьлысь спецпредставительӧс.

Тайӧ удж вылас Сергей Гапликов вӧзйӧма... Джамала Яндиевӧс, Чечен-Ингушетияын чужлӧм мортӧс, Сочиын «Олимп-стройысь» ассьыс уджъёртсӧ. Такӧд йитӧдын ёнакодь скӧрмылісны-пузьылісны Комиын олысьяс. Со некымын видзӧдлас:

–Спецпредставительӧс вынсьӧдӧмыс – тӧв йылӧ сьӧм шыбитӧм кодь. Чайта, тайӧ ыджыд чинас Чечен-Ингушетияысь мортӧс индӧмыс – коми войтырӧс увтыртӧм. Яндиевыд ӧд Комиын ни ӧти лун эз ов.

–Да, спецпредставительӧн индыны колӧ вежӧра да писькӧс мортӧс, но татшӧмыс абу этша и Комиын.

 

KM 3 12

Декабрь

Кулӧмдін районса Помӧсдінын да Вуктылса Дутовын олысьяс дыр нин виччысисны, кор кыпӧдасны налӧн челядьлы выль школаяс, зэв нин важӧсь тайӧ кык сиктас велӧдчанінъясыс да.

Медбӧрти, кыдз шуласны, йиыс вӧрзис. Власьт кутысьяс кӧсйысисны стрӧитны и Помӧсдінын, и Дутовын выль школаяс.

Но... Во помас нин тыдовтчис, мый та могысь торйӧдӧм сьӧм вылас шуӧма водзӧ стрӧитны юркарын выль школа. Кодлӧнкӧ кывкуттӧм вӧсна федеральнӧй шӧрин киритӧ-ма сійӧс кыпӧдӧм вылӧ миллиард джын шайт вичмӧдӧм кузя сёрнитчӧмсӧ да.

А дьӧбӧ колины сиктса челядь...

 

ЛЫДДЬЫНЫ ВОДЗӦ...

 

Добавить комментарий


наверх