Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - ОКОТА ЮАВНЫ

ОКОТА ЮАВНЫ

KM 2 6

Эг и тӧдлӧй, бӧрӧ колис 2016-ӧд воыс. Кассяна вӧлі, гороскоп серти кӧ, ӧбезьяна ыджыдаліс, но, кыдзи и быд пӧрйӧ, Выль вося пызан сайын сійӧс вочаалігӧн эским, мый миян ставыс лоас бур.

А збыльвылас тіянлы кутшӧм вӧлі 2016-ӧд воыс? Эм мый бурсӧ, тӧдчанасӧ казьтыштны?

 

Виктория Ромашкина (Чугаева), Краснодар край, «Коми муын» вӧвлӧм уджалысь:

–Тайӧ воыс колис зэв лӧня, некутшӧм тӧдчана лоӧмтор менам олӧмын эз вӧв да, нинӧмӧн и ошйысьнысӧ.

Кольӧм воӧ, Выль 2016 во водзвылын, велӧдчи шоперавны, машина ньӧбим да. Таво сэсся ёна и журъялі, пӧшти пыр руль сайын вӧлі.

Наталья Шахова, Сыктывкарса коми культура шӧринын зільысь:

–Менам 2016 воыс йитчӧма Коми войтырлӧн съездкӧд. Ме пыр вӧлі аддза, мый коми войтыр оз вермыны, а стӧчджыка кӧ, оз кӧсйыны дорйыны ассьыныс интересъяс. И таын кыдзкӧ став коми йӧзыс, менам видзӧдлас серти, сэтшӧма ӧтувтчисны. Душ-мӧд гӧлӧс, дерт, эз тырмы, мед вӧлі ми ног, но во помын ставыс бергӧдчис сідзи, кыдзи колӧ.

Сэсся ветлім ставмирса финн-йӧгра конгресс вылӧ. Зэв любӧ вӧлі кывны, мый Коми Республика да коми войтыр вылӧ веськӧдчӧны финн-йӧгра войтыр, пыдди пуктӧны комияслысь водзмӧстчӧмсӧ.

Нӧшта на октябрын «Томлун» котыркӧд ветлі Эстонияӧ. Медъёна ёртасим удмуртъяскӧд. И вӧлі сійӧ ӧтув гажас да ӧтув уджас кутшӧмкӧ лов кыпӧдан вын. И вобыд менам юрын поздысьӧ мӧвп, кутшӧм жӧ бур, мый ме коми. Кутшӧм бур, мый Эжва йылын эм менам коми сикт, кытӧн ме дорӧ пыр шыасьӧны чужан кыв вылын. Кутшӧм бур, мый эмӧсь на йӧз, кодъяс вермӧны горӧдлыны коми сьылан.

Анастасия Лабецкая, серпасасьысь:

–2016 воыс вӧлі шуда. Козьналіс меным уна выль проект, выставка. Весиг Москваын петкӧдчим Елена Проценко нывъёрткӧд.

Анатолий Макаров, бурдӧдысь, Нёбдін сикт, Кӧрткерӧс р.:

–Колисны югыд казьтылӧмъяс. Сідз, 2016 воын ме помалі Сыктывкарын И.П.Морозов нима медицина колледж. Босьті диплом. Нӧшта Танюк гӧтырӧйкӧд ньӧбим выль машина.

Виктор Тельнов, горно-экономическӧй колледжӧн веськӧдлысь, Воркута:

–Воыс эз вӧв кокньыд. Таво став семьяӧн, выль удж вӧзйисны да, вуджим овны Воркутаӧ. Колледжӧн веськӧдлыны воӧ сьӧлӧм вылӧ. Велӧдысь-велӧдчысьяскӧд быттьӧ важся ёртъяс нин. Паметьӧ колис Москваса да ставроссияса Патриарх Кириллӧн Сыктывкарӧ да Воркутаӧ волӧмыс. Бурӧн кута казьтывны и Из гӧра сайӧ турпоходӧн ветлӧмӧс.

Инга Тимушева, вузасьысь, Кулӧмдін сикт:

–Тайӧ воыс некор оз вушйы паметьысь, ыджыд шог вайис да. Енмыс босьтіс менсьым медся дона мортӧс, ва вылын кыйсигас неминуча дырйи эновтіс таладор югыдсӧ верӧсӧй.

Александр Попов, ас вылӧ уджалысь, Сыктывдін р.:

–Меным тайӧ восьыс, кыдз шуласны, пӧсь ни кӧдзыд. Жаль, кризискӧд йитӧдын унатор эз арт-мы вӧчны аслам бизнесын.

Любовь Ванеева, журналист, Кослан сикт, Удора р.:

–Паметьӧ коляс россияса спортын допинг кузя кыптылӧм зык-веныс. Ме ачым ёна радейта спорттӧ да, торйӧн нин тӧвсясӧ.

Но эз жӧ ставыс лёк вӧв. Верӧсӧй аддзис выль удж, чужис племянник. Дзоньвидзаӧсь мам да челядь.

Елена Вагнер, делопроизводитель, Сыктывкар:

–Нинӧм торъясӧ тӧдчӧдны ог куж. Важ олысьяс на шулӧмаӧсь: кассяна воыд пӧ кассяна на и эм.

Кута надея, локтан Петук воыс ваяс нимкодьджык юӧръяс. Да и ачым ме гороскоп серти петук. А сідзкӧ, матыстчӧ менам во.

 

ЛЫДДЬЫНЫ ВОДЗӦ...

 

Добавить комментарий


наверх