Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Сьыланӧн турӧблы паныд

Сьыланӧн турӧблы паныд

KM 1

Юркарса изьватаслы ӧти местаын оз пукавсьы — пыр и тыдалӧ, мый сӧнъясӧдыс кӧр видзысьлӧн, кыйсьысь-вӧралысьлӧн вир визувтӧ.Кольӧм субӧтаӧ Сыктывкар бердса Читын найӧ котыртлісны «Изьваса ворсӧмъяс». Ывлаас кӧть и ёнакодь турӧбаліс, гажӧдчыны воліс матӧ сё морт.Сыктыв ю берегын, паськыд еджыд эрд вылын карсалы мойдын моз сулаліс чум. Пач трубаысь пуркйис тшын. Орччӧн трачкӧдчис бипур...

Локтысьӧс вочаалісны асъя нурӧн: пӧсь сук иван-чайӧн, рача-шаньгаӧн, печенчаӧн да гажа сьыланӧн.

KM 12 1

«Ижма — радость моя, Ижма — песни строка...» — Александр Гончаровлӧн баянӧн ворсӧм улӧ сьӧлӧмсянь ливкйӧд-лісны Коми Республикаса народнӧй артист Василий Рочев да «Изьва» ансамбль.

Мед не кынмыны пӧль-тысь чизыр тӧв улын, гаж котыртысьяс чуксалісны гӧсьтъясӧс венласьыштны канат кыскалӧмын, кӧр дадь вомӧн чеччалӧмын, шы либӧ гира шыблалӧмын. Окотитысьяс зілисны «кыйны» нярталаӧн йӧра сюр.

Кадыс тӧдлытӧг и лэбис — воис пажнайтан кад. Чу-кӧртчӧмаӧс номсӧдлісны би вылын сӧмын на пуӧм кӧр яя греча рокӧн. Чӧскыды-ы-ыс!.. Ме тай кык тасьті тыр сёйи-а... Колӧкӧ, нӧшта на кори, да рокыд здукӧн и бырӧма.

KM 12 2

Пӧтӧса нуръясьӧм бӧрын окота лои челядьдырйи моз узьыштны шоныдінын. Но енбиа сьылысь-гудӧкасьысьлысь «еджыд лым, еджыд лым шебралӧма мусӧ...» кылі, да унмӧй здукӧн и саяліс-жбыркнитіс чумлӧн мокота розьӧд. Син водзын моз шевкнитчис помтӧм-дортӧм тундра, пырыс тыдалана сӧдз ты-ю, ваын тёльскӧдчысь госсялӧм дзодзӧг, уна сюрс шондіӧн дзирдалысь мырпом, мусаник кӧръяс...

KM 12 3

А сэсся ылькнитіс «Мича ижемкаысь» «...тэнад синъясыд, зарни киньясыд менсьым сотісны сьӧлӧмшӧр...», да дум вылӧ пыр и усины дона мам-батьӧй. Кыдзи найӧ тӧдмасисны, лӧсьӧдісны семья, лэптісны керка, сувтӧдісны кок йылӧ сизим ныв-пиӧс... И сэтшӧм шоныд да бур лои сьӧлӧмын тайӧ здукас, быттьӧ бара на веськалі чужан позйӧ.

«Могучая наша река, широка, глубока. Ты символ борьбы и труда...» — Печоралы сиӧм сьыланкыв та пӧрйӧ шыаліс кыдзкӧ вывті кыпыда. Гашкӧ, сы понда, мый сьылісны сійӧс ставӧн: изьватас и Эжва катыдса, роч и коми, олӧма войтыр и томулов... Да лов вылын лои нӧшта на нимкодь ичӧт, но, ок, ёна радейтана рӧдина вӧсна!..

KM 12 4

Йӧзыс дыр на эз кӧсйыны разӧдчыны гортаныс. Быттьӧ кутшӧмкӧ торъя вын кутіс найӧс тані. Поводдялӧн ыджыдалӧм вылӧ видзӧдтӧг изьватас юксисны ӧта-мӧдыскӧд казьтылӧмъясӧн, ёрта сёрни сайын корсисны ӧтув рӧдвуж, шмонитісны. Да сынӧдас юсь моз бара на мӧдісны плавъявны Виктор Кушмановлӧн быдӧнлы тӧдса: «Сколько лет живёшь ты, моя печаль, красота моя — золотая шаль...»

KM 12 5

Туйӧ петӧм водзын гаж котыртысьясӧс аттьӧалігӧн телепит лои да юалі, мися, кор мӧдысь тадзи чукӧртчылам, мадаяс? «Майын, — эскӧдіс землячествоӧн веськӧдлысь Алексей Чупров. — Сэсся байдаркаясӧн походӧ ветлам, Победа лунӧ аддзысьлам, а сы бӧрын «Луд» кежлӧ нин колӧ лӧсьӧдчыны...»

Ог тӧд, кыдзи мукӧдыс, а ме бӧрсӧ муні быттьӧ выльӧн чужӧма. Збыль шуа, ӧнія олӧмӧ татшӧм долыдыс ге-жӧда овлӧ. Дерт, кӧнкӧ, юркарса изьвасалӧн водзмӧстчӧмыс ӧткымынлысь муссӧ зыртӧ (Изьва-керкатӧ сотісны, «Трибунаӧ» суклясьӧмъяс стрӧчитісны), но землячество ловнас оз усь, водзӧ зільӧ, и таысь торъя нин нимкодь. Сідзкӧ, олам на!

«Парма шӧрын, гажа ягын, кӧні абу зык ни вен, войвыв мулӧн муса кага, еджыд Райда олӧ сэн...»

Григорий ХАТАНЗЕЙСКИЙ.

Снимокъясыс авторлӧн да Владимир Прокушевлӧн.

 

Добавить комментарий


наверх