Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Чатрасисны, а кок улас эз видзӧдны

Чатрасисны, а кок улас эз видзӧдны

KM 2 1

Кольӧм воторникӧ Сыктывкарса чинаяс кытшовтісны керка йӧръяс, видзӧдісны, кыдзи коммунальщикъяс весалӧны вевтъяс. Рейдсӧ нуӧдісны  республикаса Юралысьлӧн индӧд серти Вылыс Максаковкаса детсадйын кагаяс вылӧ лым тукта усьӧм бӧрын.

Кыдзи тыдовтчис, лым-йысь да йинёньысь абу ставсӧ тыр-бура весалӧмаӧсь. Коммунальщикъяс уськӧдлӧмаӧсь «еджыд шапкасӧ» сӧмын кильчӧ весьтысь, кыті ветлӧны йӧзыс. А кытӧнсюрӧ лымсӧ «сёйӧма» тувсовъя шондіыс.

Сыктывкарса администра-циялӧн ЖКХ юкӧнысь специалист Андрей Козулин пасйис, мый медтӧдчанаыс — туктасӧ да йинёньсӧ уськӧдны йӧзлӧн ветлан-мунанінысь, мед юр выланыс оз усь. А мый керка сайын либӧ бокас ӧшӧдчӧма — таысь оз чиршӧдлыны.  Сідзжӧ сійӧ пасйис, мый юркарын уна на пу керкаыс, кодлӧн вевтыс шиперысь. Тайӧ вольӧссӧ пӧ бурджык не вӧрӧдны. Кутан кӧ зырйӧн жуглыны йисӧ, тшӧтш и вевтыс потас да пож кодь лоӧ.

Рейдӧ петалігӧн чинаяс кытшовтісны Орбита, Стрӧитель, Лесозавод микрорайонъяс да Сыктыв шоссе. Печора уличаса 16 да 18 номера керкаясын олысьяс висьталісны, мый  выльлунӧ налысь вевтсӧ весалӧмаӧсь. А сыӧдз пӧ метрысь кузьджык йинёнь жугӧдіс ӧшиньсӧ. Майшасьӧны олысьяс и сы вӧсна, мый вевт вылысь лымсӧ коммунальщикъяс шыблалӧмаӧсь, но йӧрсьыс  абу петкӧдӧмаӧсь. Сывны пӧ кутас да, кылалам.

Сыктыв шоссе вылын дзик жӧ татшӧм серпасыс. Уна судтаа керка йӧрысь лымсӧ йӧткалӧмаӧсь бокӧ, а пу керкаяс дорын йизьӧм комокъяс. Сэті машинаӧн мунны он письт — «кынӧм» улыс кольӧ. Да и подӧн полан, ки-коктӧ чегны верман, швачкысян кӧ.

Чинаяслы та йылысь гарышті. Тшӧтш инді и, мый Сыктыв уличаса 32-ӧд керкаын вӧчӧм пандусыс зэв крут, муас оз инмы, а улас вольк. Кыдзи нӧ, мися, вермытӧмыслы лэччыны? Но меным вочавидзисны, ми пӧ керка вевт видзӧдам, а тайӧ пӧ абу миян мог.

Видзӧдӧмпырысь, «инспекторъяслӧн» сьӧлӧмыс бурмис, кызвынлаын вевт-сӧ весалӧмаӧсь нин да. Нелючкисӧ, дерт, аддзисны жӧ. Шуам, Маегов уличаса 45 да 47 номера керкаяслӧн вевт вылӧ некод на абу кайлӧма. Та вылӧ налы элясис олӧма морт, коді пукаліс кильчӧ вылас. Чинаяс пасйыштісны аслыныс та йылысь.

—Рейд бӧрын ми дасьтам колана кабалаяс, медым  идӧр-тӧм коммунальщикъясӧс кыскыны административнӧй кывкутӧмӧ. ТСЖ-лысь штрапсӧ вермасны перйыны 40-50 сюрс шайт, а веськӧдлан компаниялысь — 250 сюрс шайт да унджык. Дерт, шуас кӧ тадз мирӧвӧй судья, — висьталіс Сыктывкарса жилинспекцияӧн веськӧдлысь Аркадий Малафеев.

Екатерина МАКАРОВА.

Снимокыс авторлӧн.

 

Добавить комментарий


наверх