Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Додь тыр мытшӧд

Додь тыр мытшӧд

khatanzeyskiy

Овлӧ сэтшӧмыс, мый локтанныд асывнас удж вылӧ и тіянӧс бур юӧр вочаалӧ? Гежӧдика, но овлӧ. Меным тӧрыт мойвиис жӧ... Восьті интернет, а сэні: «Почта России» госкорпорацияӧн веськӧдлысь Дмитрий Страшновлы 128 миллион шайта премия-удждон вынсьӧдӧм-мынтӧмысь следственнӧй комитет панӧма уголовнӧй делӧ». Вот тайӧ да! Вот тайӧ юӧр!..

Войдӧрлун на республикаса Общественнӧй палатаын котыртлісны «гӧгрӧс пызан». Сёрнитанторйӧн вӧлі «Кыдзи ылі сикт-грездын судзӧдны газет?». Общественникъясӧс, газет-журнал редакцияясӧн веськӧдлысьясӧс, предпринимательясӧс аддзысьлыны ышӧдысь Нина Новикова пасйис, мый мукӧд сикт-грездас непӧштӧ газет киоскыс, весиг прӧдукта лавкаыс абу. А йӧзыслы окота морт ногӧн овны: удж бӧрын лыддьыны небӧг-журнал, тӧдмавны выльтор... Ӧд эмӧсь на сэтшӧм инъяс, кӧні интернет йылысь весиг абу кывлӧмаӧсь, радио-телевизорыд уджалӧ кӧ, сӧмын чиналӧн волігъясӧ, да ӧтка надеяӧн вӧлі и кольӧ газет.

Чукӧртчӧмалы ме пасйи: мися, водзынсӧ прессатӧ позис пошта юкӧнъясысь ньӧбны. Но сэтчӧссаӧс нажӧвитчан висьӧм босьтіс. Первой лэптісны йӧзӧдантор вылӧ гижӧдчан донъяс (сӧмын мӧвпыштӧй — сизимдас прӧчент сьӧмыс мунӧ поштасалы!), а сэсся дзикӧдз веляммисны да мӧдісны вочасӧн пӧдлавны ылі пельӧсъясын ассьыныс юкӧнъяссӧ. Ёна пӧ тай окота лыда газет-журнал понда чегсьыны-мырсьыны!

«Гашкӧ, йӧзӧданторныд абу интереснӧй да, сы понда этшаникӧн гижӧдчӧны-ньӧбӧны?» —«син восьтіс» Людмила Зимина, коді буретш кывкутӧ республикаса СМИ-лысь удж котыртӧм вӧсна. Кывйӧй эськӧ ёна лудіс вочавидзны, мися, мый асьныд инданныд, сійӧс и йӧзӧдам. Но эг удит. «Збыль, газетъясад реклама кындзи ӧні дзик нинӧм лыддьыны!» — яра шыасис общественникъяс пиысь ӧти, Елена Щербина, да мыйлакӧ пример пыдди вайӧдіс дон босьттӧг разӧдана «Панорама столицы». Ме шемӧс пукалӧмӧн мӧвпалі: «Кы-дзи тайӧ йӧзыс вермӧны донъявны, интереснӧя-ӧ тэ гижан, кор коминас кыв ни джын оз тӧдны, «Коми мусӧ» ни «Чушканзісӧ» кианыс нэмнас эз босьтлыны да весиг оз сяммыны торйӧдны сідз шусяна качественнӧй прессаысь «виж», рекламаа юӧрпас?!»

Аддзысьлӧмсӧ сигӧртігӧн нин Общественнӧй палатаысь эксперт, политолог Владимир Теребихин пасйис: «Гаралӧм мытшӧдъясыс бырасны, кодыр лоӧ лӧсьӧдӧма Комиын информационнӧй политика сӧвмӧдан уджтас...»  И ставӧн вӧліны сыкӧд сӧглас. Тешкодь, ӧд сёрни панасын на ме шуи, мый тані кӧть асылӧдз больгы, но  медвылыс власьтлӧн отсӧгтӧг доддьыс ӧдвакӧ вӧрзяс...

Григорий ХАТАНЗЕЙСКИЙ.

 

Добавить комментарий


наверх