Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - «Кӧдзыд юрыд» ВЕНIС «пӧсь виртӧ»

«Кӧдзыд юрыд» ВЕНIС «пӧсь виртӧ»

KM 19 1

Кольӧм вӧскресенньӧӧ Санкт-Петербургын помасис футбол Конфедерация кубок вӧсна ордйысьӧм. Вель дыр мир пасьталаысь фанатъяс виччысисны турнирсӧ, а гаж-ордйысьӧмыс син лапнитігкості быттьӧ и помасис. Он тай бергӧд венласьӧмлысь шуда здукъяссӧ. Кодлы мойвиис — босьтіс награда, а мукӧдыслы ковмас видлыны шедӧдны медальястӧ 2018 воын, кор Россияын нуӧдасны мирса чемпионат.

Кыдзи тыдовтчис тайӧ ордйысьӧмыслӧн финалын, Германия вермис Чилиӧс да медводдзаысь на шедӧдіс татшӧм чемпионатас зарни медаль.

KM 19 2

«Висьысьяслӧн» эскӧдӧм серти, финалсӧ видзӧдігӧн уналы дум вылас воӧмаӧсь Александр Пушкинлӧн кывбурысь строкаяс: «Они сошлись. Волна и камень, стихи и проза, лёд и пламень». «Пӧсь вира» чилиечьяс да крепыд дисциплинаа немечьяс тӧв ныр моз лэбалісны эрд вывті да став вынсьыс «тышкасисны» мач вӧсна.

Таӧдз унаӧн эз эскыны, мый полуфиналын Чилиысь котыр вермас Португалияысь Криштиану Роналдулӧн юрнуӧдӧм улын сборнӧйӧс. Сэк жӧ турнир заводитчигас на чилиечьяс пасйисны, мый локтісны Россияӧ сӧмын зарни медальла. Нӧшта этшаджыкӧн эскисны, мый Германияса том футболистъяслӧн котыр «зырас» зумыд да повтӧм мексиканечьясӧс.

Июль 2 лунӧ Санкт-Петербургса стадион вылын, кыдзи шуласны, яблӧглы усьны вӧлі некытчӧ. Футбол радейтысьяс зэв яра «висисны» и немечьяс, и чилиечьяс вӧсна. Шенасисны шарпӧн, флагӧн. Кодсюрӧ дасьӧсь вӧліны уськӧдчыны футболистъяс дорӧ, мед ёнджыка ыззьӧдны найӧс.

Разминка помасис, да шӧр судья Милорад Мажич шутёвтӧмӧн сетіс ордйысьӧмлы старт. Матчыс заводитчис Чилиса футболистъяслӧн зырӧмсянь. Немечьяс жӧ пыр ёнджыка дорйысисны да виччысисны здук, кор чилиечьяс сорсясны.

KM 19 3

И дыр виччысьны эз ковмы. Ыззьӧм латиноамериканечьяс ӧтарӧ котӧртісны водзӧ, но сэккості дзи-кӧдз вунӧдісны дорйысьӧм йылысь. Ыджыд опыта защитник Марсело Диас воштіс мачсӧ асланыс штраф-нӧй дорын, сійӧс, ок, ӧдйӧ «кватитіс» Тимо Вернер да сетіс пас Ларс Штиндльлы. Бӧръяыс ворсӧдчигмоз ылӧдліс вратар Клаудио Бравоӧс да сюйис Чилилӧн воротаӧ гол.

Та бӧрын Чилиысь «гӧрд котыр» шӧйӧвошис, пыр тшӧкыдджыка воштыліс мачсӧ да гежӧдджыка зырис немечьясӧс. Германияса сборнӧй, мӧ-дарӧ, эз падмы Хуан Антонио Пиццилӧн быдтасъяс водзын, гоз-мӧдысь на «кыйліс» латиноамериканечьясӧс налӧн сорсьӧм вылын да муртса кык пӧв эз ыдждӧд тшӧтсӧ.

Медводдза тайм помасис тадз: немечьяс кусыньтчисны, но эз чегны, а чилиечьяс яра заводитісны, но «чиш-касисны» вӧрӧглӧн воча атакаӧн да ӧдйӧ гӧгӧрвоисны, мый Германиялысь том сборнӧйсӧ он на «кӧртвомав».

Мӧдӧд таймын чилисаяс видлісны асланьыс бергӧдны ворсӧмсӧ. Найӧ бара на яра зырисны да косясисны быд мач вӧсна. Футболистъяс ворсісны пыр «чорыдджыка»: йӧт-калісны ӧта-мӧднысӧ, ӧткымын здукӧ муртса тышкӧ эз волыны. Судьяяс эз жалитны виж карточкасӧ да тшӧ-кыда вӧдитчисны видеоповторӧн, кодӧс таво медводдзаысь пыртісны футболысь ворсан турнирӧ.

KM 19 4

Ордйысьӧм помын «гӧрд котыр» вермис эськӧ ӧткодявны тшӧтсӧ. Алексис Санчес бура чужйис штрафнӧйсянь, но немечьяслӧн вратар Штеген дорйис ассьыс котырсӧ. Та бӧрын лои гӧгӧрвоана, мый Чилиса футболистъяслы водзӧ нинӧм нин виччысьны.

Немечьяслӧн том сборнӧй ӧти голӧн и шедӧдіс кубоксӧ. Дисциплинаыд да «кӧдзыд юрыд» венісны ярлунтӧ да «пӧсь виртӧ».

Тадзи помасис футболлӧн кыпыд гаж, кодӧс медводдзаысь на нуӧдісны Россияын. Мӧд во миян странаын мунас мирса чемпионат, сійӧс ёна нин виччысьӧны футболӧн «висьысь-яс». Кутам лача, мирса первенство шензьӧдас миянӧс бур ворсӧмӧн, кыпыд ордйысьӧмӧн, а гашкӧ да, югнитас миян сборнӧйлы шудӧн.

 

Добавить комментарий


наверх