Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - ОКОТА ЮАВНЫ

ОКОТА ЮАВНЫ

KM 2 4

Head Hanter туясян служба юасьӧма Россияын (тшӧтш и Комиын) олысьяслысь: кӧні да кодӧн найӧ заводитӧмаӧсь уджавны, дыр-ӧ зільӧмаӧсь медводдза уджаланінас, абу-ӧ сорсьӧмаӧсь специальносьтсӧ бӧрйигӧн да с.в.

Медунаӧн (9,2 прӧчентыс) первой профессия сертиныс вӧлӧмаӧсь вузасьысьӧн. Юасьӧмаяс пӧвстысь 52%-ыс велӧдчӧм бӧрас уджалӧмаӧсь дзик мӧд специальносьт серти. И сӧмын 4 прӧчентыс некор абу вежлӧмаӧсь уджаланінсӧ.

Окота юавны, а тіян трудӧвӧй книжкаын медводдза гижӧдас мый пасйӧма? Унаысь-ӧ вежлінныд уджаланінтӧ?

Вячеслав Попов, Коми Республикаысь национальнӧй политикаса министрӧс вежысь:

—Менам трудӧвӧй книжкаын медводдза гижӧдыс: содтӧд тӧдӧмлун сетысь педагог. Ыджыдвидзса школаын нуӧді челядьлы спорт секция.

Уджӧс зіля вежны быд куим-вит во мысти. Чайта да, колӧ водзӧ восьлавны олӧм сод кузяыс, босьтны выль тӧдӧмлун-сям, мед юрыд бура уджаліс.

Людмила Остапова, велӧдысь, Паджга сикт, Сыктывдін р.:

—Вуз помалӧм бӧрын, дерт, вылӧ лэптӧм юрӧн муні велӧдны школаӧ. Но регыд мысти пышйи. Этша мын-тісны нажӧткасӧ да. Сэсся уджалі буретш вуза-сьысьӧн. Но бӧр бергӧдчи школаӧ. Сьӧлӧмӧй челядь дорӧ кыскис да. И удждон вылад талун грек элясьнытӧ. Унджык урок кӧ кутан нуӧдны, нажӧткаыд лоас сьӧлӧм сертиыд.

Ксения Кукушкина, том мам, Сосногорск:

—Ме велӧдчи инженер-проектировщикӧ. Сэсся петі верӧс сайӧ да чужті нылукӧс. Сыкӧд декретын пукалӧм бӧрын бара на локті аслам удж вылӧ. И ньӧти ог жалит, мый бӧрйи стӧч тайӧ профессиясӧ. Ме сійӧс радейта, и нажӧткаыс бур жӧ.

Татьяна Зеленова, уджтӧмалысь, Сыктывдін р.:

—Ми верӧскӧд кыкнанным велӧдысьяс. СГУ-ын тӧдӧмлун босьтігӧн и тӧдмасьлім. Вуз помалӧм бӧрын 15 во олім да уджалім сиктын. Сэсся Сыктывдінса Выльгортын кыпӧдім ас керка да вуджим сэтчӧ.

Ӧні корся удж. Верӧсӧй велӧдны оз нин кӧсйы. Уджалӧ шоперӧн. Велӧдысь дорсьыд унджык на нажӧвитӧ.

Инна Гапонова, челядьлӧн творчество шӧринын уджалысь, Сосногорск:

—Менам трудӧвӧй книжкаын медводдза пасйӧдыс — содтӧд тӧдӧмлун сетысь педагог. Кӧть эськӧ вузын босьті социальнӧй удж кузя специальносьт. Сэсся вуджлі овны мӧд карӧ да сэні видлі сямӧс журналистикаын. Ӧні бӧр босьтчи аслам радейтана уджӧ. Сета томуловлы содтӧд тӧдӧмлун.

Надежда Быковская, Коми Республикаын мортлысь право дорйысь уполномоченнӧй:

—Менам дипломын пасйӧма: «Филолог. Преподаватель русского языка и литературы, коми языка и литературы». Сыктывкарса университет помалі да, Кӧрткерӧс районса «Звезда» газетысь редактор Семён Кынев корис журналиставны. Сэнi уджалi 16 во. Бӧръя квайтсӧ — редакторӧн. Та бӧрын корисны веськӧдлыны «Коми му» газетӧн, кӧнi зiли матӧ 5 во.

Ӧкмыс во уджалi «Единая Россия» ютырлӧн исполкомын. Сэсся вӧзйисны веськӧдлыны «Коми йӧзӧдчан керкаӧн». Мортлысь право дорйысь уполномоченнӧйӧн зiля куим во. Кывкӧртӧд пыдди висьтала: пыр уджалi и мӧда на уджавны йӧзкӧд.

Ольга Сосновская, Россияса заслуженнӧй да Коми Республикаса народнӧй артистка:

—1988 воын босьтчи уджавны опера да балет театрын. Локтан воӧ тырас 30 во, кыдзи ме сцена вылын. Некор эз волы юрӧ мӧвп, мый бӧрйи эг меным колана профессия. Сьылӧмыс — менам олӧм.

Ольга Бугримова, велӧдысь, Пожӧг сикт, Кулӧмдін р.:

—Менам трудӧвӧй книжкаын — сӧмын ӧти гижӧд: Кулӧмдін районысь Пожӧг сиктса шӧр школаын коми кыв да литература, роч кыв да литература велӧдысь. И уджӧс некор ог веж.

 

Добавить комментарий


наверх