Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Комиысь эпидемиологъяс: мыйла быть колӧ ПИСТИАСЬНЫ?

Комиысь эпидемиологъяс: мыйла быть колӧ ПИСТИАСЬНЫ?

KM 9

Быд во кынмалан висьӧмъяслӧн содӧм-паськалӧм водзвылын чужӧ юалӧм – колӧ оз дорйыны асьтӧ да матыссаястӧ гриппысь писти отсӧгӧн? Эпидемиологъяс эскӧдӧны – колӧ. Висьӧмысь бурдӧдчӧм сувтӧ тӧдчымӧн донаджык пӧ весиг вештысьӧмӧн пистиасьӧмысь, мый нин сёрнитны грипплӧн сідз шусяна осложненньӧяс да нёрпалігӧн удж-олан лад вежон-мӧд кежлӧ торклӧм йылысь.

И со мый вочавидзӧны еджыд халатаяс гриппысь пистиасьӧм серти медшӧр юалӧмъ-яс вылӧ...

Кыдзи действуйтӧ гриппысь писти?

Медводз пистиалӧмалӧн чужӧ тайӧ лёк висьӧмыслы паныда видзӧг – иммунитет. И мортыс вермӧ нёрпавны сӧмын кокни формаа инфекцияӧн. А тадзикӧн сійӧ лоӧ видзӧма грипплӧн сэтшӧм осложненньӧясысь, кыдзи пневмония, отит, миокардит, менингит да сідз водзӧ.

Важӧн нин тӧдса, регионъясын, кӧні тыр-бура да ас кадӧ нуӧдӧны грипплы паныд планӧвӧй вакцинация, оз овлыны эпидемияяс. Шуам, Коми Республикаын кольӧм во удайтчис жӧ видзны кызвын татчӧс олысьсӧ сьӧкыда висьӧмысь, сентябрь-ноябрын вӧлі пистиалӧма нелямын прӧчент олысьсӧ да.

Висьыськӧд лавка-магазинын, общественнӧй транспортын да мукӧдлаын здукӧн моз паныдасьлӧм бӧрын гриппысь пистиалӧмалӧн иммунитет заводитӧ дзик пыр водзсасьны вируслы – и мортыс оз висьмы.

Кыдзи организм реагируйтӧпистиасьӧм вылӧ?

Кызвыныслӧн некутшӧм реакция оз овлы, сӧмын ӧткымынлӧн вермас кыптывны температура, личавлыны вир-яй, юкавны сӧнъяс. Кодсюрӧ чайтӧны, мый вакцинация бӧрын найӧ збыль висьмисны гриппӧн, но тайӧ ылӧдчӧм, ӧд пистиысь висьӧм кӧвъявны некыдз он вермы.

Позьӧ-ӧ гриппысь пистиасигӧн вӧчны и мукӧд прививка?

Туясьӧмъяс бӧрын дзоньвидзалун видзысьяс ӧні вӧзйӧны вӧчны и противопневмококкӧвӧй вакцина. Верстьӧ войтырлы гриппысь пистикӧд ӧттшӧтш позьӧ уколавны дзик быд вакцина, челядьлы – сідзи жӧ, но БЦЖ да виж лихорадкаысь писти кындзи.

Кор колӧ пистиасьны?

Иммунитет заводитӧ сӧвмыны пистиасьӧм бӧрын кык, а тыр-бура уджавны дас вит-комын лун мысти. Сідзкӧ, гриппысь писти колӧ вӧчны ас кадӧ, эпидемия заводитчытӧдз тӧлысьӧн водзджык. Вакциналӧн выныс бырӧ во джын мысти. Та понда кадысь водз пистиасьны оз жӧ ков, ӧд сідз шусяна антителӧяслӧн титр вермас усьны буретш эпидемиялӧн ыджыдалігӧн.

Кыдзи тӧдса нин, гриппӧн медъёна нёрпалӧны декабрь-январын, сідзкӧ, прививкаасьны медбур сентябрь-ноябрын.

Мый вӧчны, сёрмин кӧ пистиасьны?

Вакцинатӧ позьӧ вӧчны весиг грипп эпидемия заводитчигӧн. И кӧть шулӧны, мый сэки пистиасьны весьшӧрӧ нин – тайӧ дзик ылӧдчӧм. Бурдӧдыськӧд паныдасьлігӧн ті верманныд сёрнитчыны урчитӧм кадысь сёрмӧдчӧмӧн прививка вӧчӧм йылысь. Но! Тіян пытшкӧ кӧ овмӧдчӧма нин грипплӧн вирусыс, а та йылысь он на тӧдӧй, вакцина вӧчӧмысь пӧльзаыс некутшӧм оз ло. Нӧшта ӧтчыд тӧдчӧдам: пистиасьны колӧ ас кадӧ!

Кодлы быть колӧ вӧчны гриппысь писти?

Медводз сьӧлӧмӧн, лолалан органъясӧн нёрпалысьлы, сахарнӧй диабетӧн висьысь войтырлы, а сідзжӧ олӧма йӧзлы.

Пистиасьны колӧ налы, кодъяс уджалӧны ыджыд коллективын, быд лун паныдасьлӧны уна йӧзкӧд. Роспотребнадзорысь специалистъяс вӧзйӧны вӧчны гриппысь прививка весиг (14 вежонысь дырджык) рушкуа аньяслы да морӧсӧн вердысь мамъяслы.

Висьӧмъясысь видзчысяна прививкаяслӧн национальнӧй календар серти Коми Республикаын дон босьттӧг вермӧны пистиасьны 1-11 классъясын велӧдчысьяс, бурдӧдан, велӧдан, вузасян, йӧзӧс могмӧдан, вердан, сёян вӧчан, транспорт, коммунальнӧй учреждениеясын уджалысьяс, студентъяс, квайтымын арӧсысь пӧрысьджык йӧз, нӧбасьысь аньяс, квайт тӧлысьысь ыджыдджык челядь, призывникъяс, хроническӧй висьӧмъясӧн нёрпалысь войтыр.

Частнӧй организацияясын зільысьяслы позьӧ пистиасьны уджӧн могмӧдысьлӧн тшӧт весьтӧ.

Пистиасьны колӧ налы, кодъяслы висьны ньӧти абу окота дай кадыс та вылӧ некутшӧм абу!

* * *

Медым вӧчны гриппысь писти, матыстчылӧй асланыд поликлиникаын прививкаяс вӧчан кабинетӧ. Сьӧрсьыд босьтӧй паспорт да медполис.

 

Добавить комментарий


наверх