Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - СӦВМАН ТУЙӦД

СӦВМАН ТУЙӦД

KM 3 1

Кыдзи олан юрсикт?

Гожся тӧлысьясӧ кост бӧрын сентябрь пансьӧмсянь Изьва сиктын бара югзисны войся пӧнаръяс, нимкодьпырысь юӧртіс юрсиктса администрацияӧн веськӧдлысь Игорь Истомин. Колӧ шуны, администрацияын аслас электрик абу, та вӧсна сюръяяс бӧрся видзӧдны специалистсӧ медавлӧны РЭС-ысь. Таво сюръяяс вылысь вежлалӧмаӧсь лампочкаяссӧ. Ладмӧдӧмаӧсь ЖКУ-150 кольквиж биӧн ӧзйысь выль пӧнаръяс. Найӧ этша-джык видзӧны бисӧ. Игорь Николаевичлӧн кывъяс серти, кольӧм во быдӧн Изьваын улич югзьӧдӧм вылӧ видзӧма 547 сюрс шайт. Электриклы нажӧтка мынтӧм вылӧ– 90 сюрс шайт. Тӧвнас бисӧ вӧлӧм ӧзтӧны куим час лунын да кусӧдӧны вой шӧрын. Выльысь ӧзтӧны вит час асылӧ, уджӧдӧны 7-8 часӧдз. Таво сідзи жӧ арталӧны.

Пасъям, Изьваын пӧнаръяс вылӧ пуктӧмаӧсь Тольяттиса заводысь таймеръяс. На отсӧгӧн ывла югдігас би кусӧ, и мӧдарӧ, пемдігӧн выльысь ӧзйӧ. Игорь Истомин казьтыштіс, татшӧм таймерсӧ ньӧбӧмаӧсь кызь гӧгӧр. Ӧтиыслӧн доныс – 2 сюрс 500 шайт. Выль микрорайонъясын сувтӧдӧмаӧсь сод-тӧд дас кык би сюръя.

KM 3 2

Таво жӧ Изьваын кӧсйӧны помавны культура керка дорсянь шойччан паркӧ нуӧдысь туй. Вольсаласны выль асфальт. Уджъяссӧ вӧчас «ИзьваСтрой» ООО. Та могысь районса сьӧмкудйысь чуктӧдӧма 3,3 миллион шайт. Сідзжӧ дзоньталасны Чупров да Семяшкин уличаяс вылысь 1 километр 250 метр туй. Ви-дзасны та вылӧ пӧшти 5 миллион шайт. Уджсӧ вӧчас «Северстрой» ООО.

Изьва вочасӧн сӧвмӧпаськалӧ. Сідз, дзик на неважӧн Константиновка грездысь дас кык том да уна челядя семьялы район вичмӧдӧма керка кыпӧдӧм улӧ му юкӧнъяс. Быд семьялы 600-сянь 1.600 квадратнӧй метрӧдз.

Майшӧдлӧ Изьваса юралысьӧс юрсиктса шойна. Идӧртӧм йӧз пӧ вочасӧн тыртӧны сійӧс лӧп-ёгӧн. Но сиктса администрация зільӧ ас кадӧ петкӧдны шыблассӧ, котыртлӧ субӧтникъяс. Вежӧмаӧсь шойнаӧ пыранінсӧ, выльмӧдыштӧмаӧсь потшӧссӧ. Матысса кадӧ бара на пӧ котыртлам субӧтник, чукӧстлам томуловӧс да удж-тӧмалысьясӧс, – эскӧдіс Игорь Истомин.

Александр КУЗНЕЦОВ.

Снимокыс авторлӧн.

KM 3 3

Дзоньталісны пос

Койгорт районса Ком да Воктым посёлокъясын олысьяс важӧн нин майшасисны Ком ю вомӧн важмӧм пос сісьмӧмысла, сійӧс важӧн нин пӧдлавлісны. Но буретш тайӧ поскӧдыс посёлокса ветлӧны шойна вылӧ.

Талун Комын гижӧдӧма 76 морт, но збыльвылас олӧны комынӧн. Воктымын регистрируйтӧма 68-ӧс, но олӧны сӧмын кызь кӧкъямысӧн. Кызь куимыс на пиысь – пенсионеръяс. Посёлокъясын абу аптека, дас ӧти во сайын пӧдлалӧмаӧсь школа. Том йӧз мунӧмаӧсь овны мукӧд сикт-грездӧ. Поссӧ дзоньтавны мӧвпыс воӧма юрас ас вылӧ уджалысь Владимир Блюмлы. Сійӧ чукӧртӧма помеч вылӧ 12 морта котыр.

Тьӧс-плакасӧ да кӧрт тувсӧ ачыс жӧ ньӧбӧма. Ву-джанін дзоньталӧм вылӧ ковмӧма кык лун.

KM 3 4

Сиктыд ловъя, эм кӧ клуб

Выльлунӧ Кулӧмдін районса Немдінын Коми Республикаса юралысь Сергей Гапликов кыпыда восьтіс сиктса выль клуб. Важсӧ кыпӧдлӧмаӧсь кольӧм нэмся 50 воясӧ. Сійӧс шонтісны пач помысь.

Но госпожнадзорӧн казялӧм тырмытӧмторъяс бырӧдӧм вылӧ колӧма корсьны пӧшти 2 миллион шайт. Со и шуӧмаӧсь 4 во сайын кыпӧдны брусысь выль стрӧйба. Та вылӧ мунӧма 11,3 миллион шайт. Джынсӧ чуктӧдӧма район, мыйтакӧ вичмӧма республикаса бюджетысь да отсалӧмаӧсь районын вӧр пӧрӧдысьяс. Выль клуб шонтӧны пеллет отсӧгӧн, воӧ ва, эм канализация. Матысса кадӧ татшӧм жӧ культура керка восьтасны Удора районса Косланын.

 

Добавить комментарий


наверх