Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - ОКОТА ЮАВНЫ

ОКОТА ЮАВНЫ

KM 2 3

Тайӧ лунъясӧ юркарса судын видлалісны 24 арӧса том мортлы паныда уголовнӧй делӧ. Сійӧс мыждісны код юрӧн машина руль сайӧ пуксьӧмысь да туй правилӧяс торкалӧмысь. Шемӧсмӧдӧ, тайӧ мыж вӧчӧмсьыс том шоперӧс вайӧдлӧмаӧсь уголовнӧй кывкутӧмӧ коймӧдысь нин! Но, видзӧдӧмпӧръя, мортыс эз и велав бура овнысӧ.

Окота юавны, мый колӧ вӧчны, медым код юрӧн руль сайын журъялысьлы кывкутӧмыс нэм помӧдзыс мӧрччис?

Галина Бутырева, коми гижысь:

–Ме чайта, сюрин кӧ код юрӧн руль сайын ӧтчыд, мӧдысь да и коймӧдысь, кыв шутӧг, татшӧм мортыслысь машинаӧн веськӧдлан правосӧ колӧ мырддьыны нэм помӧдзыс. Мед мукӧдлы пӧваднӧ эз вӧв.

Роман Койдан, Комиын адвокатъяслӧн палатаын уджалысь:

–Колӧ пыртны Россияса Уголовнӧй кодексӧ вежсьӧмъяс да урчитны татшӧм йӧзыслы ёна чорыдджык кывкутӧм. Шуам, мед мыж вӧчысьӧс некымын во кежлӧ йӧршитлыны сутшкасьысь сутуга сайӧ. Сэки, гашкӧ, ӧлаласны. Татшӧм рецидивистъясысь колӧ ви-дзны мукӧд йӧзӧс, торйӧн нин челядьӧс.

Алексей Чупров, Туристалан шӧринын уджалысь:

–Мӧвпала да, татшӧм йӧзсӧ, кыдзи Сӧвет власьт кадӧ, колӧ мырдӧн бурдӧдны курыд зелльӧ чурскӧмысь. Оз кӧ кутны юны, сэки и код юрӧн руль саяд оз пуксьыны.

Дмитрий Напалков, фотожурналист:

–Юысьыс руль саяд сымда жӧ, мыйта подӧн ветлӧдлысь пӧвстас, абу унджык и абу этшаджык. Кор лавкаӧ пыран, дулльыд петӧ гӧгӧр сярвидзысь мича дозъяс вылӧ, он ю, да окота видлыны! И татшӧм вузасяніныс быд пельӧсын. Сӧветскӧй кадӧ шӧркодь удждон вылӧ позьӧ вӧлі ньӧбны матӧ 40 сулея. А ӧні– кык-куим пӧв ун-джык. Со и артмӧ, мый йӧзыслӧн водка вылӧ сьӧмыс тырмӧ на, а закуска вылас абу. Колӧ тӧдчымӧн донсьӧдны курыд зелльӧтӧ, медым эз вермыны ньӧбнысӧ.

Евгений ПантЕлеев, шопер:

–Ме абу дзик ютӧм морт, но руль сайӧ гажа юрӧн некор эг пуксьыв. Тайӧ ас сайын: прамӧй кӧ, он торкав.

Ӧні карса уличаын, кыдзи эськӧ небыдджыка шуны, юртӧм петукыс уна. Ӧтарсянь и мӧдарсянь зырӧдӧны панйыны. Татшӧмыслысь колӧ жӧ правосӧ мырддьыны. Но ӧд татшӧмыс бӧр пуксяс машина руль сайӧ.

Весиг ог тӧд, кыдзи найӧс мыждыны? Важӧн тай гусясьысьлысь ки лапасӧ керышт-лӧмаӧсь. Гашкӧ, кок лапасӧ керыштны да?..

Анастасия Павлова,вузасьысь:

–Ме мӧдӧд во руль сайын. Первой ёна полі, туй вожад куслася вӧлі и. Верӧс сераліс, стопка пӧ ю да мун, смелджык лоан. Но ме, чайта, гажа юрнад мӧдарӧ вермас лоны.

А кыдзи мыждыны код юрӧн журъялысьясӧс? Пӧжалуй, нинӧм оз мӧрччы. Но колӧ, дерт, стрӧгджыка. Быть пуксьӧдны дзескыдінӧ, правосӧ дзикӧдз мырддьыны.

 

Добавить комментарий


наверх