Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Геройяснад миян дефицит

Геройяснад миян дефицит

khatanzeyskiy

Нылӧй ичӧтдырйиыс, ок, ёна радейтіс Шрек йылысь мультфильмъяс видзӧдны... Коді сійӧ Шрекыс? А... Турунвиж лов: пельясыс инопланетянинлӧн кодь (быттьӧ тӧда, кутшӧм налӧн пельясыс!), олӧ вӧрын, сёйӧ пеж дука вӧлӧга, гӧтырыс и челядьыс сэтшӧм жӧ «кактусъяс»...

Адӧй, адӧй! Мый бара-й мыччӧдлӧны ӧнія челядьлы экрансянь! Коді урӧдик, сійӧ и герой. А «Ну, погодиысь!» Кӧинӧс петкӧдлыны пӧ оз позь — вомас чигаркаӧн дурлывлӧ да. Просто-квашиноса дядя Фёдор пӧ мам-бать дорсьыс пышйӧмӧн сӧмын лёк вылӧ жӧ велӧдӧ. Дай ӧтторъя пакӧститчысь Карлсонсянь бурсӧ эн виччысь... Со и артмӧ, мый миян ныв-пи овны велӧдчӧны кутшӧмкӧ Пикачулысь, Симпсонлысь, Котопёслысь, Лизунлысь, Масянялысь да сідз водзӧ. Лыддьӧдлыны позьӧ помтӧг — челядь лов-сьӧлӧм пежалысьыд тай, майбыр, тырмӧ.

Энлӧй, а Шректӧ нӧ ме мый морла казьтышті?.. А-а-а... Турунвиж геройяс пӧ збыль олӧмас нин эмӧсь! Дзик на неважӧн сійӧс аддзылӧмаӧсь Сыктывкарса ӧти войся клубын. А делӧыс со кыдзи вӧлӧма...

Шойччанінӧ рытын воӧмаӧсь мужичӧй да томиник ань. Дерт, курыдтортӧ видлӧмаӧсь. Сэсся йӧктыны ыззьӧмаӧсь. И колӧ жӧ сідзи лоны, мужичӧйлӧн син пӧлыс тірны пондӧма. А сьӧлӧм косьтысьыс чайтӧма, мый сійӧ мӧд нывлы нин синнас лапйӧдлӧ. Вежӧктысь ань муртса абу йӧймӧма. Видлӧма эськӧ кыдзкӧ бурӧн-ладӧн гӧгӧрвоӧдны, да пель чунавмӧн шыалысь музыканад кылас ӧмӧй мусукыс? Сурдопереводчик моз сійӧ кинас сӧмын петкӧдлӧма, мый пӧ равзан. Да та бӧрын аньыд дзикӧдз пузьӧма, койыштӧма мужичӧйлы веськыда чужӧмас ичӧтик дозйын зелёнка сорас — тадзи лэдзӧма став лӧгсӧ. И быттьӧ нинӧм абу вӧлӧма, чӧв-лӧня петӧма ывлаӧ. А дядьӧыд кольччӧма водзӧ на гажӧдчыны. Буракӧ, геройлы вӧлі торъя нин нимкодь, ставӧн пондісны сійӧс казявны да. Тайкӧ вувзьысясны автограф дзайгыны...

Мый вӧлі водзӧ, история, кыдз шуласны, чӧв олӧ.

Менӧ шемӧсмӧдӧ аньлӧн быдторйӧ дасьлуныс. Но кытысь сылы ридикюльчикас веськалӧма зелёнкаа дозйыс?! Тӧдіс нин, мый муспозйыс кутас мӧд бабакӧд синмасьны? Сідзкӧ, кутшӧм мути нуӧдіс найӧс рытйысянінӧ? Гортаныс кӧ пукалісны, колӧкӧ, нэм помӧдз ӧтлаын кургисны. А тадзикӧн «Шрекӧс» важӧн нин сибӧдіс кутшӧмкӧ «Фиона», ӧд Сыктывкарын жӧникъяс пӧ оз тырмыны, да кодсюрӧлы весигтӧ лякӧсьтӧм чужӧмаыд — быттьӧ еджыд вӧв вылын рыцарь. Мыськала пӧ, и шогмас...

Григорий ХАТАНЗЕЙСКИЙ.

 

Добавить комментарий


наверх