Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - «Отчет наш!»

«Отчет наш!»

khatanzeyskiy

Видзӧда чина войтыр вылӧ да тайкӧ синваӧй чепӧсъяс — сэтшӧм нин найӧ меным жальӧсь. Коньӧрӧйяс лун-лунӧн сӧмын сійӧс и вӧчӧны, мый отчитывайтчӧны асланыс водзмӧстчӧм йылысь. Газетын кӧть телевизор-интернетын тӧдса чужӧмъяс сьӧрсьӧн-бӧрсьӧн висьтасьӧны, кутшӧм кабала талун кырымалӧмаӧсь, кытчӧ тӧрыт шутёвтлӧмаӧсь, кыдзи войдӧрлун кодӧскӧ чолӧмалӧмаӧсь... Зіль жӧ войтыр! Кабинетын, майбыр, оз пукавны — век йӧзкӧд орччӧн, кыдз шуласны, мыш на мыш...

А колӧ эськӧ, мед син на син. Сы вӧсна мый мышкӧн сулалӧмнад йӧзыслӧн збыль олӧмыс чиналы оз тыдав, и быттьӧ эськӧ бур вылӧ лӧсьӧдӧм-вынсьӧдӧм индӧд-оланпасъяс нимкодьӧдӧм пыдди тшӧкыда уськӧдлӧны шогӧ.

Но висьталӧй ті меным, мый морла колӧ вӧлі киритны детсадйын челядьӧс видзӧмысь легота? Бюджет сьӧм экономитӧм могысь?! Серам вай эн петкӧдлӧй! Аддзӧмаӧсь код вылын деньга чӧжны. Ӧнія кадӧ челядь чужтысь-быдтысьлы колӧ муӧдз копырӧн да ыджыд сьӧмӧн аттьӧ шуны. А тайӧяс! Правдайтчӧны на: кодлы колӧ, отсӧгыс пӧ быть вичмас.

Ви-и-ичма-а-ас! Тэ видлы эс-кӧдны кыз рушкуаяслы, мый нажӧвитан урчитӧм дорысь збыль этшаджык. Мӧд вежон нин удждон йылысь справкаяс чукӧрта. Гижасьӧм помысь куш няньыд ёна оз кылав, голяӧ сатшӧ, да окота мукӧддырйи и выйӧн асьтӧ ыш-мӧдлыны. Пыр тай мыйкӧ содтӧд нажӧтка корсян: студентъяслы лекция лыддьӧмысь витсё шайт, небӧг серпасалӧм-верстайтӧмысь сюрсӧн-джынйӧн... Ха! Мӧд газетӧ стаття йӧзӧдӧмысь сё кызь вит шайт комын квайт ур гонорар дай. Ставыс докод! Быдӧнысь вот вештӧма. Сідзкӧ, справкатӧ вай — отчитайтчы!..

Пидзӧсӧс гыжъяла, мед балябӧжӧй оз кушмы: вобыднас кӧні нӧшта «пакӧститчыны» удайтчис? Тӧда эськӧ, тайӧ нажӧткаӧн кок-ньӧдыс быть шедас. Но оз-ӧ чукты налогӧвикъяслӧн прӧверка бӧрын нӧшта кутшӧмкӧ сьӧмтор?! А-а-а, шуасны, тэ, другӧ, лотереяысь ветымын шайта воӧм абу декларируйтӧмыд! Некутшӧм тэд отсӧг!.. Лотереяяснад эськӧ ог дурлы да. Лёкыс вылӧ Выль во кежлӧ гӧтыр ӧти татшӧм кабала козьналіс: миллиард пӧ пудъялӧны... А ме, йӧйыд, эг на и прӧверит сійӧс — юрлӧс улӧ сюйлі, да ӧнӧдз сэн куйлӧ. Колӧкӧ, кутшӧм шуд виччысьӧ! Сэки чинасянь некутшӧм легота оз ковмы, асьным на сылы отсалам... Кӧть нин демография бурмӧдӧм боксянь... А чинаыд ас пайысь бара на отчитайтчас — мытшӧдсӧ пӧ бырӧді... М-м-м... Ставыс лючки!

Григорий ХАТАНЗЕЙСКИЙ.

 

Добавить комментарий


наверх