Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Шед, чери...

Шед, чери...

Март 4 лунӧ Кулӧмдін районын нималана Дон ты вылын котыртлісны йи вылын чери кыйысьяслысь ордйысьӧм.

KM 13 1

Ассьыныс сямсӧ петкӧдлыны воліс сизим команда: Кулӧмдінысь «Лидеръяс», «Патриотъяс», «Рыбаки и рыбки», Дереваннӧйысь «Деревянск», Вӧльдінысь «Вӧль», «Кебанъёль» да Сыктывкар бердса Эжваысь «5-й микрорайон».

KM 13 2

Чери кыйысьяслысь гажсӧ восьтіс сиктса социо-культурнӧй шӧринӧн веськӧдлысь Артур Гарнов, коді казьтыштіс чукӧртчӧмаяслы тылысь историясӧ. Вӧлӧмкӧ, уна-уна во сайын кыйсьысьяс аддзӧмаӧсь рытъя шонді улын тылысь рӧмсӧ, сійӧ дзирдалӧма быттьӧ доналӧм кӧрт. Та бӧрын тысӧ да сиктсӧ кутӧмаӧсь шуны Донӧн.

Чолӧмалана кывъясӧн чукӧртчӧмаяс дорӧ шыӧдчисны Кулӧмдін да Дон овмӧдчӧминъясса администрацияясӧн веськӧдлысьяс Виктор Игнатов да Василий Нехорошев.

МЧС-ын зільысьяс разӧдісны ордйысьысьяслы памяткаяс да казьтыштісны, мыйысь да кыдзи колӧ видзчысьны йи вывті ветлӧдлігӧн.

KM 13 3

А ордйысьӧмлӧн медшӧр судья Василий Шахов тӧдмӧдіс ставнысӧ правилӧясӧн.

Та бӧрын чери кыйысьяс ыззисны да петісны йи вылӧ...

Командаяс пӧвстын вермысьясӧн лоисны Дереваннӧйысь Иван Гуляев, Владимир Кузнецов да Александр Халимоненко. Найӧ кыйисны матӧ 800 грамм чери. Мӧдӧн лоисны «Лидеръяс» (Николай Липин, Михаил Чисталёв, Павел Тимушев), а коймӧдӧн – Эжваысь «5-й микрорайон» (Константин да Степан Воробьёвъяс, Сергей Трудников).

KM 13 4

Ӧтка вуграсьысьяс пӧвстын медводдза местаыс вичмис дереваннӧйсалы жӧ. 614 грамм чери шедіс Владимир Кузнецовлы. Мӧдӧд местасӧ босьтіс Кулӧмдінысь Ева Сенькина, коді петкӧдліс, мый оз сӧмын мужичӧйяс кужны кыйны чери. 30 граммӧн сыысь кольччис Кулӧмдінысь жӧ Михаил Чисталёв.

Торйӧн ордйысьысьясӧс пасйисны «Медся гырысь да ичӧт чери», «Медся арлыда да том кыйсьысь» «Кыйсьысь ань», «Кыйсьысь семья» нимпасъясын.

Ордйысьӧм бӧрын гаж вылӧ воысьяс вермисны видлыны ассьыныс выннысӧ уна сикас конкурсын, тшӧтш и йи вылын юкмӧс писькӧдӧмын, гезйӧн кыскасьӧмын.

KM 13 5

Вермысьяслы да призёръяслы сетісны грамотаяс, дона козинъяс да спонсоръяссянь сертификатъяс.

–Зэв нимкодь, мый чукӧртчыліс та мында кыйсьысь, вӧр-ваын шойч-чыны радейтысь.

Вуграсисны олӧма и том, унаӧн волісны семьяясыскӧд. Медся ичӧт кыйсьысьлы дас ӧти арӧс на абу тырӧма, а медся арлыдаыс квайтымын нёля нин.

Весиг со Эжваын олысьяс окотитісны волыны, кывлӧмаӧсь миян ордйысьӧм йылысь да.

KM 13 6

Гӧсьтъяслӧн висьталӧм серти, гажыс ёна воӧма налы сьӧлӧм вылас. Чӧсмӧдлім найӧс бипур вылын пуӧм юкваӧн да пӧсь тшайӧн.

Ордйысьӧмсӧ нуӧдім Дон ты вылын медводдзаысь на, но кутам лача, локтан воӧ бара на миян сиктӧ чукӧртчыласны чери кыйны радейтысьяс, – пасйис сёрниын Артур Гарнов.

Снимокъясыс «ВКонтактеысь».

KM 13 7

 

Добавить комментарий


наверх