Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Лым тукта поньталӧма челядьӧс

Лым тукта поньталӧма челядьӧс

KM 3 1

Кольӧм вежонӧ, март 2 лунӧ, Вылыс Максаковкаса 120 номера детсад вевтысь челядь вылӧ усьӧма лым да тыртӧма куим дзолюкӧс. Бур, кагаясӧс спаситӧмаӧсь, на пиысь некод чорыда абу доймалӧма.

Ог пӧ мун...

—Та йылысь меным юӧртіс мамӧй, — висьталӧ Кира Лаборевич. — Сійӧ уджалӧ детсад дорын матын да горзӧм шы вылас котӧртӧма. Мам ачыс корсьӧма внучкасӧ. Ника куйлӧма кымыньӧн. Сійӧс мукӧдыскӧд тшӧтш нуӧмаӧсь больничаӧ. Бурдӧдысьяс такӧдісны, мый абу пӧ чорыда доймалӧма да ставыс лоӧ бур. Но кагалӧн юрыс вӧрзьӧма, чужӧмыс парсасьӧма, лӧзӧдӧма, синмыс гырд. Ника казьтылӧ: «Ме вылӧ усис лым, тыртіс, а сэсся ыджыд мам спаситіс».

Евгения Исраиловналӧн Радмилаыс лым пытшкас куйлӧма медся дыр, медбӧрын перйӧмаӧсь да. Больничаысь лэдзӧмаӧсь кольӧм пекничаӧ, но гортас локтӧм бӧрын нывка температуритӧма. Тыдалӧ, прӧстудитчӧма.

—Ме вӧлі удж вылын, кор звӧнитісны, — казьтылӧ Евгения Исраиловна. — Весиг мӧвпыштны эг куж, кутшӧм ускӧттьӧ суис. Чайті, нылӧй ыждалӧ. Асывнас мырдӧн нуӧді, ог пӧ мун, бабкӧд кольчча. Мыйла эг кывзы. Тӧда, и мукӧдыслӧн челядьыс бӧрдӧмсорӧн мунӧмаӧсь... Телефон пырыс эг на ставсӧ лючки гӧгӧрво. Дзӧрӧдны кутіс. Веськӧдлысьӧй ачыс машинанас садйӧ нуӧдіс. Ӧні на ас садьӧ эг во. А нӧшта кӧ лёкджыктор лоис?..

Бӧрыннас весалісны

Бать-мамлӧн кывъяс серти, найӧ унаысь шыӧдчылӧмаӧсь детсадйӧн веськӧдлысь дорӧ, медым весаласны вевтсӧ. Но сьӧмыс ли кадыс сэки абу сюрӧма. Сӧмын ускӧттьӧ бӧрын заводитӧмаӧсь вӧрӧдчыны.

Таӧдз пӧ февраль 12 лунӧ весалӧмаӧсь челядьлысь гуляйтанінсӧ, сарай да веранда вевтсӧ. Детсад стрӧйба вевтлысь жӧ уськӧдӧмаӧсь сӧмын ӧшӧдчӧм туктасӧ. Шондӧдӧм бӧрын сэсся и вылісьыс вӧрзьӧма. Весиг лым кутӧдыс абу падмӧдӧма, кӧть и вевт вылас эм сійӧ. Бать-мамлӧн висьталӧм серти, сідз шусяна снегодержательыс вежнясьлӧма кольӧм во нин, но абу и лӧсьӧдлӧмаӧсь.

Коми Республикаысь погона йӧз панӧмаӧсь детсадйын ускӧттьӧ кузя уголовнӧй делӧ. Лоӧмторсӧ туялӧны. Бать-мам тшӧтш кӧсйӧны шыӧд-чыны ёрдӧ.

Бара на сьӧмыс эз тырмы?

Вылыс Максаковкаса 120 номера детсадйӧн веськӧдлысь Надежда Сильченкова лоӧмтор йывсьыс эз висьтась, туясьӧм пӧ мунӧ да. Шуис сӧмын, мый корӧ прӧща бать-мамлысь.

Посёлокӧн жӧ веськӧдлысь Светлана Русицкая юӧртіс, мый стрӧйба вевт вылын вӧлӧма лым кутӧдыс. Но мыйла абу падмӧдӧма туктасӧ? Тыдалӧ пӧ, шогмытӧма вӧчӧмаӧсь либӧ мода вылас. Но Войвылад ӧд ёна лымъялӧ...

Медым татшӧм ускӧттьӧыс мӧдысь эз ло, колӧ пӧ тӧвнас вевтсӧ некымынысь весавны, чайтӧ Светлана Русицкая. Но та вылӧ колӧ сьӧм. А кыдзи петкӧдлӧ олӧмыс, детсадъяслы да и мукӧд бюджет учреждениелы сійӧ век оз тырмы.

—Ме ог эскы, мый вӧлі кӧ весь-кӧдлысьяслӧн вевтсӧ весавны деньга, видзисны сійӧс мӧдлаӧ, — шуӧ Светлана Николаевна. —Дерт, мыждынытӧ кокньыд, но колӧ лоӧмторсӧ гӧгӧрбок донъявны-туявны.

Екатерина МАКАРОВА.

Снимокыс ӧтуввезйысь.

 

Добавить комментарий


наверх