Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - ОКОТА ЮАВНЫ

ОКОТА ЮАВНЫ

KM 2 4

«Левада-центр» аналитическӧй шӧринлӧн юасьӧм серти Россияын 52 прӧчент олысьыс эскӧ народнӧй медициналы.

Окота юавны, тшӧкыда-ӧ ті шыӧдчыланныд отсӧгла татшӧм сикас бурдӧдысьяс дорӧ? И мыйла?

 

Изосим Петров, Сыктывкарысь уджвывса ветеран:

–Аслам нэмын, а меным квайтымын квайт арӧс, унаысь шыӧдчылі бурдӧдчысь-тунъяс дорӧ. Но, шуны кӧ веськыда, налӧн лечитӧмысь ыджыд водзӧсыс сідз эз и ло. Пыр виччыси, мый кокньӧдас, но кыдзи юкалісны-висисны коскӧй да кокъясӧй, сідз и ӧні спокойыс абу.

Дзикӧдз пӧгибӧ вои! Дерт, унджык сьӧм кӧ верми чӧжны, Кировса да Казаньса врачьяс дорӧ эськӧ ветлі. Кывлі, найӧ пӧ и висьӧмтӧ стӧчджыка туялӧны да нёрпалысьтӧ кок йылас ӧдйӧджык сувтӧдӧны...

Анатолий Полькин, журналист:

–Народнӧй медицина – тайӧ уна воӧн чӧжӧм опыт-сям. Тьӧщаӧй чукӧртліс быдсикас турунсӧ. Помнита, сылӧн керкаын ӧшалісны быдмӧг кольтаяс, ставсӧ вӧлі торйӧдӧма, тӧдіс, мыйысь кутшӧм быдмӧг отсалӧ.

Сэки ме том на вӧлі да, гашкӧ, эг эскы нимкывъясӧ, но сійӧ уналы отсавліс.

Сэсся менам эм ёрт – Анатолий Худин, кодӧс республикаын унаӧн жӧ тӧдӧны. Буретш сійӧ менӧ турунӧн и бурдӧдліс, эськӧ уна во нин кыз му улын куйлі.

Тӧдлі уна веськӧдчысьӧс. Дерт, на пӧвстын вӧліны и шарлатанъяс, кодъяс, мӧдарӧ, чегъявлісны висьысьяссӧ. Но и прамӧйыскӧд паныдасьлывлі.

Та вӧсна ме абу паныд народнӧй медициналы, чайта, сыысь водзӧсыс эм.

Николай Микушев, пенсионер, Кӧрткерӧс р.:

–Менам быдмигӧн сикт-грездад бурдӧдысьыд гежӧд вӧлі да, та вӧсна сійӧ кадас ставӧн вӧдитчылісны народнӧй медицинанад. Менам пӧчӧй бура тӧдліс, кутшӧм турун да вотӧс отсалӧ венны сійӧ либӧ мӧд висьӧм.

Ӧні ми тшӧкыда кылам, мый сиктъясын сэні и тані тупкӧны больнича да ФАП. Тадзи кӧ водзӧ лоӧ, гашкӧ, бӧр ковмас бергӧдчыны «важ кадас» да заводитны бурдӧдчыны народнӧй медицина отсӧгӧн.

Ирина Бутырева, кагульнича, Удора р.:

–Висигӧн ме тшӧкыда бурдӧдча пӧль-пӧч моз жӧ: сёя лук-чеснӧк, шонта кокӧс горчицаӧн соралӧм ваын, лолала пӧсь картупеля миска весьтын... Дыш меным больничаын ӧчередьын пукавны да, зіля ачым кыдзкӧ бурдӧдчыны.

Михаил Скоробогатов, официант, Сыктывкар:

–Народнӧй медицинаад ме ог эскы, та вӧсна пырджык шыӧдчыла больничаӧ. Унаӧн, дерт, асьныс видлӧны бурдӧдчыны, но мыйӧн сэсся висьӧмыс ёнджыка “топӧдас, котӧрӧн мунӧны врач дорӧ.

Михаил Терентьев, вахтаӧн уджалысь, Кулӧмдін р.:

–Меным висьнысӧ некор. Но кор сьӧкыдтӧ кыскалігад кочкылӧ мышкӧ, шыӧдчыла миян бригадир дорӧ. Сійӧс пӧльыс велӧдлӧма «мышкутӧ веськӧд-ны» да висьысь лысьӧмтӧ «небзьӧдны». И сылӧн песӧм бӧрын быттьӧ выльысь чужан.

 

Добавить комментарий


наверх