Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Чужан лунӧн, республика!

Чужан лунӧн, республика!

KM 1

Август 22 лунӧ Коми Республикалы тырис 97 во. Такӧд йитӧдын регионса кар-районъясын, торйӧн нин Сыктывкарын, муніс уна сикас ордйысьӧм-ворсӧм, выставка-петкӧдчӧм, а сценасянь юргисны гажа сьыланкывъяс.

Сӧмын поводдяӧн тавося гажлы эз ёна мойви: асывсяньыс буситіс арся зэр, пӧльтіс чизыр тӧв, и сӧмын ичӧтик здук кежлӧ шонді мыччӧдлывліс ассьыс «нюмсӧ». Но та вылӧ видзӧдтӧг карса уличаяс вылын вӧлі йӧза. Сьӧкыд стӧча шуны, мыйла  юркарса да гӧсьтъяс эз повны кӧтасьны-кынмыны. Гашкӧ, налы вӧлі долыд чужанінлӧн нимлун вӧсна? А колӧкӧ, и вежон шӧрын шойччан луныд кыпӧдіс налысь ловсӧ...

Асывсяньыс йӧзӧс виччысисны Степан изэрд вылын, кӧні воссис войтыркостса «Диалог культур: Северное многоцветье» этнофестиваль.

Сценасянь юргисны армяналӧн, болгаралӧн, украинечьяслӧн да мукӧд войтырлӧн сьыланкывъяс, петкӧдчисны йӧктан котыръяс, а гажсӧ котыртысьяс нуӧдісны национальнӧй ворсӧмъяс.

KM 12 1

Сідзжӧ вӧлі лӧсьӧдӧма некымын площадка. Шуам, «Киподтуяинын» мастеръяс ошйысисны ас киӧн вӧчӧмторъясӧн.  Асывсяньыс сэні позис велӧдчыны вӧчны сюмӧдысь чача, мича акань, баситчантор. Бокынджык клонгис мӧлӧтӧн дорччысь – велӧдіс гӧсьтъясӧс вӧчны подков. «Изьватаслӧн» чумын вӧзйисны шонтысьны воййыв турунысь чайӧн. А медся ичӧтъяс сідз шусяна контактнӧй зоопаркын окотапырысь тӧдмасисны верблюдкӧд, вӧвкӧд, кӧркӧд да мукӧд пемӧскӧд.

Колӧ пасйыны, мый тайӧ лунъясӧ Сыктывкарын муніс национальнӧй да Олимпиадаӧ пырттӧм спорт сикасъяслӧн фестиваль, кытчӧ воис 49 регионысь матӧ 530 спортсмен. И Ленинлы памятник дорын жӧ ылі муысь воӧм гӧсьтъяс тӧдмӧдісны чукӧртчӧмаясӧс асланыс национальнӧй вермасьӧмъясӧн.

KM 12 2

Тані вӧлі сувтӧдӧма армрестлингысь венласян пызан, ыджыд  ин сиӧмаӧсь «Лямпиада» фестивальлы. Окотитысьяс вермисны «уялыштны» вӧралысьлӧн ордымті, велӧдчыны пуктыны лэч да снимайтчыны национальнӧй костюма войтыркӧд.

Республикалӧн «Почёт пӧв» дорын паськӧдчисны ГТО сдайтысьяс. Верстьӧ и челядь эскӧдісны, мый найӧ дасьӧсь «дорйысьны да уджавны». 

KM 12 3

Но медъёна воис чукӧртчӧмаяслы сьӧлӧм вылас мукӧд регионысь национальнӧй тышъяс петкӧдлӧм. Медводдзаӧн «ринг» вылӧ петісны Ингушетияса гӧсьтъяс. «Шон сан латӧн» тӧдмӧдіс сійӧс котыртысь Магомед-Гирей Сукиев. Мужичӧй лӧсьӧдӧма вермасьӧмсӧ армияын служитігас на, подуласьӧма воинъясӧс дасьтан нэмӧвӧйся программа вылӧ да неуна выльмӧдӧма сійӧс.

KM 13 1

Сы бӧрын мат вылӧ петісны Якутияысь гӧсьтъяс. Олег Дадаскинов петкӧдліс республикаса олысьяслы «хапсагай» вермасьӧм. Тайӧ якутъяслӧн тыш, «вужъяссӧ» кодлысь некод нин оз вермы корсьны, сэтшӧм важӧн сійӧс думыштлӧмаӧсь да.

Татарстанысь спортсменъяс тӧдмӧдісны «керешу» венласьӧмӧн, сэні «вӧрӧгӧс» вӧньӧдыс колӧ лэптыны му вылысь.

Кыдзи и мукӧд воясӧ, Киров нима парк тайӧ лунӧ ставнас сетісны челядьлы да котыртлісны «Менам республика – менам семья» фестиваль. Бать-мамлы, томуловлы вӧлі дасьтӧмаӧсь торъя квест, кӧні коліс венны сідз шусяна полоса препятствий, тӧдмавны нӧдкывъяс да пырӧдчыны уна сикас конкурс-ворсӧмӧ. Тані жӧ вӧлі сувтӧдӧма ыджыд сцена, кысянь петкӧдчисны Вылыс Максаковкаса, Сьӧдкыркӧтшса да Выльтыдорса культура керкаясын зільысьяс, самодеятельнӧй коллективъяс.

KM 13 2

А кодлӧн сюммыліс кынӧм, вермис номсасьыштны коми шаньгаӧн да пражитӧм яйӧн. Сэні жӧ вӧзйисны видлыны Удмуртияса сідз шусяна перепечияс. Найӧс пӧжалісны ыджыд пачын, и быдӧн ошкис, чӧскыдӧсь пӧ– тайкӧ кывтӧ ньылыштан!

Рытланьыс, кор юркарса уличаяс вочасӧн кутісны кушмыны, Степан изэрд вылын Сыктывкарса олысьясӧс да гӧсьтъясӧс республикалӧн нимлунӧн чолӧмалісны Удмуртияысь «Эктоника» да кольӧм нэмся 1980 воясын нималысь «Joy» котыр.

«Эктоника» – тайӧ Ижевскысь том войтырлӧн проект, кӧні зільӧны выльмӧдны удмуртъяслысь важ сьыланкывъяс да ладмӧдны найӧс электроннӧй шылад улӧ. Кывзан, и кокыд ачыс заводитӧ йӧктыны. А мӧд ногсӧ эз вермы лоны, ӧд коді сулаліс – ёнакодь кынмаліс. Зэв нин зэра да дзик арся кодь вӧлі поводдяыс.

KM 13 3

А сэсся петіс «Joy» котыр. Сценасянь юргисны Австрияысь группалӧн медся нималана сьыланкывъяс,  кодъясӧс бура тӧдӧны сідз шусяна «евродэнс» радейтысьяс. Артистъяс весиг  велӧдӧмаӧсь вӧлі гоз-мӧд роч кыв. Сідз, группаын сьылысь Михаэль Шайкль сценасянь ӧтторъя горзіс: «Девушки – молодцы!» да «Сыктывкар,  хорошо!»

Праздник помасис «Огни республики» пиротехника фестивальӧн. «Маръямоль», «Зиль-зёль» да мукӧд сьыланкыв улӧ Киров нима парк весьтын сынӧдсӧ югзьӧдіс уна рӧма салют.

Павел Королёв.

Снимокъясыс авторлӧн

да ӧтуввезйысь. 

 

Добавить комментарий


наверх