Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - «Не вой» и бур вой!

«Не вой» и бур вой!

khatanzeyskiy

Гаж — гажӧн, но ме, ёртъяс, тӧрыт войсӧ зэв лёка узи.

Мися, аски удж вылӧ колӧ мунны да, водзджык и воді. Муртса синмӧс куни, ӧшинь сайын кыдз тай грымӧбтіс: ба-бах!.. Ба-ба-ба-ба-бах!.. Чеччи. Енэжыс востымасьӧ, но он гӧгӧрво — коді, кодӧс и, главнӧйыс, мыйла?.. Бӧрас эськӧ воис жӧ юрӧ, мый дона республиканымлысь ӧкмысдас сизимӧд чужан лунсӧ татшӧм гораа да яръюгыда пасйӧны. А меным мый? Меным аски удж вылӧ!..

И быттьӧӧд ойбыртлі нин. Чӧскыд унмӧс «повзьӧдіс» орчча керкаысь понлӧн лёкысь увтӧмыс. Шензя, мыйся тайӧ скӧтина! Луннас сусед йӧрысь тележка босьтлі, да Рексныс юрсӧ эз лэптыв, кӧть керкакодьсӧ петкӧд, а ӧні на тэд — садьмӧма стӧрӧжитан руыс. Либӧ сёйны кӧсйӧ. Менам тай понйӧй кодыр тшыгъялас, пыр и увгыны заводитӧ... Но вот, казьтышт сӧмын...

Ог тӧд, дыр-ӧ на увтӧм-увгӧмнас «пельӧс гажӧді», но кутшӧмкӧ здукӧ ме палялі стен сайын унитазӧ ва лэдзӧмысь. Но кодлы бара-й сэні оз узьсьы? Луныс нӧ тіянлы мый вылӧ?!.

«Папӧ-ӧ-ӧ, ме исясьны кӧсъя!» — шыасис пи, кодӧс чайті, мый важӧн нин нимкодясьӧ витӧд ли квайтӧд вӧтӧн. А горшокӧ кӧ сійӧс пуксьӧдлан, час кымын ковмас на сыкӧд гажӧдчыны: вочавидзны некымын «а мыйла?» вылӧ, лыддьыны небӧг, коді луннас на вӧлі дзик ковтӧм да абу тешкодь, шӧпкӧдны выльӧн лӧсьӧдӧм мойд, а сэсся...

Ме нӧ талун унмовсьла али ог?!

Юрӧн пыри шебрас улӧ. Ланьті. Чайті, асылӧдзыс нин... Наивнӧй...

Дзурк да дзурк!.. Дзурк да дзурк!.. Тайӧ гӧтыр орччӧн водіс. Вель дыр бергаліс, корсис бурджык ин, а сэсся «Бур вой!» сиӧм пыдди кӧдзыд кияснас инмӧдчис мышкӧ: «Узян?..»

Ті эськӧ мый татчӧ вочавидзинныд? Но... ме сідзи жӧ... Нинӧм эг шу, сӧмын лӧньӧді ачымӧс думъясӧн: «Энлӧй! Лоас и миян ӧшинь улын гаж...»

Сё збыль лоас! Республикаса Госсӧветысь депутатъяс сентябрь 20 лунӧ сессия дырйи кӧсйӧны со «Чӧв-лӧнь йылысь» оланпасӧ вынсьӧдны содтӧдъяс. Выльӧн пыртӧмъяс серти оз мӧд позьны войын включитны песласян машина либӧ пылесос. Гаралӧм оланпасыс Комиын вӧлі примитӧма 2016 воын, и сійӧ кадсяньыс чӧв-лӧнь бӧрся видзӧдысьяс гижӧмаӧсь торкалӧмъяс серти дас сюрсысь унджык протокол.

Хм... И мыйла меным оз кажитчы суседлӧн понйыс?..

Григорий ХАТАНЗЕЙСКИЙ.

 

Добавить комментарий


наверх