Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Выльыс сӧмын Гриваын да Кыддзавиддзын

Выльыс сӧмын Гриваын да Кыддзавиддзын

KM 4

Россияса народнӧй фронтысь водзмӧстчысьяс водзӧ туялӧны, кыдзи Коми Республикаын сиктса войтырӧс бурдӧдӧны-лечитӧны. Тыдовтчис, ни ӧти ФАП оз тырвыйӧ лӧсяв Россияса минздравсоцразитиялӧн тшӧктӧмъяслы. Тавося майын нин общественнӧй котырӧ пырысьяс индылӧмаӧсь, мый уна фельдшерско-акушерскӧй пунктын весиг китӧ мыськыны некӧн.

А августнас «народнӧй фронтса» ветлісны Кӧрткерӧс районысь Пӧддельнӧйса да Пӧдтыбокса, Удораысь Ёдваса, Кулӧмдін районысь Кебанъёльса, Луздорысь Кыддзавидзса, Койгорт районысь Гриваса, Печора йылысь Якшаса, Емдін сиктса, Печора районысь Чикшинса, Изьва вожысь Картаёльса бурдӧдчанінъясӧ. Видзӧдалісны, эмӧсь-ӧ сэтчӧс ФАП-амбулаторияын электрокардиограф, фонендоскоп да уна мукӧд колана оборудование. Бара жӧ некӧн эз аддзыны, мед ставыс вӧлі. А Кебанъёльын нёрпалысьяслысь корӧны сьӧрсьыс вайны шприц да бинт.

Кызвын бурдӧдчаніныс меститчӧ важмӧм керкаясын, сӧмын Гриваын да Кыддзавиддзын выльӧс кыпӧдлӧмаӧсь. Картаёльын жӧ пачӧн на ломтысьӧны, васӧ ведраӧн ваялӧны, асмогасяніныс ывлаын. Да и тшаксялӧма нин джынвыйӧ стрӧйбаыс, киссян выйӧдз воӧма.

Йӧзкӧд сёрнитігӧн сиктса войтыр элясьӧмаӧсь «народнӧй фронтсалы», отпускӧ пӧ петасны бурдӧдчысьясыс да, найӧс некод оз веж. Кыддзавиддзын врачыс абу, гежӧдика волывлӧ Ношульысь, и ӧчередыс сы дорӧ век зэв кузь.

–Том йӧз оз кӧсйыны уджавны ылі сикт-грездын, – висьталіс ОНФ-лӧн Комиын регионса штабӧ пырысь, Койгортса шӧр больничаысь главврач Вадим Мечетин.

Сійӧ сідзжӧ пасйис, зільӧны жӧ пӧ эськӧ сиктса бурдӧдчанінъяссӧ колана оборудованиенас могмӧдны, но уджавны наӧн некодлы.

–Туясигӧн бурторсӧ казялім жӧ. Сідз, ӧткымынлаын выль ФАП-яс стрӧитӧмаӧсь, – висьталіс Россияса народнӧй фронтысь регионса штабын зільысь Ольга Федулова. – Но тырмытӧмторъяссӧ колӧ бырӧдны. Та йылысь ассьыным вӧзйӧмъяс ми ыстім республикаса войтырлысь дзоньвидзалун видзан министерствоӧ. Корим тшӧтш юӧртны, кӧні нӧшта индӧма кыпӧдны выль фельдшерско-акушерскӧй пунктсӧ. Ми и водзӧ мӧдам туявны, кыдзи сиктса йӧзӧс могмӧдӧны медицина услугаӧн.

 

Добавить комментарий


наверх