Радио Юрган

Приёмная/факс: 8 (8212) 24-01-16

Электронный адрес:
smi-komimu@mail.ru

Адрес: 167982 Республика Коми, г.Сыктывкар, ул.Карла Маркса, д.229

Йитчыны миянкӧд

Skype пыр.

Связаться с нами

через Skype.

Коми йöзöдчан керка - Бурсиӧм

Бурсиӧм

khatanzeyskiy

Воторник рыт гортын пукала, некодӧс ог дӧзмӧд, ужнайта – и на тэд! Телевизорын помся мӧдісны юӧртны: аски пӧ Россияса президент кӧсйӧ шыӧдчыны граждана дорӧ...

Ёртъяс, тадзи повзьӧдчынытӧ абу лӧсьыд! Ме ӧд муртса гӧбӧчӧ пӧльлӧн сімӧм берданкала эг пыр. Чайті, всё, заводитчис – дзикӧдз дӧзмӧдісны медыджыднымӧс американечьяслӧн весиг аслыныс гӧгӧрвотӧм да мустӧм санкцияясыс. Но пражитӧм чипан яй гос киысь чышкалігӧн (футболкаӧс ковмис дзебны, мед муса гӧтыр оз аддзы) дум вылӧ уси: а мыйла аски? Ми вермам и талун! ГТО-тӧ, майбыр, сдайтім да ӧні тӧдам – сёйӧм ни узьӧм оз ков, век дасьӧсь!..

И пыр жӧ, мыйла аски?.. Телепит лои видзӧдлыны календарӧ да гӧгӧрвоны, мыйкӧд али кодкӧд йитӧма Владимир Владимирович войтыр дорӧ ассьыс  шыӧдчӧмсӧ.

Лыддя, август 29 лунӧ мӧдасны нимӧдны спецназ... Ага. Кыдз шуласны: за нас, за вас и за спецназ! А йӧзыслы нӧ мый таысь?.. Абу. Мыйкӧ мӧдтор.

Сідзкӧ, водзӧ... Крышаті ветлӧдлан лун. Хм! Тешкодь гаж. Ме тай татшӧмсӧ эг на и кывлы-а. Но, шуам, тувсов каньяс моз асъя войӧ странакодьӧн каям вевтъяс вылӧ да кыдз тай... Гашкӧ, ӧлӧдны кӧсйӧ? Медым ми, романтикъяс, страналӧн экономикалы ускӧттьӧ эгӧ вӧчӧй... Мыйкӧ оз жӧ лӧсяв. Кӧть нин менӧ видлы асъя войын вольпасьысь чеччӧдны да кутшӧмкӧ крыша вылӧ на катӧдны. Чӧв...

О, мотоцикллӧн чужан лун! Бензин ӧтторъя донсялӧмнад, пӧжалуй, на вылӧ регыд и вуджам. Сӧмын колӧ-ӧ та могысь президентлӧн индӧмышӧдӧмыс?..

Со... Бархат тупли лун... Но тайӧ вывтіджык нин...

Нӧшта мый?.. А нӧшта: Египетса календар серти выль во заводитчӧм, Испанияын помидоръясӧн лыйсян гаж пасйӧм, Китайын чоп-суи рагу нимӧдӧм, Америкаын лимон сок ыдждӧдлӧм... Мися жӧ президентныслӧн чужӧмыс – быттьӧ тайкӧ на лимон ньылыштӧма... Но та понда ӧд войтырлы он жӧ висьтась!..

Аскиыс воис. Президент шыӧдчыліс, пенсия реформа йылысь висьтасис. Уджъёртъяс сэсся лунтыр менӧ чужан лунӧн чолӧмалісны и мыйлакӧ вель унаӧн пенсия вылӧ петны шуд сиисны... Эн на вӧтлӧй, ме ӧд том на!..

Григорий ХАТАНЗЕЙСКИЙ.

 

Добавить комментарий


наверх